قازاقستان – اۋماعى بويىنشا الەمدەگى توعىزىنشى ەل. وندا كوپتەگەن ەتنوستاردىڭ تاتۋ-ءتاتتى ءومىر ءسۇرىپ جاتقانى, ءتۇرلى كونفەسسيالاردىڭ ءوزارا تۇسىنىستىك تانىتىپ وتىرعانى تالايلاردى قىزىقتىرادى.
ن.نازارباەۆ ناۋرىز ايىنىڭ باسىندا ۇسىنعان بەس الەۋمەتتىك باستاماسىندا اتاپ كورسەتىلگەن باعىتتار مەن ناقتى مىندەتتەردى جوعارى باعالايمىن.
بۇل باستامالار بويىنشا مەملەكەت حالىققا ءتيىمدى نەسيە بەرۋدى قالايدى, تومەن جالاقىعا سالىق جۇكتەمەسىن 10-نان 1 پايىزعا دەيىن قىسقارتۋدى كوزدەيدى. سونداي-اق جوعارى ءبىلىم العىسى كەلەتىن جاستارعا بۇعان دەيىن ءبولىنىپ كەلگەن 54 مىڭ گرانتقا 2018-2019 وقۋ جىلىندا قوسىمشا 20 مىڭ گرانت بەرۋ جوسپارلانۋدا. بۇل جاستاردىڭ ساپالى ءبىلىم الۋىنا قولجەتىمدىلىكتى قامتاماسىز ەتەتىن بولادى. نۇرسۇلتان نازارباەۆ اتاپ وتكەندەي, جاستار باسىمدىققا يە بولۋى كەرەك.
سونداي-اق ميكرونەسيەلەۋ كولەمىن بيىلعى جىلى 62 ملرد تەڭگەگە (193,4 ملن اقش دوللارى) ۇلعايتۋ ۇسىنىلىپ, كاسىپكەرلىكتى جانداندىرۋعا باسا نازار اۋدارىلماق. بۇل جاڭا جۇمىس ورىندارىن كوپتەپ قۇرۋعا جول اشادى.
پرەزيدەنتتىڭ قىزىلوردا وبلىسىنان جەزقازعان, قاراعاندى جانە تەمىرتاۋ قالالارى ارقىلى استاناعا ءىرى گاز قۇبىرىن تارتۋ ارقىلى 2,7 ملن ادامعا گاز يگىلىگىن كورسەتۋگە قاتىستى تاپسىرما بەرۋى دە حالىققا جاسالعان شىنايى قولداۋ بولدى.
مەن ءوزىمدى ءاردايىم قازاق حالقىنىڭ دوسى سانايمىن. قازاقتار – ۇلكەن قۇرمەتكە لايىق تاماشا حالىق.
مەن پرەزيدەنت ن.نازارباەۆتى سەمەي يادرولىق سىناق الاڭىن جاۋىپ, الەمگە ۇلگى كورسەتكەنى جانە يادرولىق قاۋىپسىز الەم قۇرۋ جونىندەگى باتىل باستامالارى ءۇشىن, سونداي-اق سيريادا بەيبىتشىلىك ورناتۋداعى بەلسەندى قىزمەتى ءۇشىن قۇرمەتتەيمىن.
تۋرە ناەرلاند,
حالىقارالىق «Bike for Peace» ۇەۇ توراعاسى (نورۆەگيا)
