قوعام وكىلدەرى, وندىرىستىك كاسىپورىندار باسشىلارى, ارداگەرلەر جانە قازاقستان حالقى اسسامبلەياسىنىڭ مۇشەلەرى قاتىسقان جيىندا ءوڭىر باسشىسى ەرلان قوشانوۆ ءار باستامانىڭ قاراعاندىلىقتاردىڭ جاي-كۇيىنىڭ وڭالۋىنا قالاي اسەر ەتەتىنىن جىلىكتەپ ايتىپ بەردى.
وبلىس باسشىسى ء«ار وتباسىنا باسپانا الۋدىڭ جاڭا مۇمكىندىكتەرى» باستاماسى پاتەر كەزەگىن تومەندەتۋگە وڭ ىقپالىن تيگىزەتىنىن ەرەكشە اتاپ ءوتتى. سونىمەن قاتار پرەزيدەنت باستاماسىنىڭ الداعى جىلدارى كەزەكتە تۇرعان ازاماتتار سانىن ازايتىپ, وبلىستاعى تۇرعىن ءۇي قورىنىڭ ەداۋىر جاڭارتىلاتىنىنا سەبەپكەر بولاتىنىن ايتتى.
وبلىس باسشىسى قالا جانە اۋدان اكىمدەرىنىڭ الدىنا تۇرعىن ءۇي قۇرىلىسىن بەلسەندى دامىتۋ مىندەتىن قويدى. الداعى ۋاقىتتا تۇرعىن ءۇي قۇرىلىسى الاڭدارىنا ينجەنەرلىك-كوممۋنيكاتسيالىق ينفراقۇرىلىمداردى جەتكىزۋ ءۇشىن جەكەمەنشىك قۇرىلىسشىلارمەن بىرىگىپ, مەملەكەت-جەكەمەنشىك ارىپتەستىگى مەحانيزمى قولدانىلا باستايتىنىن ايتتى. ۇندەۋدە كوتەرىلگەن باسقا دا مىندەتتەردىڭ ورىندالۋ بارىسى قاتاڭ باقىلاۋدا بولاتىنىن جەتكىزدى.
اكتيۆ جينالىسىندا سونداي-اق وبلىستا ستۋدەنتتىك جاتاقحانالاردىڭ تاپشىلىعى وتكىر بايقالاتىنى اڭگىمەگە وزەك بولدى. ءوڭىر باسشىسى بۇل ماسەلەنى شەشۋدىڭ جولدارىن ايتىپ بەردى. بۇگىنگى كۇندە وبلىستا كۇندىزگى بولىمدە وقيتىن 25 مىڭ ستۋدەنتتىڭ 13 مىڭنان استامى مەملەكەتتىك گرانت بويىنشا ءبىلىم الۋدا. ەندى ەلباسى باستاماسىنىڭ ارقاسىندا ولاردىڭ سانى 35-40 پايىزعا ارتپاق.
مەملەكەتتىك گرانتتاردى ۇلەستىرۋ ءۇشىن قىسقا مەرزىم ىشىندە ايماقتىڭ قانداي بىلىكتى كادرلارعا مۇقتاج ەكەندىگىن انىقتاۋ وتە ماڭىز بەرەتىن شارۋا ەكەندىگىنە توقتالدى وبلىس باسشىسى. سونىمەن قاتار ستۋدەنتتەردى جاتىن ورىنمەن قامتاماسىز ەتۋ دە شەشىمىن تەز تابۋدى قاجەت ەتەتىن ماسەلە.
وسى ورايدا ە.قوشانوۆ جوو باسشىلارىن الداعى ۋاقىتتا جوبالاۋ-سمەتالىق قۇجاتتامالاردى ازىرلەپ, ينۆەستور ىزدەستىرۋ ىسىمەن شىنداپ اينالىسۋعا شاقىردى. ءوڭىر باسشىسى بۇل ماسەلەنىڭ ەرەكشە باقىلاۋدا بولاتىنىن دا اتاپ ءوتتى.
