2018 جىلعى 26 اقپان كۇنى الماتى وبلىسى جامبىل اۋدانىنىڭ اكىمىنەن جامبىل اۋدانىنداعى ۇزىناعاش, ىنتىماق جانە قاينازار اۋىلدارىنداعى توتەنشە جاعدايلاردىڭ سالدارىن جويۋعا قوسىمشا كۇشتەردى تارتۋ ءۇشىن ۇلتتىق ۇلاننىڭ 28237 اسكەري ءبولىمىنىڭ مەكەنجايىنا ءوتىنىش حات كەلىپ تۇسكەن بولاتىن. سونىڭ نەگىزىندە اسكەري ءبولىم كومانديرىنىڭ شەشىمىمەن 26-28 اقپان ارالىعىندا 130-دان اسا ۇلاندىق قۇتقارۋشىلار مەن 10-نان اسا ارنايى تەحنيكالار اپات ورىن العان اۋدانداردا تاڭنان كەشكە دەيىنگى مەرزىمدە قۇتقارۋ جۇمىستارىن جۇرگىزدى, دەپ حابارلايدى ۇلتتىق ۇلاننىڭ 28237 اسكەري ءبولىمى.
ۇلتتىق ۇلاننىڭ قۇتقارۋشى بولىنىستەرى جەكە قۇرامىنىڭ كۇشتەرىمەن جۇرگىزىلگەن جۇمىستار ناتيجەسىندە ۇزىناعاش, قاينازار جانە ىنتىماق اۋىلدارىنا تەحنيكالارمەن 400 توننا قۇم اكەلىنىپ 6000-نان اسا قاپ قۇممەن تولتىرىلدى. 14 كوشەنىڭ بويىندا ورنالاسقان تۇرعىن ۇيلەردىڭ اۋلالارى جينالىپ قالعان سۋلار مەن لايلاردان تازارتىلىپ, ۇيلەردىڭ ىشتەرىنە سۋ وتپەس ءۇشىن قۇم تولتىرىلعان قاپتارمەن تولىق بوگەتتەلدى. سۋ باسىپ قالعان 8 ءۇيدىڭ تۇرعىندارى قاۋىپسىز جەرگە شىعارىلدى. سۋ باعىتىن ارنالارعا بۇرۋ ماقساتىندا ارنايى تەحنيكالارمەن 300 مەتردەن اسا جىرالار جاسالدى. جەكە قۇرامنىڭ كۇشتەرىمەن 4000 مەتردەن اسا تۇرعىن ۇيلەردىڭ اۋلالارى مەن كوشەلەرى جالپى كولەمى 16 توننا لايلاردان تازارتىلدى. سونىڭ ناتيجەسىندە جالپى 80-گە جۋىق تۇرعىن ءۇيدىڭ سۋ باسۋ قاۋپى سەيىلدى.
2018 جىلعى 28 اقپان كۇنى سۋ العان ءوڭىردىڭ احۋالىمەن جانە جاسالىپ جاتقان جۇمىستاردىڭ ناتيجەسىمەن تانىسۋ ءۇشىن الماتى وبلىسىنىڭ اكىمى اماندىق باتالوۆ ارنايى كەلىپ, ۇزىناعاش پەن قاينازار اۋىلدارىن ارالادى. ءوز كەزەگىندە ۇلتتىق ۇلان جاۋىنگەرلەرىنىڭ جۇرگىزىپ جاتقان جۇمىستارىنا ۇلكەن باعا بەرىپ اسكەري ءبولىم كومانديرىنە العىسىن جەتكىزدى.
