ءتالىمى مول القالى باسقوسۋدى قازاقستان رەسپۋبليكاسىنىڭ ەڭبەك سىڭىرگەن قايراتكەرى داۋلەتكەرەي كاپ ۇلى جۇرگىزىپ وتىردى. جيىندا پارلامەنت ءماجىلىسىنىڭ دەپۋتاتى اباي تاسبولاتوۆ, قازاقستان كومپوزيتورلار وداعىنىڭ ءتورايىمى بالنۇر قىدىربەك, بەلگىلى سازگەر جولامان تۇرسىنباەۆ, فيلولوگيا عىلىمدارىنىڭ دوكتورلارى كۇلاش احمەت, سەرىك نەگيموۆ, حالىقارالىق ماناسشىلار كونكۋرسىنىڭ جەڭىمپازى بايانعالي ءالىمجانوۆ, تانىمال ءانشى سەرىك وسپانوۆ تاعى باسقا شەشەندەر سال-سەرىلەردىڭ سەركەسىنىڭ ءومىرى مەن شىعارماشىلىعىن, ارقادا اتى شىققان ءدۇلدۇل ونەرپازدار ىشىندە الار ورنىنىڭ ايشىقتىعىن جان-جاقتى سارالاپ بەردى.
كونفەرەنتسيادا داۋلەتكەرەي «سەگىز سەرى بايىپ باتقان كۇندەي شاپاعى ءالى كۇنگە ەل-جۇرتىنىڭ جۇرەگىنە نۇرىن قۇيىپ تۇرعانى ايداي الەمگە ايقىن. ارينە, سەگىز سەرىنى اسپانداتىپ جىبەرەمىز دەپ جەرباۋىرلاتىپ العان كەيبىر اۆتورلارىمىز دا بولدى. ەندىگى كەزەكتە اتىن ۇلىقتايمىز دەپ تىرتىق قىلا جازداعانىمىزدى ەسكەرىپ, ءبىر ادامنىڭ بويىنا شاق ونەرىن, تاماشا قولتاڭبالى اندەرىن عانا ناسيحاتتاپ, بارىمەن بازارلاي بىلەيىك» دەپ اعىنان جارىلسا, ب. ءالىمجانوۆ سەگىز سەرى مۇراسى دەپ جۇرگەن دۇنيەلەردىڭ اراسىندا قوسپالارى از ەمەسىنە ناقتى مىسالدار كەلتىرىپ, ونداي كۇشتەپ تاڭۋدان ارىلۋ قاجەتتىگىن ەسكەرتتى. ونسىز دا وشپەس مۇرالارى جەتكىلىكتى. اسىلدى ەشقاشان توت باسپايدى, دەدى.
«بابامىز «بوزقاراعان» دەگەن ولەڭىندە «مەن تۋدىم قوجابەرگەن اۋىلىندا, نۋ ورمان «تولىباي جالى» باۋىرىندا. جازىقسىز قۋعىندالىپ, قاشقىن بولدىق, جولىعىپ زامانانىڭ داۋىلىنا» دەپ جىرلاعان. تۋعان جەرى– ايگىلى «ەلىم-اي داستانىنىڭ اۆتورى قوجابەرگەن جىراۋ تولىبايسىنشىنىڭ بالاسىنىڭ اۋىلى. كەرەيدىڭ ىشىندە اشامايلى, كوشەبەدەن تارايدى. سەگىز سەرىنىڭ ۇلى مۇستافادان مەنىڭ اكەم بەگەن تۋعان. عيبراتتى عۇمىرى كوپ جىلدار بويى كومەسكى تارتىپ, كولەڭكەدە قالىپ كەلدى. 30-عا جۋىق ءان, 4 داستان, 5-6 كۇي شىعارعان. ءبىرازى حالىق شىعارمالارى نا تەلىنىپ كەتكەن. ۇرپاقتارى قازىر جامبىل اۋدانىندا تۇرادى», دەدى شوبەرەسى امانتاي بەگەنوۆ. ۇرپاقتارى اتىنان تاعىلىمدى كونفەرەنتسيانى ۇيىمداستىرۋشىلارعا اق العىسىن ارنادى. باسقا دا سويلەۋشىلەر ءوز پايىمدارىمەن ءبولىسىپ, مازمۇندى باياندامالار جاسادى.
س.وسپانوۆ سال-سەرىلەر سەركەسىنىڭ «گاۋhارتاس», «عايني» اندەرىن اۋەلەتە شىرقاپ, جينالعانداردىڭ كوڭىلىن ءبىر كوتەرىپ تاستادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى.
