ءاليانىڭ شەبەر قولىنان شىققان 300-گە جۋىق تۋىندى سانالۋان تاقىرىپتى قامتيدى. قاي-قايسىسىندا بولسىن ۇلتتىق ناقىش الدىمەن اڭعارىلىپ, ادام مەن تابيعاتتىڭ ىشكى ۇندەستىگى, تىلسىم قۇبىلىستارى, جۇمباق سىرلارى دومبىرانىڭ قوس شەگىندەي ۇيلەسىم تاۋىپ وتىرادى. كوبىنە اكۆارەلمەن سالعاندى ۇناتادى. ارا-تۇرا مايلى بوياۋدى دا قولدانادى. تابيعات كورىنىستەرى مەن ادام پورترەتتەرىن كەسكىندەگەندە اكادەميالىق باعىتتى ۇستانادى. سوڭعى كەزدەرى كىتاپ جانە بوتانيكالىق بەزەندىرۋگە دە دەن قويىپ ءجۇر.
– ۋنيۆەرسيتەتتە وقىپ جۇرگەندە العاشقى كاسىبي تىرناقالدى تۋىندىم كىشى ءىنىمنىڭ پورترەتىن سالۋعا ارنالدى. باۋىرىممەن ق ۇلىن-تايداي تەبىسىپ وسسەم دە, ءبىر ايداي ۋاقىت جۇمسادىم. اكە-شەشەم شاڭىراعىنىڭ تورىندە ءىلۋلى تۇرعان پورترەت ءالى كۇنگە دەيىن كوزىمە ىستىق كورىنەدى,–دەيدى قىلقالام يەسى وتكەن كەزدى قيماستىقپەن ەسكە الىپ.
تاڭداۋلى تۋىندىلارىنىڭ ءبىرى «كەلىننىڭ ءانى» دەپ اتالادى. ءبىر قولىمەن بەسىكتى, ءبىر قولىمەن الەمدى تەربەتەتىن بولاشاق انا بەينەسى ارقىلى ۇمىتىلىپ بارا جاتقان حالىقتىق سالت-داستۇرلەر مەن ادەت-عۇرىپتاردى ۇلىقتاۋعا ۇمتىلىپتى. مايلى بوياۋمەن سالعان «اۋانىڭ قوزعالىسى» شىعارماسى قازىرگى ۋاقىتتىڭ جانتالاس قيمىلىن سەزدىرگەنىمەن, قورشاعان ورتاعا دەگەن مەيىرىمدى, ءومىر سۇرۋگە دەگەن قۇشتارلىقتى اڭعارۋ قيىن ەمەس. تاپسىرىس بويىنشا كاسىپقوي بوكسشىلار گەننادي گولوۆكين مەن جانات جاقيانوۆتىڭ پورترەتتەرىن سالىپ, «قوعامدىق كەلىسىم» مەملەكەتتىك مەكەمەسى ۇيىمداستىرعان قايىرىمدىلىق كەشىندە ساتىلىمعا قويىپتى. ودان تۇسكەن 180 مىڭ تەڭگە ناۋقاس بالدىرعانداردىڭ ەم-دومىنا جۇمسالىپتى. «قايىرىمدىلىق شارالارىنا قاتىسۋ – وتە ساۋاپتى ءىس. بيىل ەكى شىعارمامدى اۋكتسيونعا قويامىن. مەنىڭ باستامامدى كاسىپكەرلەر مەن ونەر جاناشىرلارىنىڭ قولداۋىن وتىنەمىن» دەيدى ول.
ءاليا مۇقىشەۆا بۇگىندە نازارباەۆ زياتكەرلىك مەكتەبىندە ونەر ساباعىن جۇرگىزەدى. «Palette» ۇيىرمەسىنە جەتەكشىلىك ەتىپ, وقۋشىلاردى قىلقالامنىڭ قىر-سىرىنا باۋليدى. ولاردىڭ الدى ءتۇرلى بايقاۋلارعا قاتىسىپ, ولجا سالىپ ءجۇر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
