مەملەكەت باسشىسىنىڭ تاپسىرماسىن ورىنداۋ ماقساتىندا 7 ناۋرىزدا قر ەنەرگەتيكا مينيسترلىگىندە مۇددەلى مەملەكەتتىك ورگانداردىڭ, قىزىلوردا, قاراعاندى, اقمولا وبلىستارى جانە استانا قالاسى اكىمدىكتەرىنىڭ جانە «سامۇرىق-قازىنا» ۇاق قاتىسۋىمەن سەلەكتورلىق كەڭەس وتكىزىلدى. وندا گازبەن قامتاماسىز ەتۋ جوباسىن ىسكە اسىرۋ جونىندەگى جول كارتاسى ماقۇلدانىپ, جۇمىس توبى قۇرىلدى.
ء«بىز "قىزىلوردا – جەزقازعان – قاراعاندى – تەمىرتاۋ – استانا" باعىتى بويىنشا ماگيسترالدى گاز قۇبىرىنىڭ جوبالىق-سمەتالىق قۇجاتتاماسىن ازىرلەپ, بەكىتۋدى جانە جەر ءبولۋدى قامتاماسىز ەتۋگە كەلىستىك. جاۋاپتى ورىنداۋشىلار: ەنەرگەتيكا مينيسترلىگى, قر يدم, قىزىلوردا, قاراعاندى, اقمولا وبلىستارىنىڭ اكىمدىكتەرى جانە «قازترانسگاز». مەرزىمى – 2018 جىلدىڭ شىلدە ايى», — دەدى ق. بوزىمباەۆ.
مينيستر, سونداي-اق, حالىقارالىق قارجى ينستيتۋتتارىنان قاراجات تارتۋ ارقىلى جوبانى قارجىلاندىرۋدىڭ سحەماسىن انىقتاۋ قاجەت ەكەنىن اتاپ ءوتتى. مەرزىمى – 2018 جىلدىڭ ماۋسىم ايى. مۇنداعى جاۋاپتى ورىنداۋشىلار — «بايتەرەك» ۇبح, قر قم, قر ۇەم, قر ەم, «سامۇرىق-قازىنا» ۇاق, «قازمۇنايگاز» ۇك, «قازترانسگاز» اق.
ق. بوزىمباەۆ «سامۇرىق-قازىنا» ۇاق» جوبانى ىسكە اسىرۋعا جانە قارجى تارتۋعا جەتكىلىكتى دەڭگەيدە جارعىلىق كاپيتالدى قالىپتاستىرۋ ءۇشىن ەنشىلەس ۇيىمدى قۇرۋى نەمەسە انىقتاۋى كەرەك ەكەنىن ايتتى. مەرزىمى — 2018 جىلدىڭ ماۋسىم ايى. جاۋاپتى مەكەمەلەر: قر ۇەم, «سامۇرىق-قازىنا» ۇاق, «قازمۇنايگاز» ۇك, «قازترانسگاز» اق.
«ماگيسترالدى گاز قۇبىرىنىڭ قۇرىلىسىنا كىرىسۋ جانە گاز قۇبىرىنىڭ العاشقى جىگىن دانەكەرلەۋدىڭ سالتاناتتى ءراسىمى وسى جىلدىڭ شىلدە ايىنىڭ باسىنا جوسپارلانعان», — دەپ حابارلادى ق. بوزىمباەۆ.
بۇدان وزگە, مينيستر ماگيسترالدى گاز قۇبىرىن تولتىرۋ جانە تۇتىنۋشىلارعا گاز جەتكىزۋدى قامتاماسىز ەتۋ ماقساتىندا قاراعاندى, اقمولا وبلىستارى جانە استانا قالاسى اكىمدىكتەرىنە گاز تاراتۋ جەلىلەرىن جوبالاۋدى جانە ونىڭ قۇرىلىسىن ماگيسترالدى گاز قۇبىرىنىڭ اياقتالۋ ۋاقىتىمەن سايكەستەندىرە وتىرىپ, تەزدەتۋ قاجەت ەكەنىن, بارلىق جۇمىس 2019 جىلدىڭ شىلدەسىنە دەيىن اياقتالۋى كەرەكتىگىن ايتتى.
ەسكە سالا كەتەيىك, ەلباسى 2018 جىلعى 5 ناۋرىزداعى قازاقستان حالقىنا ۇندەۋىندە «قىزىلوردا — جەزقازعان — قاراعاندى — تەمىرتاۋ — استانا» باعىتى بويىنشا «سارىارقا» ماگيسترالدى گاز قۇبىرىن سالۋ جوباسىن ءبىر–بىر جارىم جىلدىڭ ىشىندە ىسكە اسىرۋدى تاپسىردى.
