ونىڭ ارعى جاعى نەگە اپارىپ سوقتىراتىنى ايتپاسا دا بەلگىلى ەمەس پە؟ مۇنىڭ باستى سىرىن جەدەل جاردەم قىزمەتىمەن قامتۋ مۇمكىندىگىنىڭ تومەندىگىنەن ىزدەگەنىمىز ءجون. وسى ولقىلىقتىڭ ورنىن تولتىرۋ ءۇشىن اقتوبە وڭىرىندە بالاماسى جوق جاڭا جوبا جۇزەگە استى. بۇل – وبلىس ورتالىعىنىڭ جاڭادان بوي كوتەرگەن اۋداندارىنىڭ بىرىندە مەملەكەت-جەكەمەنشىك ارىپتەستىگى اياسىندا سالىنعان ورتالىقتاندىرىلعان جەدەل جاردەم بەكەتى. اتالعان نىسان تۇرعىنداردىڭ باستاپقى سانيتارلىق-مەديتسينالىق كومەك الۋىنا تولىق مۇمكىندىك بەرەدى. عيمارات ءۇش قاباتتى كورپۋستان جانە ەكى بلوكتان تۇرادى. جالپى اۋماعى 4133,2 شارشى مەتردى قۇرايتىن ورتالىققا جارتى ميلليوننان استام تۇرعىنى بار اقتوبە قالاسى بويىنشا جەدەل جاردەم قوڭىراۋلارىنىڭ ءبارى دە تۇسەدى. ويتكەنى بۇعان قاتىستى ءىستىڭ ءبارى وسى بەكەتتەن باسقارىلادى. ونىڭ تاعى ءبىر ەرەكشەلىگى – ە فورماتتى تالدامالى-اقپاراتتىق جانە ديسپەتچەرلىك باسقارۋ جۇيەسىمەن جاراقتاندىرىلۋىندا.
قازىر مۇندا 34 جەدەل جاردەم ماشيناسى ىسكە قوسىلعان. قابىلدانعان قوڭىراۋدىڭ ءبارى جاڭا اقپاراتتىق جەلى ارقىلى ساقاداي ساي تۇرعان وسى كولىكتەرگە جىبەرىلەدى. تاعى ءبىر جەتىستىك – ءار دارىگەر پلانشەت ارقىلى قاي كولىكتىڭ قاي تۇستا جۇرگەنىن بىلە الادى. سونداي-اق بەكەت قۇرىلىسى جوبالانعان كەزدە جەدەل جاردەم اۆتوتۇراقتارى مەن تىكۇشاق قونا الاتىن ارنايى قوسىمشا ورىندار دا قاراستىرىلعان.
قازىرگى كەزدە وبلىستىق جەدەل جاردەم قىزمەتى تۇرىك كومپانياسىنا 8 جىل ۋاقىتقا جالعا بەرىلگەن. وسى ۋاقىت ىشىندە ولار وڭىرگە 5 400 000 000 تەڭگە كولەمىندە ينۆەستيتسيالىق قاراجات قۇيماق. ونىڭ بەلگىلى ءبىر بولىگىنە تاعى دا قوسىمشا قۇرىلىستار سالىنىپ, قالانىڭ 3 اۋدانىندا قوسالقى جەدەل جاردەم بەكەتتەرى تۇرعىزىلماق. مۇنىڭ سىرتىندا بۇگىندە مەديتسينالىق كلاستەر قۇرىلعان وڭىردە جەدەل جاردەم قىزمەتىن ودان ءارى دامىتۋ ءۇشىن 3 ميلليارد تەڭگە بولىنگەن. سەگىز جىلدىڭ ىشىندە سالىنعان شەتەلدىك ينۆەستيتسيا تولىقتاي يگەرىلەدى دەپ كۇتىلۋدە. بۇل قاراجاتقا شەتەلدىك بىلىكتى مامانداردىڭ جەرگىلىكتى دارىگەرلەر ءۇشىن شەبەرلىك ساباقتار وتكىزۋ ماسەلەلەرى دە ەنگىزىلگەن. وسى راسىمگە ارنايى كەلگەن رەسەيدەگى ورىنبور وبلىسىنىڭ دەنساۋلىق ساقتاۋ ءمينيسترى گالينا زولنيكوۆا زاماناۋي جەدەل جاردەم قىزمەتىنىڭ قۇرىلىمىنا قىزىعا قارايتىنىن جەتكىزدى.
تەمىر قۇسايىن,
«ەگەمەن قازاقستان»
اقتوبە
