استانا ءومىر سۇرۋگە قولايلى مەگاپوليسكە اينالادى

اكىمنىڭ بيىلعى ەلوردا تۇرعىندارىنىڭ الدىنداعى ەسەپتى كەزدەسۋى استانانىڭ 20 جىلدىق مەرەيتويى قارساڭىندا ءوتىپ جاتقانىن اتاپ وتكەن ا.مامين باس شاھار بارشا قازاقستاندىقتىڭ ماقتانىشىنا اينالعانىن, قىسقا مەرزىم ىشىندە قارقىندى دامىعان قالا ەلباسىنىڭ جۇزەگە اسىرعان تاريحي شەشىمى ەكەنىن ايتتى. مەملەكەت باسشىسى استانانىڭ دامۋىنا ەرەكشە ءمان بەرەدى. سوندىقتان ەلوردانى ءومىر سۇرۋگە قولايلى ءارى قاۋىپسىز قالاعا اينالدىرۋ ماقساتىنداعى پرەزيدەنتتىڭ تاپسىرمالارىن ساپالى ورىنداۋ ءۇشىن ۇكىمەت قالالىق اكىمدىككە قولداۋ بىلدىرۋگە ءاردايىم دايىن, دەدى ۇكىمەت باسشىسىنىڭ ءبىرىنشى ورىنباسارى.

بۇدان كەيىن مىنبەگە استانا قالاسىنىڭ اكىمى اسەت يسەكەشەۆ كوتەرىلىپ, ەلوردانىڭ بۇگىنگە دەيىن قول جەتكىزگەن تابىستارى تۋرالى باياندادى.

از ۋاقىتتىڭ ىشىندە تولاعاي تابىستارعا جەتكەن باس شاھاردا بۇگىندە 1 ملن 200 مىڭ ادام تۇراقتى تۇرىپ جاتىر. اكىمنىڭ ايتۋىنشا, تەك بىلتىردىڭ وزىندە قالاعا 233 مىڭ ادام ۋاقىتشا تىركەلگەن. بۇل كورسەتكىش جىل سايىن ءوسىپ كەلەدى. البەتتە, حالىق سانىنىڭ كوبەيۋى الەۋمەتتىك-ەكونوميكالىق سالالارعا قوسىمشا سالماق تۇسىرەتىنى بەلگىلى. سوعان قاراماستان باس قالانىڭ دامۋى باياۋلاپ قالماي, بارلىق ماقساتتى ينديكاتورلارعا قول جەتكىزگەن. ايتالىق, ءولىم كورسەتكىشى 9 پايىزعا, انا مەن بالا ءولىمى 38 پايىزعا, ونكولوگيالىق اۋرۋعا شالدىققاندار 9,7 پايىزعا, تۋبەركۋلەزبەن اۋىرعاندار سوڭعى بەس جىلدا 28 پايىزعا ازايعان.

بىلتىر 19 مىڭ جاڭا جۇمىس ورنى اشىلسا, ونىڭ 15 مىڭى شاعىن جانە ورتا بيزنەس سالاسىندا قۇرىلعان.

استانا ەلىمىزدىڭ باس قالاسى بولعاندىقتان وعان جۇكتەلەر جاۋاپكەرشىلىك تە ۇلكەن. قالا قاي جاعىنان دا وزگە وڭىرلەرگە ۇلگى بولۋى ءتيىس. وسىعان بايلانىستى بۇگىندە قالانى ەڭ قاۋىپسىز ءارى ءومىر سۇرۋگە قولايلى شاھارعا اينالدىرۋ ماقساتىندا استانانى 2020 جىلعا دەيىنگى دامىتۋ باعدارلاماسى قابىلدانعان. مەملەكەت باسشىسىنىڭ تاپسىرماسىن ەسكەرە وتىرىپ ازىرلەنگەن باعدارلامالىق قۇجاتتىڭ باستى ماقساتى – ەلوردالىق ءاربىر تۇرعىننىڭ, ءاربىر وتباسىنىڭ ءومىر ءسۇرۋ ساپاسىن ارتتىرىپ, حالىقپەن تىكەلەي قاتىستى الەۋمەتتىك سالالاردى, اتاپ ايتقاندا, ءبىلىم, دەنساۋلىق, قوعامدىق كولىك, تۇرعىن ءۇي جاعدايىن جاقسارتۋ. ەكىنشى ماقسات – تۇرعىنداردىڭ تابىسىن ارتتىرۋ. قالانىڭ ءاربىر تۇرعىنىنىڭ كىرىسى جاقسى ءومىر سۇرۋىنە جەتكىلىكتى بولۋى ءتيىس, ءبىز ەلوردالىقتاردىڭ تابىس تابۋىنا مۇمكىندىك جاساپ, بيزنەس باستامالارىنا قولداۋ كورسەتۋدى ءوزىمىزدىڭ نەگىزگى مىندەتىمىز سانايمىز, دەيدى ءا.يسەكەشەۆ.

