قارعىن سۋدىڭ قانداي زارداپ اكەلەتىنىن اۋزى كۇيگەن قاراعاندى ءوڭىرى جاقسى بىلەدى. وسىدان ءتورت جىل بۇرىنعى سۋ تاسقىنىنان بوگەن بۇزىلىپ, كوكپەكتى اۋىلىن سۋ باسقانى ەستە. سول توتەنشە وقيعا كەزىندە ونداعان ءۇيدىڭ ويرانى شىعىپ, ءتىپتى ادام شىعىنى دا بولعان ەدى. ءبىر عانا كوكپەكتى ەمەس, ءوڭىردىڭ تالاي ەلدى مەكەنى كەيىنگى جىلدارى قىزىل سۋدىڭ زاردابىن تارتۋداي-اق تارتىپ كەلەدى. ونىڭ ۇستىنە, شىعىس قازاقستان وبلىسىنداعى اپاتتى جاعدايدىڭ ارقا جۇرتىنا قازىردىڭ وزىندە ءىش تارتتىرعان جايى بار.
ءيا, اپات ايتىپ كەلمەيدى. مۇنىڭ الدىن الاتىن ءبىر عانا امال بار, ول – قانداي دا قاۋىپ-قاتەرگە بەس قارۋىڭدى تۇگەل سايلاپ, ساقاداي-ساي وتىرۋ بولسا كەرەك.
تاياۋدا, ءوڭىر باسشىسى ەرلان قوشانوۆتىڭ تاپسىرماسىمەن قاراعاندى وبلىسىنىڭ بۇقار جىراۋ اۋدانىندا وتكەن «كوكتەم-2018» اتتى رەسپۋبليكالىق كوماندالىق-شتابتىق وقۋ-جاتتىعۋ جيىنىنىڭ ءدال وسى سيپاتتاعى ماقساتتى كوزدەگەنى بەلگىلى ەدى. كەڭ اۋقىمدا ۇيىمداستىرىلعان اتالعان شاراعا تجد جانە ونىڭ اۋماقتىق بولىمشەلەرى, ازاماتتىق قورعاۋ مەملەكەتتىك جۇيەسىنىڭ باسقارۋ ورگاندارى, ۇلتتىق ۇلان, «ورتالىق» وڭىرلىك قولباسشىلىعىنىڭ №52859 اسكەري ءبولىمى, №55524 اسكەري ءبولىمى, «استانا» وڭىرلىك قولباسشىلىعى شتابىنىڭ قىزمەتكەرلەرى اتسالىستى. ۇزىن سانى 200-دەن استام ادام قاتىستىرىلىپ, 52 دانا تەحنيكا بىرلىگى جۇمىلدىرىلدى.
كوماندالىق-شتابتىق وقۋ-جاتتىعۋى بارىسىندا بۇقار جىراۋ اۋدانىنىڭ سامارقان اۋىلدىق وكرۋگىنە قاراستى چكالوۆو سەلوسى ماڭىندا سۋ تاسقىنى قاۋپى تۋرالى دابىل قاعىلىپ, ەۆاكۋا-
تسيا جاريالانىپ, وبلىستاعى شۇعىل ارەكەت ەتۋ جاساعى قۇرىلىمدارىنىڭ دايىندىعى جان-جاقتى تەكسەرۋدەن ءوتتى.
وقۋ-جاتتىعۋ بولعان جەردىڭ دە دۇرىس تاڭدالعانىن ايتا كەتۋ كەرەك. سامارقان سەلولىق وكرۋگىنە قاراستى چكالوۆو اۋىلى كوكتەمدە اشۋعا مىنەتىن نۇرا وزەنىنىڭ قۇقايىن تالاي كورگەن ەلدى مەكەن. ءوزى تەمىرتاۋدىڭ ىرگەسىندە ورنالاسقان, قالامەن اراسى ەكى-اق شاقىرىم جەر. ءدال سونداي قاشىقتىقتا اتاقتى سامارقان سۋ قويماسى جاتىر. سوندىقتان كوكتەم تۋا چكالوۆو اۋىلىنىڭ توڭىرەگىندەگى احۋال وبلىستىق توتەنشە جاعدايلار دەپارتامەنتى, تەمىرتاۋ قالاسى مەن بۇقار جىراۋ اۋدانى اكىمدىكتەرىن قاتتى الاڭداتادى.
