سيۋجەت جەلىسى 2010 جىلى 22 ماۋسىمدا اقتاۋ قالاسىنداعى قاتاڭ تارتىپتەگى تۇرمەدەن قاشپاق بولعان 21 جازاسىن وتەۋشىگە ءبىر ءوزى قارسى تۇرىپ, ەرەن ەرلىك كورسەتكەن ۇلتتىق ۇلاننىڭ جاۋىنگەرى ەربول وتارباەۆتىڭ جاۋىنگەرلىك جانە ازاماتتىق ەرلىگىنە, قايسارلىعىنا قۇرىلعان. سول قيىن كۇنى اقتاۋ قالاسىنداعى تۇزەۋ مەكەمەسىن كۇزەتۋ بويىنشا قاراۋىل قىزمەتىندە تۇرعان جاس جاۋىنگەر كەۋدەسىن وققا توسەپ, قىلمىسكەرلەردىڭ جولىنا جالعىز ءوزى توسقاۋىل قويا ءبىلدى. ءدۇيىم ەلدىڭ ءسۇيسىنىسىن تۋعىزعان ەرلىك يەسى ەربول وسى جانقيارلىق ەرلىگى ءۇشىن مەملەكەت باسشىسىنىڭ جارلىعىمەن ءىى دارەجەلى «ايبىن» وردەنىمەن ماراپاتتالعان بولاتىن. بۇگىندە ەربول وتارباەۆ – ۇلتتىق ۇلاننىڭ وفيتسەرى. ەربول سىندى ەردىڭ ەرلىگىن دارىپتەۋمەن بىرگە, لاڭكەستىك پەن ەكسترەميزمنىڭ الدىن الۋعا شاقىراتىن, راديكالدى ءداستۇرلى ەمەس ءدىني اعىمداردى ناسيحاتتاۋعا قارسى قۇرال بولىپ تابىلاتىن جانە جاس ۇرپاقتى قايسارلىققا, وتانسۇيگىشتىككە باۋليتىن جوبانىڭ جابىق كورسەتىلىمى اقتاۋ قالاسىندا ءوتتى.
تۇساۋكەسەرگە ماڭعىستاۋ وبلىسى مەن اقتاۋ قالاسى اكىمدىگىنىڭ باسقارما باسشىلارى, اقتاۋ گارنيزونىنىڭ كومانديرلەرى, قۇقىق قورعاۋ ورگاندارىنىڭ باسشىلارى, جۋرناليستەر, قوعام قايراتكەرلەرى, ىشكى ىستەر ورگاندارى مەن ۇلتتىق ۇلان ارداگەرلەرى, شوۋ-بيزنەس وكىلدەرى شاقىرىلدى.
ءفيلمنىڭ قويۋشى رەجيسسەرى سەرىكبول وتەپبەرگەنوۆ بولىپ تابىلاتىن كوركەم فيلمدە باستى رولدەردى اكتەرلار سانۇرجان سۇلەيمەنوۆ, جاسۇلان ومىربەك, سەرىك سالقىنباەۆ, ەربولات توعىزاقوۆ, سايات يسەمباەۆ, قاجىمۇقان كاليمبەتوۆ, جاندوس جۇماگۇلوۆ, ارمات سمايىلوۆ, باۋىرجان بالعاباەۆ, گۇلنارا بايبوسىنوۆا جانە باسقالارى سومدايدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
