ءىس-شاراعا قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ جەتەكشى ساراپشىلارى – ساياساتتانۋشىلار, ەكونوميستەر, الەۋمەتتانۋشىلار جانە بۇقارالىق اقپارات قۇرالدارى وكىلدەرى قاتىستى.
«قازاقستان رەسپۋبليكاسىنىڭ پرەزيدەنتى ن.نازارباەۆتىڭ پارلامەنت پالاتالارىنىڭ بىرلەسكەن وتىرىسىندا جاريا ەتكەن «پرەزيدەنتتىڭ بەس الەۋمەتتىك باستامالارى» ۇندەۋىندە حالىقتىڭ جاعدايى تومەن توپتارى ءۇشىن تۇرعىن ءۇيدىڭ قولجەتىمدىلىگىن ارتتىرۋ, جالاقىسى تومەن قىزمەتكەرلەر ءۇشىن سالىقتى ازايتۋ, قازاقستاندىق ءبىلىم بەرۋ جۇيەسىندە وڭدى ىلگەرىلەۋدى ىنتالاندىرۋعا باعىتتالعان جوعارى ءبىلىم ساپاسى مەن قولجەتىمدىلىگىن ارتتىرۋ, ەلدىڭ ورتالىق جانە سولتۇستىك وڭىرلەرىندەگى ەكولوگيالىق جاعدايدى جاقسارتۋ مەن دامىتۋعا باعىتتالعان گازداندىرۋدى جالعاستىرۋ سياقتى الەۋمەتتىك ماڭىزى بار ماسەلەلەرگە ءمان بەردى. جاڭا الەۋمەتتىك ساياسات جۇرگىزۋدىڭ ناتيجەسى ۇزاق مەرزىمدى ناتيجە بەرىپ, الەۋمەتتىك قاۋىپسىزدىكتى قامتاماسىز ەتەدى», دەدى قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى ءمادينا نۇرعاليەۆا.
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ باس ساراپشىسى بەرىك ابدىعالي ۇلى اتالعان ينستيتۋتتىڭ نەگىزگى مىندەتى ەل ىشىندەگى ساياسي-الەۋمەتتىك ماسەلەلەرگە جان-جاقتى تالداۋ جۇرگىزۋ ەكەنىن تىلگە تيەك ەتىپ, ەلباسى ۇسىنعان باستامانىڭ نەگىزگى ەرەكشەلىكتەرىنە توقتالىپ, بۇگىنگى تاڭدا مەملەكەتىمىز دامىپ, ەكونوميكالىق الەۋەتىمىز كوتەرىلىپ, ءبىراز جەتىستىكتەرگە جەتكەنىن اتاپ ءوتتى.
