كەز كەلگەن مەملەكەت ءوز ازاماتتارىنىڭ ءال-اۋقاتى ارتقانىن, ءاربىر وتباسىنىڭ باسپانامەن قامتاماسىز ەتىلۋىن مەجە ەتەدى. ناق وسى ماسەلە ەلباسىنىڭ ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ» دەپ اتالعان ءبىرىنشى باستاماسىندا كورسەتىلگەن, بۇل ءبىزدىڭ ازاماتتارىمىزدىڭ باسپانالى بولۋعا دەگەن مۇمكىندىگىن كەڭەيتەدى.
باسپاناعا قول جەتكىزۋ ءاربىر ادامنىڭ, ءاربىر وتباسىنىڭ ارمانى دەسەك, قاتەلەسە قويماسپىز. سونداي-اق ول بۇگىنگى كۇننىڭ ەڭ باستى ماسەلەسىنە اينالعان. ويتكەنى ءوز ءۇيىڭ, ءوز پاتەرىڭ – تۇراقتىلىق پەن تىنىشتىقتىڭ كەپىلى, وتباسى قۇرۋدىڭ, وتباسى مۇشەلەرىن كوبەيتۋدىڭ ىرگەتاسى.
ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتى بويىنشا, ەلىمىزدە تۇرعىن ۇيمەن قامتاماسىز ەتۋ سوڭعى بەس جىلدا ۇزدىكسىز ءوسىپ وتىرعان. سونىمەن بىرگە تۇرعىن ءۇي قورىن دامىتۋ دا ارتا تۇسكەن. مىسالى وتكەن جىلدىڭ وزىندە عانا جالپى كولەمى 11,2 ميلليون شارشى مەتر تۇرعىن ءۇي پايدالانۋعا بەرىلىپتى. ەلباسى مۇنى رەكوردتىق كورسەتكىش دەپ اتادى. دەگەنمەن بۇل بۇگىنگىدەي ىشكى جانە ەڭبەك ميگراتسياسى ارتىپ وتىرعان كەزدە ازدىق ەتەدى. ونىڭ ۇستىنە ەلىمىزدىڭ دەموگرافيالىق ساياساتىنا اسا ءمان بەرىلىپ وتىرعان كەزەڭدەردە حالىق سانىن قولايلى تۇرعىن ءۇيسىز, قازىرگى زامانعا ساي پاتەرلەرسىز كوبەيتۋ تاعى مۇمكىن ەمەس.
پرەزيدەنت ءوزىنىڭ جىل سايىنعى جولداۋلارىندا جانە وسى جولعى حالىققا ارناعان ۇندەۋىندە دە باسپاناعا قولجەتىمدىلىكتى ارتتىرۋعا جاعداي جاساۋ قاجەتتىگىن اتاپ ءوتتى. مەملەكەت باسشىسى وسىعان بايلانىستى تۇرعىن ءۇي يپوتەكاسى قالىڭ كوپشىلىككە جاپپاي قولجەتىمدى بولۋىنىڭ مەحانيزمىن جاساۋدى تاپسىردى. وسى تاپسىرما ەلىمىزدىڭ تۇرعىندارىنا, اسىرەسە, جاستارعا ۇلكەن ءۇمىت سىيلاپ وتىر.
شاحيسمايل اسيەۆ,
«احىسكا» تۇرىك ەتنومادەني بىرلەستىگى توراعاسىنىڭ ورىنباسارى
