مەملەكەت باسشىسى مىندەتتەگەن ماڭىزدى تاپسىرمالاردى ورىنداۋ ۇلكەن جاۋاپكەرشىلىكتى تالاپ ەتەتىنى بەلگىلى. وسى رەتتە شىعىس قازاقستان وبلىسىنىڭ اكىمى دانيال احمەتوۆ باستاعان ارنايى دەلەگاتسيا 5-7 ناۋرىز كۇندەرى جۇمىس ساپارىمەن ۇلىبريتانيانىڭ لوندون قالاسىنا بارىپ, ەۋروپا قايتا قۇرۋ جانە دامۋ بانكى وكىلدەرىمەن كەزدەسىپ قايتتى. وبلىس اكىمىنىڭ ءباسپاسوز قىزمەتىنىڭ بەرگەن مالىمەتتەرىنە سۇيەنسەك, ايماق باسشىسى ءۇش كۇندىك ءىسساپاردىڭ العاشقى كۇنىندە «Southwark Integrated Waste Management Facility» قاتتى تۇرمىستىق قالدىقتاردى سۇرىپتاۋ جانە قايتا وڭدەۋ زاۋىتىن ارالاپ, «Transport for London» قوعامدىق تاسىمالداۋدى ۇيىمداستىرۋ جۇيەسىنىڭ قىزمەتىمەن تانىسىپتى. ءىسساپاردىڭ ەكىنشى كۇنىندە ەۋروپا قايتا قۇرۋ جانە دامۋ بانكىنىڭ ءبىرىنشى ۆيتسە-پرەزيدەنتى الون پيلوكسپەن كەزدەسىپ, ءوڭىردىڭ ينفراقۇرىلىمىن دامىتۋعا باعىتتالعان ينۆەستيتسيالىق جوبالاردى جۇزەگە اسىرۋدىڭ ەكىجاقتى سەرىكتەستىك جوسپارىن تالقىلاپتى. ەڭ ماڭىزدىسى, جۇمىس ساپارى بارىسىندا وبلىس اكىمى د.احمەتوۆ پەن ەقدب پرەزيدەنتى سۋما چاكرابارتي اراسىندا قۇنى 5,6 ميلليارد تەڭگەنى قۇرايتىن «شىعىس قازاقستان وبلىسى قالالارى مەن اۋدان ورتالىقتارىنىڭ كوشەلەرىن جارىقتاندىرۋ جۇيەسىن جاڭعىرتۋ» جوباسىن قارجىلاندىرۋ تۋرالى كەلىسىمگە قول قويعان. جوبا جۇزەگە اسقان جاعدايدا شىعىس قازاقستاننىڭ 630 مىڭنان استام تۇرعىنى بار 6 قالاسى مەن 11 اۋدان ورتالىعىنا 32 مىڭ دانا ەنەرگيا ۇنەمدەۋشى شامدار ورناتىلاتىن بولادى. قازىرگى ۋاقىتتا اتالعان بانكتىڭ قولداۋىمەن 4,8 ملرد تەڭگەگە وسكەمەن مەن سەمەي قالالارىندا «اقىلدى» جارىقتاندىرۋ جۇيەلەرى ەنگىزىلۋدە. بۇل ءوز كەزەگىندە 25 مىڭ شامدى ەنەرگيا ۇنەمدەۋشى تۇرىنە اۋىستىرۋعا مۇمكىندىك بەرمەك. كەلىسسوزدەر بارىسىندا ايماق باسشىسى مەن ەقدب پرەزيدەنتى وسكەمەندە قۇنى 29,5 ميلليارد تەڭگەنى قۇرايتىن قالدىقتاردى زاماناۋي جولمەن جويۋ جانە قايتا وڭدەۋ جوباسىن دا پىسىقتاپ, بىرلەسە جۇمىس ىستەۋگە كەلىسىپتى.
ەلباسى 5 ناۋرىز كۇنى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا ارناعان «پرەزيدەنتتىڭ بەس الەۋمەتتىك باستاماسى» اتتى ۇندەۋىندە گازداندىرۋ ماسەلەسىنە ەرەكشە ءمان بەرگەن-ءدى. وبلىس اكىمى لوندونداعى ساپارىندا وسى ماڭىزدى ماسەلەنى دە نازاردان تىس قالدىرماي, اتالعان بانك وكىلدەرىن قۇنى 33,3 ميلليارد تەڭگە تۇراتىن زايسان, ءۇرجار, تارباعاتاي اۋداندارىنىڭ 50 ەلدى مەكەندەرىن گازداندىرۋ جوباسىنا اتسالىسۋعا ۇسىنىس ءبىلدىرىپتى. كەزدەسۋ قورىتىندىسىندا سۋما چاكرابارتي ەقدب-مەن بىرلەسكەن جوبالاردىڭ سانى مەن سوماسى بويىنشا ەلىمىزدىڭ ايماقتارى اراسىندا شىعىس قازاقستاننىڭ كوش باستاپ وتىرعانىن جەتكىزىپ, ينۆەستيتسيالىق جوبالاردى جۇزەگە اسىرۋعا قوسقان ۇلەسى ءۇشىن د.احمەتوۆكە العىس حات تابىس ەتىپ, بيىل قاراشادا بەيجىڭدە وتەتىن ورتالىق ازيا فورۋمىنا قوناق رەتىندە قاتىسىپ, بىرلەسكەن جوبالاردىڭ بارىسى تۋرالى بايانداما جاساۋعا شاقىرىپتى.
رەتى كەلگەندە ايتا كەتەيىك, 2015 جىلدان باستاپ وسى ۋاقىتقا دەيىن وبلىس اكىمدىگى مەن ەقدب 46,1 ميلليارد تەڭگەنىڭ 10 نەسيەلىك كەلىسىمشارتىنا قول قويىپتى.
ازامات قاسىم,
«ەگەمەن قازاقستان»
