ەلىمىزدىڭ 13 ءوڭىرىنىڭ 59 كاسىپورىنىنىڭ باسىن بىرىكتىرەتىن مەكەمە «قازاقستاندا جاسالعان» بەلگىسىمەن تابيعاتتىڭ توسىن مىنەزىنەن ءزابىر كورگەن تۇرعىندارعا قۇنى 7 ميلليون تەڭگەنىڭ 4 مىڭ دانا تىگىن جانە تريكوتاج ونىمدەرىن (ەرەسەكتەر مەن بالالارعا ارنالعان جىلى كيىمدەر, مەكتەپ فورماسى), 1 جارىم مىڭ دانا توسەك جابدىقتارىن, 1500 جۇپ اياق كيىم جىبەرىپتى.
«ايدىڭ-كۇننىڭ امانىندا قانشاما تۇرعىننىڭ باسپاناسىز قالىپ, كەلەڭسىز كۇيگە تۇسكەنى ەلىمىزدىڭ ءبىر ازاماتى رەتىندە ءبىزدىڭ دە جانىمىزعا باتتى. ۋايىمدادىق. ۇجىممەن اقىلداسا كەلە اياگوز تۇرعىندارىنا كومەك كورسەتۋ جونىندە شەشىم قابىلدادىق. مۇقتاجعا جاردەمدەسۋ, سۇرىنگەندى دەمەۋ, قايىرىمدىلىق جاساۋ قانىمىزدا بار قاسيەت ەمەس پە؟ «بولاشاققا باعدار: رۋحاني جاڭعىرۋ» ماقالاسىندا ەلباسىمىز تۋعان جەرگە, وسكەن ەلگە, قورشاعان ورتاعا قۇرمەتپەن قاراۋ اتا-بابامىزدان دارىعان يگى ءداستۇر ەكەنىن اتاپ وتكەن جوق پا؟ ءبىزدىڭ كاسىپورىن وتاندىق ونىمدەردى دامىتۋعا ەرەكشە كوڭىل بولەدى. حالىقتىڭ وسال توپتارىنا اركەز جاردەمدەسىپ وتىرامىز. رەسپۋبليكالىق «اتامەكەنىم» اكتسياسى اياسىندا اياگوزگە كيىم-كەشەك, توسەك جابدىقتارىنان بولەك ماتەريالىق كومەك رەتىندە 1 ميلليون تەڭگە جىبەردىك», - دەيدى «جاسامپاز» وتاندىق وندىرۋشىلەر كونتسورتسيۋىمىنىڭ اتقارۋ كەڭەسىنىڭ ءتورايىمى گۇلميرا ۋاحيتوۆا.
ارقا توسىنەن جولدانعان قايىرىمدىلىق كومەكتى امان-ەسەن اياگوزگە جەتكىزگەن استانالىقتاردى جەرگىلىكتى تۇرعىندار قۇشاق جايا قارسى الىپ, العىستارىن جەتكىزدى. «اۋدانىمىزعا ەلىمىزدىڭ تۇكپىر-تۇكپىرىنەن گۋمانيتارلىق كومەك كەلىپ جاتىر. بۇگىن مىنە استانادان «جاسامپاز» كونتسورتسيۋمىنىڭ جىبەرگەن زاتتارىن قابىلداپ الدىق. جىلى كيىمدەر مەن توسەك جابدىقتارى, مەكتەپ فورماسى تاسقىننان زارداپ شەككەن تۇرعىندارعا ۇلكەن جاردەم بولارى انىق. تابيعاتتىڭ توسىن مىنەزىنەن باسپاناسىز قالعان, ۇيلەرى ب ۇلىنگەن وتباسىلار العىستارىن ايتىپ جاتىر», - دەيدى اياگوز اۋداندىق ىشكى ساياسات ءبولىمىنىڭ باسشىسى مەدەت مىرزىكەشوۆ.
استانادان كەلگەن كومەككە تۇرعىندار دا ءوز ريزاشىلىقتارىن ءبىلدىردى. «سوناۋ استانادان ات ارىتىپ كەلگەن «جاسامپاز» مەكەمەسىنىڭ ۇجىمىنا كوپ راحمەت. وسىنداي قيىن ساتتە قاسىمىزدان تابىلعانىنا ريزامىز. تاسقىننان زارداپ شەككەن تۇرعىندار اتىنان زور العىسىمىزدى بىلدىرەمىز», - دەيدى ءتىلسىز جاۋدان زارداپ شەككەن تۇرعىنداردىڭ ءبىرى ءمادينا دارىباەۆا.
ازامات قاسىم,
«ەگەمەن قازاقستان»
شىعىس قازاقستان وبلىسى,
اياگوز اۋدانى
