وسىعان وراي, باسىلىم قىزمەتكەرلەرى ايماقتاعى تۇرمىسى تومەن, قولداۋعا مۇقتاج جانداردىڭ ءتىزىمىن ءتيىستى مەكەمەدەن الىپ, قايىرىمدىلىققا باعىتتالعان جۇمىستار رەتىن باستاپ كەتكەن بولاتىن. ناتيجەسىندە, وڭىردەگى الەۋمەتتىك جاعىنان از قامتىلعان, قولداۋعا مۇقتاج, مۇگەدەك بالالارى بار وتباسىلاردىڭ قاجەتتىلىكتەرى ەسكەرىلە وتىرىپ, كومەك قولى سوزىلدى. وسىلايشا, اكتسيا اياسىندا 3 اپتاعا جۋىق ۋاقىت ىشىندە 30-عا جۋىق وتباسىنا قامقورلىق كورسەتىلدى.
«Aq jol» گازەتىنىڭ رەداكتسياسى تەك قايىرىمدىلىق شارالارىمەن شەكتەلمەي, وزگە دە ىزگى ىستەردى قولعا العانىن ايتىپ ءوتۋىمىز كەرەك. ماسەلەن, ۇلىستىڭ ۇلى كۇنى قارساڭىندا گازەت رەداكتسياسىنىڭ مۇرىندىق بولۋىمەن تاراز قالاسىنداعى ء«ۇمىت» مامانداندىرىلعان بوبەكتەر ءۇيىنىڭ قامقورلىعىنداعى جەتى بالانىڭ تۇساۋى كەسىلدى.
مەرەكە قارساڭىندا بالدىرعاندارعا قۋانىش سىيلاۋ ماقساتىندا اتالمىش شارا قولعا الىنىپ, وبلىس ءباسپاسوزىنىڭ قارا شاڭىراعىندا تۇڭعىش رەت اتا داستۇرىمىزگە ساي تۇساۋكەسەر ءراسىمى ءوتىپ وتىر. وندا ەسىمى ەلگە تانىمال, ءوز سالاسىندا جەتىستىككە جەتىپ, ابىروي-بەدەلگە يە بولعان ازاماتتار تاعدىردىڭ جازۋىمەن اتا-انانىڭ قامقورلىعىنان شەت قالعان سابيلەردىڭ تۇساۋىن كەسىپ, الداعى ومىرلەرىنە اق جول تىلەدى.
يگى شارانى «Aq jol» گازەتىنىڭ ديرەكتور-باس رەداكتورى قۋات اۋەسباي اشىپ, شارانىڭ ءمان-ماڭىزىن ءتۇسىندىرىپ ءوتتى.
– ۇلىستىڭ ۇلى كۇنىنىڭ قارساڭىندا رەداكتسيانىڭ باستاماسىمەن قولعا الىنعان «ناۋرىز – ىزگىلىك ايى» اكتسياسىنىڭ جالعاسى رەتىندە تۇساۋكەسەر شاراسىن وتكىزىپ وتىرمىز. ونداعى ماقساتىمىزدىڭ ءبىرى اتا-انانىڭ ايالى الاقانىنىڭ جىلۋىن سەزىنبەي وسكەن بالالارعا قۋانىش سىيلاۋ بولسا, ەكىنشىسى ولارعا ەلىمىزدىڭ, وبلىسىمىزدىڭ دامۋىنا ەلەۋلى ۇلەس قوسقان, ەڭبەگىمەن بيىكتەردى باعىندىرعان ازاماتتاردىڭ جولىن بەرسىن, سولاردىڭ ءىزىن باسسىن دەگەن نيەت ەدى. الداعى ۋاقىتتا بۇل باستاما جالعاسىن تاۋىپ, ءداستۇرلى تۇردە وتەدى دەگەن نيەتىمىز بار, – دەدى قۋات اۋەسباي ۇلى.
شارادا اۋەلى توقساننىڭ تورىنە شىققان ارداگەر جۋرناليست, وبلىستىڭ اعا باسىلىمىن جيىرما جىل باسقارعان قارىمدى قالامگەر باتتال جاڭاباەۆ بۇلدىرشىندەرگە باتاسىن بەرىپ, اتالىق اق تىلەگىن ارنادى.
