فوتو: اينابەك ساعىنتاي ۇلى
قادىر مىرزا ءالي اتىنداعى مادەنيەت جانە ونەر ورتالىعىندا وتكەن ادەبيەت كەشىنە حالىق كوپ جينالدى. كىتاپقا ارقاۋ بولعان ساقىپجامال, ساقىپ, ءدىلدا ەسىمدى ءۇش ابىسىننىڭ تالايلى تاعدىرى, باسىنان كەشكەن شىم-شىتىرىق وقيعالار حح عاسىرداعى قازاق حالقىنىڭ اجىراماس ءبىر تاريحى دەسە دە بولعانداي. ايرانداي ۇيىعان قازاقى اۋىلدىڭ بەرەكەسىن كەتىرگەن كەڭەس وكىمەتى, بايلاردى تاركىلەۋ, اشتىق, ۇرىس دالاسىن عانا ەمەس, قازاق ساحاراسىن دا ورتەپ وتكەن سوعىس, ەڭ سوڭىندا 1952 جىلى كاپۋستين يار پوليگونى اشىلعاندا اتامەكەن – قۇم نارىننان كۇشپەن كوشىرىلىپ, بوسقىن بولعان بوكەيلىكتەر... – وسىنىڭ ءبارى جاڭا شىعارمادا كورىنىس تاپقان.
– حايروللا قارتتىڭ وتباسى, اڭىز بولعان ءۇش ابىسىن تۋرالى اڭگىمەنى وسى اۋلەتتىڭ كەلىنى رىستىدان ءجيى ەستيتىنمىن. ءوز اناسى ەمەس, قايىن جۇرتىن, ەنەلەرىن وسىنشالىق دارىپتەپ, قۇلاي سۇيگەن كەلىننىڭ قىلىعىنا سۇيسىنسەم, تاريحىنا قانىق بولعان سوڭ قيىن كەزدە قاسيەتىن جوعالتپاعان قازاق ايەلدەرىنىڭ مىنەزىنە ءتانتى بولدىم. ۇرپاقتارى تاراپىنان وسى ءبىر شەرلى شەجىرەنى, ۇلاعاتتى ۇيلەسىمدى قاعاز بەتىنە تۇسىرۋگە ۇسىنىس تۇسكەندە, قۋانا كەلىستىم. كوركەم دۇنيە بولعاسىن, ارينە, كەيبىر جەرىن ارلەۋگە تۋرا كەلدى, بىراق نەگىزگى جەلىدەن ۇزاعان جوقپىن, – دەيدى كىتاپ اۆتورى.
داريعا مۇشتانوۆا – ايتىس ونەرىن جاڭعىرتۋعا اتسالىسقان اقىن, «ادامنىڭ جانى – ءبىر جۇمباق», ء«ومىر-ارنا», «قوس قانات» جىر جيناقتارىنىڭ اۆتورى. ءبىراز جىل ۇستازدىقپەن اينالىسىپ, قازاقستان ءبىلىم بەرۋ سالاسىنىڭ ۇزدىگى, «ەرەن ەڭبەگى ءۇشىن» مەدالى مەن ىبىراي التىنسارين مەدالىنىڭ يەگەرى اتانعان. ارىپتەسىنىڭ جاڭا شىعارماسىنىڭ باعاسىن بەرۋگە وسى كەشكە اقىن شولپان قىدىرنيازوۆا, ولكەتانۋشى, ارداگەر جۋرناليست تيحون الىپقالي, قازاقستان جازۋشىلار وداعىنىڭ مۇشەلەرى امانگەلدى شاحين مەن عايسا عالي سەيتاق بۇل ەڭبەكتىڭ قۇندىلىعى مەن قىزىقتى تۇستارىن جارىسا اڭگىمەلەدى.
– كىتاپتىڭ وقيعا جەلىسى, سيۋجەتتەردىڭ شىمىرلىعى, اسەرلى ساتتەردىڭ مولدىعى بۇل شىعارمانى ەكرانعا نەمەسە تەاتر ساحناسىنا شاقىرىپ تۇرعانداي, – دەيدى تيحون الىپقالي.
شىعارمادا كوتەرىلگەن ادامگەرشىلىك قۇندىلىقتار جاس ۇرپاق تاربيەسىنە وڭ اسەر ەتىپ, رۋحاني جاڭعىرۋعا دا سەپ بولاتىنىن باتىس قازاقستان وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى قادىربولات مۇساعاليەۆ تە باسا ايتتى. ح.بوكەەۆا اتىنداعى وبلىستىق قازاق دراما تەاترىنىڭ اكتريساسى, مادەنيەت سالاسىنىڭ ۇزدىگى نۇرگۇل جۇباتوۆانىڭ كەشتىڭ شىرايىن كىرگىزە جۇرگىزۋى وتە اسەرلى بولدى.
قازبەك قۇتتىمۇرات ۇلى,
«ەگەمەن قازاقستان»
ورال
