وڭىردە قارعىن سۋدىڭ بەتى ازداپ بولسىن قايتا باستاعانداي. وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ بۇگىنگى تاڭعى 8-دەگى ۇسىنعان مالىمەتتەرىنە قاراپ وسىنداي وي تۇيۋگە بولاتىن سياقتى. دەپارتامەنتتىڭ ءباسپاسوز قىزمەتىنىڭ تاراتقان سوڭعى دەرەكتەرىنە سۇيەنسەك, وبلىستا 136 ۇيدەن سۋ كەتىپتى, ازىرگە 6 جەكە ءۇي قارعىن سۋدىڭ قورشاۋىندا تۇر. ەستەرىڭىزگە سالا كەتەيىك, ايماقتا قالىپتاسقان كۇردەلى جاعدايعا بايلانىستى 140 جەكە ءۇي, 180 اۋلا اۋماعى مەن 110 ساياجاي اۋماعىنداعى ۇيلەردى سۋ باسقان ەدى.
قازىرگى ۋاقىتتا سۋدى سورۋ جۇمىستارى قارقىندى تۇردە جۇرگىزىلۋدە. وسى ۋاقىتقا دەيىن ۇيلەر مەن اۋلا اۋماقتارىنان 34 مىڭ تەكشە مەتر سۋ سورىلىپتى.
اياگوزدەگى جاعداي دا قالىپقا كەلە باستاعان سەكىلدى. اياگوز قالاسىندا 260 تۇرعىن ءوز ۇيلەرىنە ورالىپتى. وقيعا ورنىندا اۋداندىق توتەنشە جاعداي ءبولىمى مەن شىعىس وڭىرلىك اەروۇتقىر قۇتقارۋ جاساعى وكىلدەرىنىڭ جاساقتارى سۋ بوگەتتەرىن بەكىتۋ جۇمىستارىن قولعا الىپ جاتقان كورىنەدى. ال قۇتقارۋشىلار ەلدى مەكەندى تاۋلىك بويى كۇزەتۋدە.
دەپارتامەنتتىڭ ءورت ءسوندىرۋ ءبولىمىنىڭ قىزمەتكەرلەرى وسكەمەندە دە تىنىم تاپپاي, كۇن-ءتۇن دەمەي سۋدى سورۋ جانە اۋلالارداعى قار تازالاۋ جۇمىستارىمەن شۇعىلدانۋدا. ۇيلەرىنەن ۋاقىتشا كوشىرىلگەن 15 ادام ءالى ءوز باسپانالارىنا ورالماعان. تۋىستارىنىڭ ءۇيىن پانالاۋدا. قالادا ازاماتتاردى ورنالاستىرۋ ءۇشىن ء«ۇلبى» حالىققا قىزمەت كورسەتۋ الەۋمەتتىك ورتالىعىنان ورىن ازىرلەنىپتى.
كۇرشىم اۋدانىندا قۇتقارۋشىلار تۇرعىنداردى ءبىر جاعادان ەكىنشى جاعاعا وتكىزۋ جۇمىستارىن جالعاستىرۋدا. تاۋلىك بويى كەزەكشىلىك قويىلعان. وبلىس بويىنشا 50 جىلقى, 125 ءىرى قارا مەن 484 قوي-ەشكى قاۋىپسىز جەرلەرگە جەتكىزىلىپتى.
سوڭعى مالىمەتتەرگە سۇيەنسەك, اپاتتىق قۇتقارۋ جۇمىستارىنا ىشكى ىستەر, توتەنشە جاعدايلار دەپارتامەنتى مەن جەرگىلىكتى اتقارۋشى ورگان وكىلدەرىن قوسا العاندا 708 ادام, 204 تەحنيكا مەن 27 سۋ سورۋ قۇرىلعىسى جۇمىلدىرىلىپتى.
ازامات قاسىم,
«ەگەمەن قازاقستان»
شىعىس قازاقستان وبلىسى