ەلباسىنىڭ ەلىمىزدى ءارى قاراي كوگىلدىر وتىنمەن قامتۋدى جالعاستىرۋ باستاماسى قاراعاندى وبلىسىنىڭ تۇرعىندارى ءۇشىن دە ۇلكەن ماڭىزعا يە. جوبا اياسىندا قاراعاندى, تەمىرتاۋ, جەزقازعان, ساتباەۆ, ساران جانە شاحتينسك سەكىلدى وبلىستىڭ ءىرى قالالارى, سونداي-اق اباي, جاڭاارقا, بۇقار جىراۋ, وساكاروۆ, شەت, ۇلىتاۋ اۋداندارىنىڭ 120 ەلدى مەكەنى گازبەن قامتىلاتىن بولادى.
پرەزيدەنتتىڭ جاڭا باستامالارىن جۇزەگە اسىرۋ جەكە ءىسىن ەندى باستاعان كاسىپكەرلەر ءۇشىن بيزنەسىن دوڭگەلەتىپ الىپ كەتۋگە مول مۇمكىندىك بەرەدى. قاراعاندى وبلىسىندا جۇزەگە اسىرىلعان ستارتاپ-جوبالاردىڭ سانى ەكى ەسەگە ۇلعايۋى دا ابدەن مۇمكىن.
– 2017 جىلى جاپپاي كاسىپكەرلىكتى دامىتۋ باعدارلاماسىن جۇزەگە اسىرۋدىڭ ءبىرىنشى جىلىندا وبلىسىمىزدا ءىسىن جاڭا باستاپ كەلە جاتقان 827 كاسىپكەر 4,5 ملرد تەڭگە شاعىن نەسيەلەر الدى. بۇل ولارعا اۋىل شارۋاشىلىعىندا جانە وڭدەۋ وندىرىسىندە جاڭا كاسىپورىندار اشۋعا, سونداي-اق 700-دەن استام جاڭا جۇمىس ورىندارىن قۇرۋعا مۇمكىندىك بەردى, – دەدى ە.قوشانوۆ «شاعىن نەسيە بەرۋدى كوبەيتۋ» باستاماسىنا توقتالا كەلە.
الايدا بولىنگەن قاراجات بارلىق نيەت بىلدىرۋشىلەرگە جەڭىلدەتىلگەن نەسيە الۋعا جەتكىلىكسىز بولدى. تەك «باستاۋ بيزنەس» جوباسى بويىنشا عانا وقۋدان وتكەن 1313 كاسىپكەردىڭ 956-ى قارجىلىق رەسۋرستاردىڭ جەتكىلىكسىزدىگىنەن شاعىن نەسيە الا الماي قالعان. وسىنداي ماسەلەنىڭ تۋىنداۋىنا بايلانىستى, ەلباسىنىڭ اعىمداعى جىلى بۇل باعدارلاما بويىنشا قوسىمشا 20 ملرد تەڭگە ءبولۋدى تاپسىرعانى بەلگىلى.
اكتيۆ جينالىسىندا وبلىس باسشىسى «جالاقىسى تومەن جۇمىسشىلاردىڭ ەڭبەكاقىسىن كوبەيتۋ باستاماسى ءوڭىردىڭ شامامەن 160 مىڭ تۇرعىنىنا قاتىستى بولاتىنىن ايتا كەلىپ, شىعارىلاتىن قاراجاتتىڭ شىن مانىسىندە جۇمىسكەرلەردىڭ جالاقىسىن ۇلعايتۋعا باقىتتالۋىن قاداعالاۋ كەرەكتىگىنە ەرەكشە ءمان بەردى.
– «پرەزيدەنتتىڭ بەس الەۋمەتتىك باستاماسى» ءبىزدىڭ وبلىستىڭ دا ىلگەرى دامۋىنا دەم بەرىپ, يگى ىقپالىن تيگىزەدى, – دەپ قورىتىندىلادى اكتيۆ جينالىسىن وبلىس اكىمى.
قايرات ءابىلدا,
«ەگەمەن قازاقستان»
قاراعاندى
