ە. ءبىرتانوۆتىڭ ايتۋىنشا, 2017 جىلى مينيسترلىك مەملەكەتتىك باعدارلامانىڭ 7 باعىتىنا نەگىزدەلگەن «دەنساۋلىق ساقتاۋ سالاسىن جاڭعىرتۋ» 6 جوباسىن ىسكە اسىرا باستادى. وسىلايشا, مەملەكەتتىك باعدارلامانىڭ شارالارى جوبالىق باسقارۋ قاعيدالارى بويىنشا جۇزەگە اسىرىلادى.
جوبالىق باسقارۋ كورسەتكىشتەرى اياسىندا «ەڭبەك ونىمدىلىگىن ارتتىرۋ» ينديكاتورىنان باسقا 4 كورسەتكىشكە قول جەتكىزىلدى. مەملەكەتتىك باعدارلامانىڭ 2017 جىلعا جوسپارلانعان 123 ءىس-شاراسىنىڭ 122-ءسى ورىندالدى, تەك 1-ءۋى ورىندالعان جوق.
قوعامدىق دەنساۋلىق ساقتاۋدى دامىتۋدىڭ ءبىرىنشى باعىتىن ىسكە اسىرۋ اياسىندا 24 شارا ورىندالدى. قىزمەتتىڭ ينستيتۋتسيونالدىق نەگىزى قۇرىلدى, حالىقارالىق سەرىكتەستەرمەن بىرلەسىپ ازىرلەنگەن جول كارتاسى ىسكە اسىرىلىپ جاتىر. قوعامدىق دەنساۋلىق ساقتاۋ بويىنشا نەگىزگى جۇمىس ەڭ الدىمەن سوزىلمالى ينفەكتسيالىق ەمەس اۋرۋلاردىڭ پروفيلاكتيكاسىنا جانە حالىق اراسىندا سالاۋاتتى ءومىر سالتىن ناسيحاتتاۋعا باعىتتالعان. بالالاردىڭ دەنساۋلىعىن ساقتاۋدى ساباقتاستىرۋ ءۇشىن مەكتەپ مەديتسيناسى ءبىلىم بەرۋ جۇيەسىنەن دەنساۋلىق ساقتاۋ جۇيەسىنە بەرىلدى, سونىمەن بىرگە مەكتەپتە تاماقتاندىرۋدىڭ بىرىڭعاي ستاندارتتارى مەن سۋيتسيدتەردىڭ الدىن الۋ باعدارلاماسى ەنگىزىلۋدە.
دەنساۋلىق ساقتاۋدىڭ بارلىق قىزمەتتەرىن ينتەگراتسيالاۋ بويىنشا ەكىنشى باعىت اياسىندا مەديتسينالىق-سانيتاريالىق العاشقى كومەككە قولجەتىمدىلىكتى قامتاماسىز ەتۋ جونىندەگى ءىس-شارالار ورىندالدى. اتالعان شارالار انا, نارەستە ءولىمى مەن ەلىمىز بويىنشا جالپى قاتەرلى ىسىكتەردەن بولاتىن ءولىمدى تومەندەتۋگە مۇمكىندىك بەردى.
«100 ناقتى قادام» ۇلت جوسپارىنىڭ 82-قادامىنا سايكەس ءۇشىنشى باعىت بويىنشا مىندەتى جاڭا ستاندارتتاردى, سونداي-اق مەديتسينالىق كومەك كورسەتۋ تەحنولوگيالارىن بەكىتۋ جانە ەنگىزۋ بولىپ تابىلاتىن ساپا جونىندەگى بىرىككەن كوميسسيا قۇرىلدى. ەلەكتروندىق فورماتتا كورسەتۋ ارقىلى مەملەكەتتىك قىزمەتتەردىڭ قولجەتىمدىلىگى مەن ىڭعايلى بولۋىن ارتتىرۋ جۇمىستارى جۇرگىزىلۋدە. جۇرگىزىلگەن ءىس-شارالاردىڭ ناتيجەسىندە حالىقتىڭ مەديتسينالىق كومەكپەن قاناعاتتانۋ دەڭگەيىنىڭ نىسانالى ينديكاتورى 46%-كە دەيىن ءوستى.
ءتورتىنشى باعىت اياسىندا دارىلىك زاتتاردىڭ قولجەتىمدىلىگىن, ساپاسى مەن قاۋىپسىزدىگىن ارتتىرۋ كوزدەلگەن. مەملەكەت باسشىسىنىڭ تاپسىرماسى بويىنشا بارلىق دارىلىك زاتتارعا ارنالعان باعالاردى رەتتەۋ تۋرالى زاڭ جوباسى ازىرلەنىپ, پارلامەنتكە ەنگىزىلدى. 2017 جىلى وتاندىق تاۋار وندىرۋشىلەرمەن 25 جاڭا ۇزاق مەرزىمدى شارت جاسالدى. بۇل زاتتاي مانىندە وتاندىق تاۋار وندىرۋشىلەردەن دارىلىك زاتتاردى ساتىپ الۋ ۇلەسىن 48%-كە دەيىن ۇلعايتۋعا مۇمكىندىك بەردى. ءوتو كولەمىنىڭ ءوسۋى 33%-ءتى قۇرادى نەمەسە اقشالاي مانىندە 45 ملرد تەڭگەنى قۇرادى.
