روبوت-تەحنيكا STEM-ءبىلىم بەرۋدىڭ مازمۇنىنا مىسال بولا الادى. «STEM» اببرەۆياتۋراسى عىلىم, تەحنولوگيا, ينجەنەرلىك جانە ماتەماتيكا سوزدەرىنەن قۇرالعان. ياعني روبوت-تەحنيكا ماتەماتيكا, فيزيكا, ينفورماتيكا جانە تەحنولوگيا عىلىمدارىنان قۇرالادى. وقۋشىلار وسى پاندەر بويىنشا بىلىمدەرىن كىرىكتىرىپ, اقىلدى روبوتتار جوبالاي الادى. بۇل ارينە, وقۋشىلارعا وتە قىزىقتى.
بالالاردىڭ قىزىعۋشىلىقتارىنا ساي ءبىلىم بەرۋ ءۇشىن سايكەسىنشە پەداگوگتاردىڭ دا كاسىبي بىلىكتىلىكتەرى جوعارى بولۋى كەرەك. وسى ماقساتتا «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامى باتىس قازاقستان وبلىسى بويىنشا پەداگوگ قىزمەتكەرلەردىڭ بىلىكتىلىگىن ارتتىرۋ ينستيتۋتىندا بىلتىردان بەرى «روبوت-تەحنيكا نەگىزدەرى» تاقىرىبىندا 72 ساعاتتىق كۋرس ۇيىمداستىرىلا باستادى. بىلىكتىلىكتى ارتتىرۋ كۋرسىنىڭ وقۋ باعدارلاماسىندا Lego Mindstorms EV3 ءمودۋلى مەن Arduino UNO ميكروكونتروللەرىنىڭ مۇمكىندىكتەرى, جۇمىس پرينتسيپتەرى جانە فۋنكتسيالارى قاراستىرىلادى. كۋرستىڭ ماقساتى – مەكتەپتىڭ ينفورماتيكا, فيزيكا جانە ماتەماتيكا ءپانى مۇعالىمدەرىنىڭ روبوت تەحنيكا سالاسىنداعى بىلىمدەرىن جەتىلدىرۋ.
كۋرس بارىسىندا تىڭداۋشىلار شاعىن توپتارعا بىرىگىپ جۇمىس ىستەيدى. مونيتورينگتىك ساراپتاما ناتيجەسىنەن تاقىرىپ بويىنشا تىڭداۋشىلاردىڭ كوپشىلىگى تەوريالىق جاعىنان اقپاراتتانعاندىعى بايقالدى. سوعان وراي تىڭداۋشىلاردىڭ تاجىريبەلىك داعدىلارىن جەتىلدىرۋگە, ءار شاعىن توپتا فيزيكا, ماتەماتيكا جانە ينفورماتيكا پاندەرى مۇعالىمدەرىنىڭ بولۋىن قامتاماسىز ەتۋگە تىرىستىق.
شاعىن توپتاردا وتىرعان ءتۇرلى ءپان مۇعالىمدەرى جاڭارتىلعان ءبىلىم بەرۋ يدەياسى بويىنشا پىكىر الماسىپ, ءبىرىن-ءبىرى باعالادى. تىڭداۋشىلارعا دايىن پرەزەنتاتسيالارمەن قاتار ينتەرنەت رەسۋرستار, شاعىن جوبالارعا باستاۋ بولاتىن زەرتحانالىق جۇمىستار ۇسىنىلادى. تاپسىرمالاردى ورىنداۋ بارىسىندا ءار شاعىن توپ شىعارماشىلىق قابىلەتتەرىن قوسىپ, باسقا توپتارمەن تاجىريبە ءبولىستى. جاتتىعۋلاردى ورىنداۋدا جاڭارتىلعان فورماتتا ءبىلىم بەرۋدىڭ ءادىس-تاسىلدەرىن بارىنشا قولدانىپ, بارلىق تىڭداۋشىنى قامتۋ كوزدەلدى. تىڭداۋشىلار شاعىن توپتاردا Lego جانە Arduino پلاتفورمالارىندا كۋرس بويىنشا مەڭگەرگەن تاجىريبەلىك داعدىلارىن قولدانىپ, جوبالار قۇردى. Lego مودۋلىندە وندىرىستىك قاجەتتىلىكتەرگە ساي روبوتتار قۇراستىرىپ, بەلگىلى ءبىر فۋنكتسيالىق قىزمەتتەر اتقارۋدى جۇزەگە اسىردى. ال Arduino پلاتفورماسىندا ءارتۇرلى تەتىكتەردى جەكەلەي ىسكە قوسىپ, كۇندەلىكتى ومىردە كەزدەستىرىپ جۇرگەن قۇرىلعىلاردى جاساقتادى.
مىسالى, قوزعالىس تەتىگى ارقىلى جارىقتىڭ جانۋى جانە ءسونۋى, دىبىس بەرۋ ارقىلى بولمەدەگى جارىقتى ىسكە قوسۋ سياقتى ءىس-قيمىلدار بار. قىسقا مەرزىمدى كۋرستى اياقتاۋ كەزىندە تىڭداۋشىلاردىڭ كاسىبي ءبىلىم دەڭگەيىن انىقتاۋ ماقساتىندا شىعىس ساۋالناماسى جۇرگىزىلدى. ساۋالناما ناتيجەسىنەن تىڭداۋشىلار ءبىلىمىنىڭ جەتكىلىكتى دەڭگەيگە كوتەرىلگەنى بايقالدى. جاڭا اقپاراتتار ەلىمىزدىڭ ونەركاسىپ سالاسىن جاساندى ينتەللەكت تەحنولوگيالارى ارقىلى باسقارۋدىڭ ىرگەتاسى بولادى دەپ سەنەمىن.
ياعني روبوت قۇراستىرۋ ارقىلى وقۋشىلار تانىمدىق, پراكتيكالىق كوزقاراستارىن قالىپتاستىرۋمەن بىرگە ءتۇرلى ەكسپەريمەنتتەر جۇرگىزىپ, ناقتى تۇجىرىمدامالار مەن قورىتىندىلارعا قول جەتكىزەدى.
اسكەربەك داندىباەۆ,
تەحنيكا عىلىمدارىنىڭ ماگيسترى, «ورلەۋ» بىلىكتىلىك ارتتىرۋ ۇلتتىق ورتالىعى» اق باتىس قازاقستان وبلىسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ كافەدرا مەڭگەرۋشىسى
