راسىندا, كورشىسىنىڭ جاقسى بولۋىن كىم قالامايدى دەيسىڭ؟ بىلايشا ويلاپ قاراساڭ, ءومىرىڭنىڭ ءماندى دە ءساندى ءوتۋى ءبىر جاعىنان كورشىڭە دە تىكەلەي بايلانىستى. كورشىڭ جاقسى بولسا, ەمىن-ەركىن ارالاسىپ, قۋانىش-جۇبانىشتاردى بىرگە بولىسەسىڭ. ال كورشىڭ ناشار بولسا, كوڭىلىڭ ورنىقتى بولماي, ءبىر نارسە جەتىسپەگەندەي ەلەگىزىپ وتىراسىڭ. قازاقتان ءسوز قالعان با, «جاقسى كورشى – ءتورىڭ, جامان كورشى – كورىڭ», «وتتى شۇقىساڭ وشەدى, كورشىنى شۇقىساڭ كوشەدى», «كورشى اقىسى – قۇداي حاقىسى» دەگەن ماقالدار بەكەردەن-بەكەر ايتىلماعان. ولاي دەيتىنىمىز, سەنىڭ بۇكىل جاقسىلىعىڭ مەن كەمشىلىگىڭدى ەڭ الدىمەن كورشىڭ كورىپ-ەستيدى. سىيلاسا بىلگەن جاقسى كورشى قۋانىش-قىزىقشىلىعىڭمەن ءبولىسىپ, كەمشىلىكتەر بولا قالسا كورشى اقىسى رەتىندە تولىقتىرىپ وتىرادى.
مەن ءوزىم سارىسۋ اۋدانىندا 40 جىل ەڭبەك ەتكەن كەزىمدە, قىزمەت بابىمەن بىرنەشە رەت كوشۋگە تۋرا كەلدى. سوڭعى تۇراقتانعانىمىز ساۋداكەنت اۋىلىنداعى م.اۋەزوۆ كوشەسى بولدى. وسى كوشە بويىنداعى ۇيدە 20 جىلداي تۇرعاندا, كورشىلەرمەن وتە تاتۋ-ءتاتتى ارالاستىق. بارلىق مەرەكەلەردى, توي-دۋمانداردى بىرگە وتكىزەتىنبىز. راسىن ايتۋ كەرەك, سول قۋانىشتاردىڭ, ءىس-شارالاردىڭ باستاماشىسى, ۇيىتقىسى بولا بىلدىك. وعان كورشىلەرىمىز ريزاشىلىعىن ءبىلدىرىپ جاتاتىن. ءبىز تاراز قالاسىنا قونىس اۋداراردا كورشىنىڭ بالاسى: ء«بىز ەندى كىممەن ارالاسامىز؟» دەپ قيماستىقپەن كوزىنە جاس العاندا, مەنىڭ دە كوڭىلىم قاتتى بوساپ, تولقىپ كەتكەنىم ءالى ەسىمدە.
ماسەلەن مەن ءوزىم كورشىلەرگە ءدان ريزامىن. 2011 جىلدان بەرى «جانسايا» شاعىن اۋدانىندا تاۋكە حان كوشەسىندەگى ءتورت قاباتتى ۇيدە تۇرامىز. وسىنداعى 16 وتباسى ءبىر ەسىكتەن كىرىپ-شىعامىز. مەرەكەلەردە ءبىر-ءبىرىمىزدى قۇتتىقتاۋ قالىپتاسقان جايعا اينالعان. ناۋرىز مەيرامىندا كورشىلەر شاقىرىسىپ, ايت كۇندەرى بىرىگىپ ايتتاپ, مارە-سارە بولىپ قالامىز. نارەستەلەر دۇنيەگە كەلگەندە شىلدەحانا جاسالىپ, يگى تىلەكتەرىمىزدى ءبىلدىرىپ جاتامىز. ءۇيدىڭ كىرەبەرىسى كەزەكپەنەن جۋىلىپ, تازارتىلىپ تۇرادى. ەسىكتىڭ الدىندا تال-داراقتار, گۇلدەر جايقالىپ وسۋدە. ونى دا كەزەكتەسىپ سۋارىپ, باپتاپ وتىرامىز.
وتكەن جىلى كورشىلەر بىرىگىپ, اۋلاعا كەڭ داستارقان جايىپ, ناۋرىز مەيرامىن ەستە قالارلىقتاي وتكىزدىك. ءۇش بالدىرعاننىڭ تۇساۋى كەسىلدى. بالالار اراسىندا ۇلتتىق ويىندار – اسىق اتۋ, قازاق كۇرەسىنەن, سونداي-اق قىسقا قاشىقتىققا جۇگىرۋ, قول كۇرەسىنەن جارىس ۇيىمداستىرىلدى. ءبىزدىڭ بۇل مەرەكەمىزگە تاراز قالالىق ارداگەرلەر كەڭەسىنىڭ باسشىلىعى قاتىستى. ارنايى كەلگەن «قازاقستان-تاراز» تەلەارناسى وتكىزىلگەن ءىس-شارانى كوپشىلىككە كورسەتتى.
سونداي-اق قۇربان ايت كۇندەرىندە دە بىرلىگى جاراسقان كورشىلەر ءبىر-ءبىرىمىزدىڭ ۇيىمىزدە بولىپ, قۇران باعىشتاپ, ىزگى تىلەكتەر ءبىلدىرىپ وتىرامىز. «كورشىڭ قولايلى بولسا, قوراڭ كەڭ» دەگەندەي, كورشىلەرمەن سول تاتۋلىقتىڭ ارقاسى بولار, بىزدە بەيساۋات جۇرگەن ادامدار كورىنبەيدى, تۇرعان ۇيىمىزدە تارتىپسىزدىك, كەلەڭسىز كورىنىستەر بەلەڭ العان جوق. بۇعان ءبىز, تۇرعىندار تاراپىنان شۇكىرشىلىك ەتەمىز.
گازەت بەتىندە كوتەرىلىپ وتىرعان ماڭىزدى ماسەلەنى جاۋىپ-جاسىرماي تۋراسىن ايتاتىن بولساق, ءبىر-بىرىمەن تاتۋ-ءتاتتى ارالاسىپ تۇرۋ, اۋەلى كورشىلەردىڭ وزدەرىنە تىكەلەي بايلانىستى. سول ورتاداعى جاسى كەلگەن كىسىلەر بولسا, ۇلكەندىگىن ءبىلدىرىپ, اۋىزبىرشىلىككە شاقىرىپ, ءبارىن بىرىكتىرىپ جۇرسە, قانداي عانيبەت بولار ەدى!
الدابەردى ماقاشەۆ,
ەڭبەك ارداگەرى
تاراز