بىلتىر نۇرا تاسىعاندا, سۋ اتالعان اۋىلعا دەيىن جەتىپ, جۇرتتى ابىگەرگە سالعان بولاتىن. مىنە بيىلعى وقۋ-جاتتىعۋ كەزىندە وزەن سۋى بوي بەرمەگەن تۇسقا ىشىنە قۇم تولتىرىلعان قاپتاردان قامال تۇرعىزىلدى. تۋرا سول جەرگە جيىنعا قاتىسۋشىلار شاتىر تىگىپ, تەحنيكالار دا قاز-قاتار ءتىزىلدى.
جەرگىلىكتى اكىمدىكتەگىلەردىڭ ايتۋىنشا, بيىل چكالوۆو مەن سادوۆوە اۋىلدارىنداعى جاعداي جۇرتتى قاتتى مازاسىزداندىرىپ وتىر. سوندىقتان دا بارلىق كۇش وسى ماڭعا توپتاستىرىلدى. جەرگىلىكتى اكىمدىك قىزمەتكەرلەرى سۋ سورعىش موتوپومپالار ساتىپ الىپ, قۇتقارۋ جەيدەشەلەرى جانە كۆادراكوپەرلەرمەن قارۋلانعان. ءتىپتى جاتتىعۋ كەزىندە اسپاندا تىنىمسىز ۇشىپ جۇرگەن درونداردى دا كوردىك. سۋ تاسي قالعان جاعدايدا بۇل ۇشاتىن قۇرىلعىلار ۇشتى-كۇيلى جوعالىپ كەتپەي, كوكتە قالىقتاپ جۇرەر بولسا, ارينە, كوپ كومەگىن تيگىزەرى ءسوزسىز.
نۇرانىڭ جاعالاۋىنا تىگىلگەن شاتىرلاردىڭ ورتا تۇسىنا تامان كوشپەلى مەديتسينالىق بەكەت قويىلدى. تاسقىن بولا قالعان جاعدايدا ءتۇرلى جاراقات العان تۇرعىندار وسى جەردە العاشقى كومەككە قول جەتكىزە الادى. ءتىپتى مۇندا پسيحولوگيالىق كومەك كورسەتەتىن جەكە شاتىر دا تىگىلدى. ىشىنە كىرسەڭىز, بەينە كونتسەليارلىق تاۋار ساتاتىن دۇڭگىرشەك دەرسىز. ءتۇرلى-ءتۇستى قارىنداشتار, اق-قارا ءتۇستى سۋرەتتەر, جۇمساق ويىنشىقتار. سويتسەك مۇنىڭ ءبارى زارداپ شەككەن ادامنىڭ كوڭىل-كۇيى مەن پسيحولوگيالىق جاعدايىنا وڭ اسەرىن تيگىزەتىن زاتتار ەكەن. ودان ءارى شارۋاشىلىق جابدىقتالىم مەن دالا اسحاناسى ورىن تەپكەن. توتەنشە جاعداي كەزىندە ۇيلەرىن تاستاپ شىعاتىن تۇرعىنداردى اس-اۋقاتپەن قامتاماسىز ەتۋ دە ماڭىزى زور مىندەتتىڭ ءبىرى.