سونىمەن, حالىقتىڭ جاقسى ءومىر سۇرۋىنە الدىمەن نە كەرەك؟ ارينە, حالقىنىڭ سانى كۇن ساناپ كوبەيگەن استانادا ءبىرىنشى كەزەكتە باسپانا ماسەلەسى وزەكتى تۇر. سوندىقتان قالا بيلىگى الدىمەن وسى ماسەلەنى شەشۋدىڭ جولدارىن قاراستىرىپ, كەلەشەكتە ءاربىر تۇرعىنعا كەمى 30 شارشى مەتر تۇرعىن ءۇي بولاتىنداي جاعدايعا قول جەتكىزۋدى ماقسات ەتىپ وتىر.

بىلتىر قالادا ءبىر جىل ىشىندە 2,36 ملن شارشى مەتر باسپانا پايدالانۋعا بەرىلگەن. بۇل – رەكوردتىق كورسەتكىش, دەدى اكىم. سونىڭ ىشىندە مەملەكەتتىڭ قارجى كوزى ەسەبىنەن 7 تۇرعىن ءۇي كەشەنى تۇرعىزىلعان. ءسويتىپ 1062 وتباسى پاتەرمەن قامتىلعان. بۇعان قوسا, جەڭىلدەتىلگەن نەسيەمەن جانە ارەندالىق باسپانالار سالۋ نارىقتاعى ۇيلەردىڭ باعاسىن تومەندەتۋگە الىپ كەلگەن. مەملەكەتتىك باسپانانىڭ بۇگىندە شارشى مەترى 180 مىڭ تەڭگەنىڭ اينالاسىنان اسپاي تۇر.

تۇرعىنداردى باسپانامەن قامتۋدىڭ تاعى ءبىر جولى – قالاداعى توزىعى جەتكەن ۇيلەردى سىرىپ, وندا تۇرعان حالىقتى جاڭا قونىسقا كوشىرۋ. وسىعان بايلانىستى قولعا الىنعان قاناتقاقتى جوبانىڭ ءبىرىنشى كەزەڭى اياقتالىپ, اپاتتى ۇيلەردى ءسۇرۋ ناتيجەسىندە 3449 وتباسى باسپانالى بولعان. توزىعى جەتكەن 228 ءۇيدىڭ 15 مىڭعا جۋىق تۇرعىنى جاڭا قونىسقا كوشكەن. بىلتىردىڭ وزىندە 111 اپاتتى ۇيدەن 1746 وتباسى باسپاناعا قول جەتكىزىپتى.

ەندى بيىل اتالعان جوبانىڭ ەكىنشى كەزەڭىن جۇزەگە اسىرۋ باستالعان. جوبا ىسكە اسىرىلاتىن بەس جىل ىشىندە قالاداعى ابدەن ەسكىرگەن 150 كوپ پاتەرلى ءۇيدى ءسۇرىپ تاستاۋ جوسپارلانىپ وتىر.

قالا تۇرعىندارىنا قولايلى جاعداي جاساۋدىڭ تاعى ءبىر جولى – ءبىلىم سالاسىن جەتىلدىرىپ, بالاباقشا ماسەلەسىن شەشۋ. ءا.يسەكەشەۆتىڭ ايتۋىنشا, ەلوردانىڭ ءبىلىم سالاسىن قارجىلاندىرۋ سوڭعى ءتورت جىلدا 95 پايىزعا وسكەن. بىلتىر بۇل كورسەتكىش 53,9 ملرد تەڭگەنى قۇراسا, بيىل 60,5 ملرد تەڭگەگە جەتىپ وتىر. ال سوڭعى جەتى جىل ىشىندە بالاباقشا جاسىنداعى بالالاردىڭ سانى ەكى ەسەگە كوبەيگەن. سوعان قاراماستان 2017 جىلى بالدىرعانداردى مەكتەپكە دەيىنگى مەكەمەمەن قامتۋ 70,6 پايىزدى قۇراعان. ال بيىلعى قاڭتار ايىنداعى جاعداي بويىنشا بالاباقشامەن قامتۋ 78 پايىزعا جەتىپتى. بولاشاقتا بۇل ماسەلە دە رەتىمەن شەشىلەتىنىن اكىم اتاپ ءوتتى. الداعى ۋاقىتتا مەملەكەت پەن ۇلتتىق كومپانيالاردىڭ ەسەبىنەن 960 ورىنعا ارنالعان 4 بالاباقشا پايدالانۋعا بەرىلەدى. سونىمەن قاتار الداعى ءۇش جىلدا 27 مەكتەپ پەن ولارعا جاپسارلاس 10 عيمارات سالۋ جوسپارلانىپ وتىر جانە بيىلعى جاڭا وقۋ جىلىندا بارلىعى 6900 ورىندىق 6 مەكتەپتى پايدالانۋعا بەرۋ قاراستىرىلعان.