نورماتيۆتىك-قۇقىقتىق بازانى جەتىلدىرۋ جانە ساتىپ الۋدىڭ اشىقتىعىن قامتاماسىز ەتۋ 18,2 ملرد تەڭگەنى ۇنەمدەۋگە مۇمكىندىك بەردى, ولار دارىلىك زاتتاردى قوسىمشا ساتىپ الۋعا جىبەرىلدى. جۇرگىزىلگەن ءىس-شارالار فارماتسەۆتيكالىق ونەركاسىپتىڭ فيزيكالىق كولەمىنىڭ يندەكسىن 43%-كە ارتتىرۋعا جول اشتى.
بەسىنشى باعىت اياسىندا مىندەتتى الەۋمەتتىك مەديتسينالىق ساقتاندىرۋدى ەنگىزۋگە دايىندىق جۇرگىزىلۋدە. 2017 جىلى تاۋەكەلدەرگە تالداۋ جۇرگىزىلدى جانە ءوزىن-ءوزى جۇمىسپەن قامتىعان حالىق سانىنىڭ جوعارى بولۋىنا بايلانىستى ءمامس-تى ەنگىزۋ مەرزىمدەرى اۋىستىرىلدى.
التىنشى باعىت — بۇل ادامي رەسۋرستاردى باسقارۋ تيىمدىلىگى. پەدياترلار, اكۋشەر-گينەكولوگتاردى جانە باسقا دا قاجەتتى ماماندىقتار بويىنشا پراكتيكاعا جىبەرۋ شارتتارىنىڭ وزگەرتىلۋى ەسەبىنەن دارىگەر ماماندار تاپشىلىعى تومەندەتىلدى. مەديتسينالىق جوعارى وقۋ ورىندارىنىڭ جەتەكشى شەتەلدىك ۋنيۆەرسيتەتتەرىمەن ستراتەگيالىق ارىپتەستىگى ارقىلى مەديتسينالىق ءبىلىمدى جاڭارتۋ باستالدى. ۋنيۆەرسيتەتتىك كلينيكا مودەلى ازىرلەندى جانە مەديتسينالىق ۇيىمدار ۋنيۆەرسيتەتتەردىڭ قۇرامىنا بىرىكتىرىلگەن.
جەتىنشى باعىت اياسىندا دەنساۋلىق ساقتاۋدىڭ ينفراقۇرىلىمىن ودان ءارى دامىتۋ ماقساتىندا مەملەكەتتىك-جەكەشەلىك ارىپتەستىك جانە زاماناۋي اقپاراتتىق-كوممۋنيكاتسيالىق تەحنولوگيالار نەگىزىندە دەنساۋلىق ساقتاۋ ۇيىمدارى جەلىسىنىڭ جاڭا مەملەكەتتىك ءنورماتيۆى بەكىتىلدى. وسى جىلى بىرىڭعاي پەرسپەكتيۆالىق جوسپار بەكىتىلەدى. دەنساۋلىق ساقتاۋدى تسيفرلىق جاڭارتۋ ماقساتىندا 4 وڭىردە (قاراعاندى, اقمولا, قوستاناي جانە باتىس قازاقستان وبلىستارى) مەديتسينالىق قۇجاتتاردى پيلوتتىق قاعازسىز جۇرگىزۋ ىسكە قوسىلدى, مەديتسينالىق ۇيىمداردى اقپاراتتىق جۇيەلەرمەن قامتۋ 75,5% قۇرادى, كومپيۋتەرلەرمەن جاراقتاندىرۋ 2,5 ەسە ارتتى. 56% مەديتسينالىق ۇيىمداردا ينتەرنەت قولجەتىمدى.
«جالپى مەملەكەتتىك باعدارلامانىڭ 35 كورسەتكىشىنىڭ 30-ى ورىندالدى, 5 – ورىندالعان جوق, ونىڭ ىشىندە 1-ءى ءمامس ەنگىزۋ مەرزىمىنىڭ اۋىسۋىنا بايلانىستى ورىندالمادى. جالپى ءولىم جانە انا ءولىمىنىڭ كورسەتكىشتەرى بويىنشا جاقسارۋ بايقالىپ وتىر», — دەپ قورىتىندىلادى ە. ءبىرتانوۆ.
