بۇكىل الەم بويىنشا مەملەكەتتىك الەۋمەتتىك باعدارلامالار كەيىنگە شەگەرىلىپ, ۇكىمەتتەر بۇرىنعى مىندەتتەرىنەن باس تارتىپ جاتقان اۋمالى-توكپەلى شاقتا مەملەكەت باسشىسى وسىنداي باتىل باستامالاردى قولعا الىپ وتىر.
وسىلايشا ەلباسىمىز كەزەكتى رەت قازاقستان ءۇشىن حالقىنىڭ الەۋمەتتىك جاعدايى ءاردايىم باسىم باعىت بولىپ سانالاتىنىن ءىس جۇزىندە دالەلدەپ بەردى. ءتىپتى ەكونوميكالىق جاعدايدىڭ ەڭسە تۇسىرگەن كەزىندە دە حالىقتىڭ مۇددەسى جالپىۇلتتىق كۇن تارتىبىندەگى باستى ماسەلە بولىپ قالا بەردى.
وسى رەتتە جاڭا باعدارلامانى شىن مانىندە بىرەگەي ەتىپ, ماڭىزىن ارتتىرا تۇسەتىن بىرنەشە بولىمدەردى اتاپ وتكىم كەلەدى.
ەڭ الدىمەن, بۇل باستامالاردىڭ دەر كەزىندە قولعا الىنىپ وتىرعانىنا ەرەكشە نازار اۋدارعان ءجون. ماسەلەن, ءالى كۇنگە دەيىن ءجۇز مىڭداعان قازاقستاندىق وتباسىلار ءۇشىن باسپانا ماسەلەسى وزەكتى كۇيىندە قالىپ وتىر. ەندى جاڭا «7 – 20 – 25» باعدارلاماسى ارقىلى كوپتەگەن وتانداستارىمىز ءۇشىن ايتارلىقتاي ءتيىمدى يپوتەكالىق زايم الۋعا ناقتى مۇمكىندىك تۋماق. بۇل باعدارلامانى ءساتتى جۇزەگە اسىرا بىلسەك, الەۋمەتتىك احۋال عانا جاقسارىپ قويماي, تۇرعىن-ءۇي قۇرىلىسىنىڭ دامۋىنا, ەكونوميكانىڭ وسۋىنە, جۇمىس ورىندارىنىڭ اشىلۋىنا جانە جەكە كاسىپپەن اينالىسۋدىڭ جاڭا مۇمكىندىكتەرىنە دە تىڭ سەرپىن بەرىلەدى.
سالىق جۇكتەمەسىن تومەندەتۋ باستاماسى دا حالىققا الەۋمەتتىك قولداۋ كورسەتۋدىڭ ءتيىمدى تەتىگى. مەملەكەتتىڭ سالىقتى كوتەرمەي, كەرىسىنشە سالىستىرمالى تۇردە جالاقىسى تومەن ازاماتتاردىڭ جاعدايىنا تۇسىنىستىكپەن قاراۋى دا ۇلگى بولارلىق جايتتاردىڭ ءبىرى.
ەلباسىنىڭ جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ باستاماسى – ستراتەگيالىق قادام. ءتورتىنشى ونەركاسىپتىك رەۆوليۋتسيا جاعدايىندا ەلىمىزگە جوعارى بىلىكتى ينجەنەرلەر مەن اقپاراتتىق تەحنولوگيا جانە روبوت تەحنيكاسى سالاسىنىڭ ماماندارى قاجەت. بۇل – ادام رەسۋرستارىنا قوسىلعان ۇلەس جانە جارقىن بولاشاققا سالىنعان ينۆەستيتسيا.
شاعىن نەسيە بەرۋدى كوبەيتۋ دە كاسىپكەرلىكتى قولداۋ ماقساتىندا ۋاقتىلى قولعا الىنعان شارا. وسى باستامانىڭ ارقاسىندا تەك قالالىق قانا ەمەس, سونداي-اق, اۋىلدىق جەرلەردەگى مىڭداعان قازاقستاندىقتار ءوز كاسىبىن باستاۋعا مۇمكىندىك الادى. سونىڭ ناتيجەسىندە ەلىمىزدىڭ ىشكى جالپى ونىمىندەگى شاعىن جانە ورتا بيزنەستىڭ ۇلەسىن 50 پايىزدان كەم قىلماۋعا باعىتتالعان ستراتەگيالىق ماقساتىمىزعا تاعى ءبىر تابان جاقىنداي تۇسەمىز.
«كوگىلدىر وتىن» ماسەلەسىنە كەلەر بولساق, ەلدى گازبەن قامتاماسىز ەتۋ جونىندەگى اۋقىمدى جوبا قۋاتتى ەكونوميكا جاعىنان ايرىقشا مانگە يە. ودان بولەك, قورشاعان ورتانى قورعاۋ ىسىنە دە بۇل باستامانىڭ تاعى ءبىر ماڭىزدى قىرى رەتىندە قاراۋعا بولادى. ەلباسى اتاپ وتكەندەي, ەگەر استاناعا «كوگىلدىر وتىن» جەتكىزىلسە, تەك ەلوردامىزدىڭ وزىندە زياندى قالدىقتاردىڭ اۋاعا تارالۋى 6 ەسەگە دەيىن تومەندەيدى. بۇل, ارينە, ءوز كەزەگىندە حالقىمىزدىڭ دەنساۋلىعىنا يگى اسەرىن تيگىزەدى.
پرەزيدەنتتىڭ بارلىق باستاماسى جان-جاقتى ساراپتالىپ, زەردەلەنگەنىن جانە ولاردى جۇزەگە اسىرۋعا ناقتى قارجىلاي نەگىز بار ەكەنىن اتاپ وتكەن ءجون. سونىڭ ارقاسىندا قازاقستاندىقتار ەلباسى تاپسىرمالارىن جۇزەگە اسىرۋدىڭ ناتيجەلەرىن تاياۋ جىلداردا سەزىنە الادى.
مەملەكەت باسشىسى بۇل ماڭىزدى باستامالاردىڭ جۇزەگە اسىرىلۋىن باقىلاۋدى «نۇر وتان» پارتياسىنا جۇكتەدى. وسىعان وراي ەلباسى تاپسىرماسى پارتيا جۇمىسىنىڭ الداعى ۋاقىتتاعى نەگىزگى مىندەتى بولاتىنىن ەرەكشە اتاپ وتكىم كەلەدى. بۇل باستامالار الەۋمەتتىك مەملەكەت جانە ۇلتتىق ءال-اۋقاتتىڭ قازاقستاندىق ۇلگىسىن قالىپتاستىرۋ اياسىنداعى ماڭىزدى قادام بولىپ تابىلادى. سوندىقتان پرەزيدەنتتىڭ ستراتەگيالىق باستامالارىنىڭ ورىندالۋىنا ساپالى باقىلاۋدى قامتاماسىز ەتۋ ءۇشىن بارلىق كۇشىمىزدى جۇمىلدىرامىز.
ماۋلەن اشىمباەۆ,
«نۇر وتان» پارتياسى توراعاسىنىڭ ءبىرىنشى ورىنباسارى
