شىندىعىندا, ءبىزدىڭ ەلدىڭ شيكىزات قورى مول ەكەنى ءمالىم. ەلىمىز تاۋەلسىزدىك العالى بەرى گاز ءوندىرۋ 6 ەسەدەن اسا ءوستى, بۇل كورسەتكىش ارتا بەرەتىندىگى دە كۇدىك تۋدىرمايدى. ال گازداندىرۋ تەك 50 پايىزعا عانا جەتتى. ەلباسىنىڭ ءوزى ورتالىق جانە سولتۇستىك وبلىستاردىڭ ءالى دە گازسىز وتىرعاندىعىن اتاپ ءوتتى. بۇل ولقىلىقتىڭ ورنىن تولتىرۋ ءۇشىن پرەزيدەنت قاراوزەك – جەزقازعان – قاراعاندى – تەمىرتاۋ – استانا باعىتىمەن ماگيسترالدى گاز قۇبىرىن تارتۋ تۋرالى باستاما كوتەرىپ وتىر. بۇل – جاڭا جۇمىس ورىندارىنىڭ اشىلۋىنا, كاسىپكەرلىكتىڭ وركەندەۋىنە دە ىقپال ەتەتىن جوبا. ەندى كوگىلدىر وتىننىڭ ءبىزدىڭ كوكشەتاۋ قالاسىنا دا جەتەتىندىگىنە ءشۇبا كەلتىرمەيمىن.
ەلدى گازداندىرۋدىڭ ەكولوگيالىق ماڭىزدىلىعىنا دا ەرەكشە توقتالعان ابزال. گازبەن جىلىتۋ جۇيەسىنە كوشۋ قالالار مەن ەلدى مەكەندەردى ارتىق لاستانۋدان قۇتقارادى. پرەزيدەنتتىڭ ايتۋىنشا, تەك استانانىڭ وزىندە اۋاداعى زياندى قالدىقتار 6 ەسەگە ازايعالى وتىر.
گازداندىرۋ اۋىلدان ۇدەرە كوشۋشىلەرگە دە تەجەۋ بولىپ, ەلدى مەكەندەردە اگرووندىرىستىك كەشەندى دامىتۋ باعدارلاماسى بويىنشا ازىق-ت ۇلىك قاۋىپسىزدىگىن قامتاماسىز ەتۋگە دە ىقپالىن تيگىزەرى ءسوزسىز.
ءبىر سوزبەن ايتقاندا, پرەزيدەنتتىڭ بەس الەۋمەتتىك باستاماسى الەۋمەتتىك مەملەكەتتى قالىپتاستىرۋعا جانە قازاقستان حالقىنىڭ ءال-اۋقاتىن ارتتىرۋعا باعىتتالعان ۇلكەن قادام دەپ ەسەپتەيمىن.
ءابىلجان حۇسايىنوۆ,
اقمولا وبلىسىنىڭ قوعامدىق كەڭەس مۇشەسى, «اۋىل» حدپپ» قب اقمولا وبلىسى بويىنشا توراعاسى
كوكشەتاۋ