– حالقىنا ادال قىزمەت ەتەتىن, قاناتى تالمايتىن سۇڭقار, تۇياعى مۇقالمايتىن تۇلپار بولىڭدار! ومىرلەرىڭ قۋاتتى, ءار كۇندەرىڭ شۋاقتى بولۋىن تىلەيمىن. ومىردە نە تىلەسەڭدەر دە قابىل بولىپ, ەلىڭنىڭ ەلەۋلى, حالقىڭنىڭ قالاۋلى ۇل-قىزدارىنا اينالىڭدار! تۋعان جەرلەرىڭنىڭ بەتكەۇستارلارى دەگەندە سەندەردىڭ اتتارىڭ اتالىپ, جۇرت سەندەرمەن ماقتاناتىنداي ابىرويعا يە بولىڭدار! – دەپ باتاسىن بەردى باتتال جاڭاباي ۇلى.
سونداي-اق ەلىمىزگە بەلگىلى جازۋشى, «جامبىل» رەسپۋبليكالىق جۋرنالىنىڭ باس رەداكتورى, حالىقارالىق «الاش» ادەبي سىيلىعىنىڭ لاۋرەاتى نەسىپبەك ءداۋتاي ۇلى, وبلىستىق «زناميا ترۋدا» گازەتىنىڭ ديرەكتور-باس رەداكتورى بەكەت مومىنقۇل, «JAMBYL» تەلەارناسىنىڭ ديرەكتورى جاسۇلان ابدىحالىق, تاراز قالاسىنىڭ جانە بايزاق اۋدانىنىڭ قۇرمەتتى ازاماتى وڭلاسىن ەسىركەپوۆ, وبلىستىق ارداگەرلەر كەڭەسى توراعاسىنىڭ ورىنباسارى سانسىزباي جورابەكوۆ, «سالىق ءتارتىبى» گازەتىنىڭ باس رەداكتورى عالىم قاساباي اقجارما تىلەكتەرىن ايتىپ, بۇلدىرشىندەردىڭ تۇساۋىن كەستى. قادامدارىنىڭ قۇتتى بولۋىن تىلەپ, ءومىر اتتى ۇزاق جولدا سۇرىنبەي, اق جولدان اداسپاۋلارىنا تىلەكتەستىك ءبىلدىردى.
«Jambyl-Taraz» گازەتى ديرەكتورىنىڭ مىندەتىن اتقارۋشى ەرمان ابديەۆ, «اراي» گازەتىنىڭ جاۋاپتى حاتشىسى جاسۇلان سەيىلحان بالدىرعاندارعا بارشا جاقسى نيەتتەرىن ارنادى. ءوز كەزەگىندە قر ەڭبەك سىڭىرگەن قايراتكەرى اسىلحان شۇڭىرەكوۆ بۇلدىرشىندەرگە تىلەگىن ءان شاشۋىمەن جەتكىزدى.
شارا سوڭىندا ء«ۇمىت» مامانداندىرىلعان بوبەكتەر ءۇيىنىڭ قىزمەتكەرلەرى وسىنداي يگى شارانى قولعا الىپ, وتكىزىپ وتىرعان «Aq jol» گازەتىنىڭ رەداكتسياسىنا العىستارىن ءبىلدىردى.
– ءاز ناۋرىزدىڭ قارساڭىندا وتكىزىلىپ وتىرعان بۇل تۇساۋكەسەر ءراسىمى بارلىعىمىز ءۇشىن ەستە قالار شارا بولدى. ارينە, قازاق بالاسىنىڭ تۇساۋىن كەز كەلگەن ادامعا كەستىرمەگەن. بۇل رەتتە, بوبەكتەر ءۇيى تاربيەلەنۋشىلەرىنىڭ تۇساۋىن وبلىسىمىزعا بەلگىلى, ەڭبەگىمەن ەلىنە ەلەنگەن ازاماتتار كەسىپ وتىر. ءبىز دە بالدىرعانداردىڭ وسى اتالارىنا ۇقساپ, حالقىنا قالتقىسىز قىزمەت ەتەتىن ابىرويلى ازاماتتار بولىپ ءوسسىن دەپ تىلەيمىز. وسى ورايدا, يگى ىسكە مۇرىندىق بولىپ, ۇيىمداستىرعان باسىلىم ۇجىمىنا العىسىمىز شەكسىز, – دەدى بوبەكتەر ءۇيىنىڭ ادىسكەرى التىنشاش الىشەري.
مۇراتحان ءالىمحان