ەلوردالىقتاردىڭ ءومىر ءسۇرۋ ساپاسىن جاقسارتۋدىڭ تاعى ءبىر ينديكاتورى – حالىقتىڭ دەنساۋلىعىن قورعاۋ ەكەنىن ايتقان قالا اكىمى بۇل سالاعا بولىنگەن قاراجات كولەمى دە جىل سايىن كوبەيىپ كەلە جاتقانىن ايتتى. استانانىڭ مەديتسينا سالاسى ادامداردىڭ ءومىر جاسىن ۇزارتۋعا, ەمدەۋ-دياگنوستيكاسىن جەتىلدىرۋگە, اۋرۋ مەن ءولىم كورسەتكىشىن تومەندەتۋگە باعىتتالماق. ول ءۇشىن كەزەكسىز ەمحانا, ءارتۇرلى ءموبيلدى قوسىمشالار ارقىلى حالىققا مامانداندىرىلعان مەديتسينالىق كەڭەس بەرۋ, كول-ورتالىقتار ارقىلى ارىز-شاعىممەن جۇمىس ىستەۋ سەكىلدى جۇمىستارعا دەن قويىلماق.

الداعى ۋاقىتتا 8 مىڭنان استام مەديتسينالىق قىزمەتكەردى شەت مەملەكەتتەردە وقىتۋ جوسپارلانىپ وتىرعانىن ايتقان ءا.يسەكەشەۆ ءوندىرىس, ينتەرناتسيونالنىي, ايناكول, جاعالاۋ تۇرعىن الاپتارىندا جاڭا امبۋلاتورلىق-ەمحانالىق كەشەندەر اشىلاتىنىن جەتكىزدى. سونداي-اق ەلوردادا تۋ كورسەتكىشىنىڭ جوعارى ەكەنى ەسكەرىلىپ, قالادا تاعى ءبىر پەريناتالدى ورتالىق جانە كوپ سالالى اۋرۋحانا مەن وڭالتۋ ورتالىعى بوي كوتەرمەك.

قالا اكىمى ەسەپتى كەزدەسۋىندە ءوزى دە وسى شاھاردىڭ تۇرعىنى رەتىندە استانانى گۇلدەنگەن مەگاپوليس رەتىندە كورگىسى كەلەتىنىن ايتىپ, ەلىمىزدىڭ باس قالاسى جان-جاقتى كوركەيگەن, دامىعان, اقىلدى دا زاماناۋي شاھارعا اينالۋى ءۇشىن ءاربىر تۇرعىن وعان ۇلەس قوسۋى كەرەكتىگىن ەسكە سالدى جانە استانا قىزمەت كورسەتۋ جاعىنان دا, ينفراقۇرىلىمدىق تۇرعىسىنان دا كورىكتى ورىنعا اينالاتىنىنا سەنىم ءبىلدىردى.

ءا.يسەكەشەۆتىڭ بايانداماسىنان كەيىن تۇرعىندار قالا اكىمىنە وزدەرىن الاڭداتقان ساۋالدارىن قويدى. ەسەپتى كەزدەسۋ استانا قالاسى اكىمدىگىنىڭ Facebook الەۋمەتتىك جەلىسىندەگى رەسمي پاراقشاسىندا ونلاين رەجىمدە كورسەتىلدى جانە حالىقتىڭ مەيلىنشە كوپ بولىگىن قامتۋ ماقساتىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن  س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە تىكەلەي ونلاين-ترانسلياتسيا ۇيىمداستىرىلدى.

قىمبات توقتامۇرات,

«ەگەمەن قازاقستان»