نۇرسۇلتان نازارباەۆ كەزدەسۋ بارىسىندا قازاقستان مەن وڭتۇستىك كورەيا اراسىنداعى ساۋدا-ەكونوميكالىق قارىم-قاتىناستىڭ دامىپ كەلە جاتقانىن جانە ونى ءارى قاراي نىعايتۋعا مۇددەلى ەكەنىن اتاپ ءوتتى.
– قازاقستان كورەيا رەسپۋبليكاسىمەن جاقسى قارىم-قاتىناس ورناتقان. ەلدەرىمىز اراسىنداعى تاۋار اينالىمىنىڭ كولەمى ەكى ميلليارد دوللارعا جۋىقتادى. سىزدەردىڭ تاۋارلارىڭىزدىڭ ءبىزدىڭ ەلگە ليانيۋنگان پورتى ارقىلى كەلىپ جاتقانى قۋانتادى, وندا ءبىزدىڭ لوگيستيكالىق تەرمينالىمىز بار. قازاقستان كورەيامەن جاڭا جانە تسيفرلىق تەحنولوگيا, يندۋستريالاندىرۋ, مەديتسينا جانە باسقا دا سالالاردا ىنتىماقتاستىق ورناتۋعا نيەتتى, – دەدى قازاقستان پرەزيدەنتى.
سونىمەن قاتار مەملەكەت باسشىسى قازاقستان مەن وڭتۇستىك كورەيا اراسىنداعى پارلامەنتارالىق قارىم-قاتىناستاردى نىعايتۋدىڭ جانە ولاردى دامىتۋدىڭ ماڭىزدىلىعىنا نازار اۋداردى.
چون سە گيۋن كەزدەسۋگە جانە ەكىجاقتى قاتىناستار ماسەلەسىن تالقىلاۋعا مۇمكىندىك بەرگەنى ءۇشىن نۇرسۇلتان نازارباەۆقا العىس ءبىلدىردى.
ۇلتتىق اسسامبلەيا سپيكەرى استانانىڭ قارقىندى دامىپ كەلە جاتقانىن ايتىپ, قازاقستاندا وتكەن جاھاندىق ءىس-شارالار – حالىقارالىق «ەكسپو-2017» مامانداندىرىلعان كورمەسى مەن دۇنيەجۇزىلىك XXVIII قىسقى ۋنيۆەرسياداعا جوعارى باعا بەردى.
چون سە گيۋن ەكىجاقتى بايلانىستىڭ ستراتەگيالىق سيپاتتا دامىپ كەلە جاتقانىنا توقتالىپ, «قازاقستان-2050» ستراتەگياسىنىڭ ماقساتتارىنا جەتۋ جولىندا كورەيا قازاقستانعا سەرىكتەس بولۋعا دايىن ەكەنىن اتاپ ءوتتى.
بۇدان بولەك, ۇلتتىق اسسامبلەيا سپيكەرى وتكەن عاسىردىڭ 30-جىلدارىندا قازاقستانعا جەر اۋدارىلعان ەتنيكالىق كارىستەرگە كومەك قولىن سوزىپ, قولداۋ كورسەتكەنى ءۇشىن ەلىمىزدىڭ حالقىنا العىس ءبىلدىردى.
سونىمەن قاتار چون سە گيۋن قازاقستان رەسپۋبليكاسى پارلامەنتى ءماجىلىسىنىڭ سپيكەرى ن.نىعماتۋلينمەن كەزدەسىپ, ەكى ەل پارلامەنتتەرى اراسىنداعى ىنتىماقتاستىق تۋرالى كەلىسىمگە قول قويىلعانىن ايتتى.
