اسىرەسە ايزار ايدوس «قايتەر ەدىك ومىرگە كەلمەگەندە» ءانىن ايتقانداعى مۇڭدى داۋىسى زالداعى جۇرتشىلىقتىڭ كوزىنە جاس ءۇيىردى. قايىرىمدىلىق كونتسەرت باستالماس بۇرىن س.امانجولوۆ اتىنداعى ۋنيۆەرسيتەتتىڭ «شابىت» تەاترىنىڭ ستۋدەنتتەرى مىلقاۋ قىزدىڭ تاعدىرىن باياندايتىن شاعىن قويىلىمدى كورەرمەن نازارىنا ۇسىندى. مادەني شارا اياقتالعاننان كەيىن ء«ۇلبى» مۇمكىندىگى شەكتەۋلى بالالار ورتالىعىنىڭ تاربيەلەنۋشىسى, تسەرەبرالدى سال اۋرۋىمەن اۋىراتىن روللان سىمباتوۆ ساحناعا شاقىرىلىپ, وعان وسى ۋنيۆەرسيتەتتىڭ تۇلەگى, جەكە كاسىپكەر ميراس ساينولدين 200 مىڭ تەڭگەنى تابىس ەتتى.
«نۇرلى جۇرەك» قايىرىمدىلىق كلۋبىنىڭ جەتەكشىسى, وقۋ ورنىنىڭ ساۋلەت فاكۋلتەتىنىڭ 3-كۋرس ستۋدەنتى نۇرگۇل بازىلقىزىنىڭ ايتۋىنشا, روللان ەمدەلۋ ءۇشىن جاقىندا قىتاي ەلىنە بارماق. وندا بارىپ, تەك تىركەلۋ ءۇشىن عانا 2 جارىم ميلليون تەڭگە قارجى كەرەك ەكەن. «بىلتىر «نۇرلى جۇرەكتىڭ» مۇشەلەرى روللاننىڭ ءوز ەلىمىزدە ەمدەلۋىنە 500 مىڭ تەڭگە قارجى جيناپ بەرگەن بولاتىن. ال 2 جارىم ميلليون تەڭگە ءساۋىر ايىنا دەيىن جينالۋعا ءتيىس. ودان كەيىن قانشا رەت شاقىرادى, قانشا قارجى جۇمسالادى. ول جاعى ازىرگە بەلگىسىز», - دەيدى نۇرگۇل.
«نۇرلى جۇرەك» قايىرىمدىلىق كلۋبى وسىدان تۋرا ءبىر جىل بۇرىن جۇمىسىن باستاپتى. كلۋب مۇشەلەرىنىڭ بارلىعى دا - د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرى. ەلۋگە جۋىق مۇشەسى بار كلۋب مۇمكىندىگى شەكتەۋلى, اتا-انا قامقورلىعىنسىز قالعان بالالار مەن الەۋمەتتىك تۇرعىدان از قامتىلعان وتباسىلارعا كومەك كورسەتۋ ماقساتىندا قۇرىلىپتى. «وزدەرىڭىز كورگەندەي, بۇگىن ساحناعا مۇمكىندىگى شەكتەۋلى بالالاردى شىعارىپ, ءان سالعىزدىق. ولار وزدەرىن ەشكىمنەن كەم سەزىنبەسە, قوعامنان وقشاۋ قالماسا دەيمىز. كلۋبىمىزدى اينالامىزداعى كومەككە مۇقتاج, تاعدىر تاۋقىمەتىن تارتىپ جۇرگەن جاندارعا از دا بولسا سەپتىگىمىزدى تيگىزسەك دەگەن نيەتپەن قۇرعان ەدىك.
ءبىز قايىرىمدىلىق اكتسيالارىن, قايىرىمدىلىق كونتسەرتتەرىن, قايىرىمدىلىق جارمەڭكەلەرىن ءجيى ۇيىمداستىرامىز. جارمەڭكەدە ءوز قولىمىزبەن پىسىرگەن تاماقتارىمىزدى ساتىپ, تۇسكەن قارجىنى ناۋقاس بالالاردىڭ قاجەتىنە جۇمسايمىز. جاقىندا مۇمكىندىگى شەكتەۋلى بالالار اراسىندا سپورتتىق سايىس وتكىزدىك. ستۋدەنتتەر بارىنە ۇلگەرۋگە تىرىسادى. ساباقتى دا وقيدى, جۇمىس تا ىستەيدى, قايىرىمدىلىق تا جاسايدى. ءبىر اتتەگەن-ايى, ءبىر جىل ىشىندە قايىرىمدىلىق شارالارىنا دەمەۋشىلەردى تارتا المادىق. بۇل ءۇشىن ءبىزدىڭ كلۋبقا زاڭدى تۇردە تىركەلۋ كەرەك ەكەن. قازىر وسى ماسەلەمەن شۇعىلدانىپ جاتىرمىز», - دەيدى قايىرىمدىلىق كلۋبىنىڭ جەتەكشىسى. وسى شاراعا ايزار ايدوس ەسىمدى مۇمكىندىگى شەكتەۋلى بالانىڭ اجەسى مارجان شابيەۆا ارنايى كەلىپتى. «مەنىڭ نەمەرەم جۇرە المايدى. ارباعا تاڭىلعان. مىنا ستۋدەنتتەرگە مىڭ العىس. كەلىپ, جاعدايىمىزدى ءبىلىپ, سىيلىقتارىن اكەپ تۇرادى», - دەپ ريزاشىلىعىن جەتكىزدى.
كەش سوڭىندا ء«ۇمىت» بالالار ءۇيى, ء«ۇلبى» مۇمكىندىگى شەكتەۋلى بالالار ورتالىعى مەن «اقنيەت» مەكتەپ-ينتەرناتىنىڭ 130 تاربيەلەنۋشىسىنە سىيلىقتار تابىس ەتىلدى.
ازامات قاسىم,
«ەگەمەن قازاقستان»
وسكەمەن