وقۋ-جاتتىعۋ جيىنىنىڭ ەڭ قىزىقتى جەرى تەمىرتاۋداعى ەسكى قالا تۇسىنان وتەتىن نۇرانىڭ مۇزىن جارىلعىش زات ارقىلى قوپارۋ بولدى. قۋاتتى جارىلىستان كەيىن وزەننىڭ مۇزى كوككە ۇشىپ, قۇرساۋدان بوساعان قارا سۋ ارنا بويلاي جوڭكىلە جونەلدى. جاتتىعۋ جوسپارىنا ساي, ادامداردى قۇتقارۋ وپەراتسياسى باستالدى دا كەتتى. قۇتقارۋشىلار ەكى جاعالاۋدىڭ اراسىنا ارقان تارتىپ, سونى بويلاي ۇرىلگەن قايىقتارمەن ءجۇزىپ, «سۋعا كەتكەندەردى» بىرىنەن سوڭ ءبىرىن قۇتقارا باستادى. قۇتقارىلعانداردى جاعالاۋدا العاشقى كومەك كورسەتۋگە ءتيىس مەديتسينا قىزمەتكەرلەرى كۇتىپ الىپ جاتتى. ءبىر قاراعاندا, بارلىق قىزمەت تۇرلەرى ۇيلەسىم تاۋىپ, ۇيىمداسا ارەكەت ەتىپ جاتتى. تەك, جاتتىعۋدا عانا ەمەس, قاۋىپ تونگەن سىن ساعاتتاردا دا ءدال وسىلاي ءبىر جاعادان – باس, ءبىر جەڭنەن قول شىعارا قيمىلداسا عوي, شىركىن, دەيسىڭ.
وقۋ-جاتتىعۋدىڭ سوڭىنا تامان وبلىس اكىمىنىڭ ورىنباسارى اناتولي شكارۋپا باستاعان تەكسەرۋشىلەر سامارقان سۋ قويماسىنا بارىپ, اۋا رايىن بولجاۋشىلار, اكىمدىك وكىلدەرى جانە توتەنشە جاعدايلار مەكەمەسىنىڭ قىزمەتكەرلەرىنىڭ باسىن جيىپ, شۇعىل كەڭەس وتكىزدى.
– قالاي بولعان كۇندە دە ءبىز ەڭ قاۋىپتىسىنە دايىن بولۋىمىز كەرەك, – دەدى وبلىس اكىمىنىڭ ورىنباسارى. – سوندىقتان تاسقىن كەزىندە بولۋى مۇمكىن ستسەناريدىڭ بارلىعىن تارازىعا تارتۋىمىز كەرەك. تابيعاتتىڭ مىنەزىن تاپ باسۋ مۇمكىن ەمەس. ءبىزدىڭ مىندەت – اپاتتى جاعدايدىڭ شەكتەن شىعۋىنا جول بەرمەۋ.
ا.شكارۋپا ءسوزىنىڭ جانى بار. اپات بولماۋى ءۇشىن, ەڭ الدىمەن, قارعىن سۋدىڭ الدىنا توسقاۋىل قويۋ قاجەت. سۋ قويمالارىنداعى جاعدايدى كۇندىز-ءتۇنى قىراعى باقىلاۋعا الۋ دا ەڭ ءبىرىنشى كەزەكتەگى مىندەت. ءبىر سوزبەن ايتقاندا, ءتىلسىز جاۋدى تياناقتى ازىرلىكپەن عانا قۇرىقتاۋعا بولادى. وتكەننەن ساباق الۋدىڭ ءوزى – كەزىندە وپىق جەگىزگەن كەمشىلىكتەردىڭ كوزىن جويۋ ەمەس پە؟!
بيىل قاراعاندى وبلىسىندا كوكتەمگى سۋ تاسقىنىنىڭ الدىن الۋ شارالارىنا بيۋدجەتتەن 2 ملرد 250 ملن تەڭگە قاراستىرىلعان. بۇل قاراجات سۋ تاسۋ قاۋپى بار وزەندەردى تازارتۋعا, ولاردىڭ ارنالارىن تۇزەۋگە, بوگەندەر تۇرعىزۋعا جانە باسقا دا قاجەتتى جۇمىستاردى اتقارۋعا جۇمسالماق.
قايرات ءابىلدا,
«ەگەمەن قازاقستان»
قاراعاندى وبلىسى
