ۇكىمەتتىڭ ءباسپاسوز ورتالىعىندا وتكەن بريفينگكە «سامۇرىق-قازىنا» اق وپەراتسيالىق قىزمەت جونىندەگى باسقارۋشى ديرەكتورى الىشەر پىرمەتوۆ, ساتىپ الۋ مەتودولوگياسى قىزمەتىنىڭ باسشىسى مۇحيت ماگاجانوۆ, جۇرتشىلىقپەن بايلانىس دەپارتامەنتىنىڭ ديرەكتورى سەرگەي كۋيانوۆ, «سامۇرىق-قازىنا كونتراكت» جشس باس ديرەكتورىنىڭ ورىنباسارى بولات جۇماعاليەۆ قاتىستى. جيىندا «سامۇرىق-قازىنا» ۇاق-تىڭ» ساتىپ الۋ جۇيەسىن جەتىلدىرۋ جايى ءسوز بولدى.
«سامۇرىق-قازىنانىڭ» ساتىپ الۋ قىزمەتىن جەتىلدىرۋ ساتىپ الۋلاردى باقىلاۋدىڭ بارلىق سالالارىنا قاتىستى. وسىعان بايلانىستى كامەرالدى باقىلاۋ ەنگىزىلىپ, ونىڭ اياسىندا تاۋەكەلدەر بەيىنى انىقتالادى. اۆتوماتتاندىرۋ ءوزىنىڭ ماقساتىنا ساي تاۋەكەلدەر بەيىنىن قاداعالاپ وتىرۋعا سەپتىگىن تيگىزەدى. بۇگىنگى كۇنى جۇمىس ىستەپ تۇرعان «تەندەر سق» جۇيەسى تاۋەكەلدەردىڭ شامامەن 18 پايىزىن قاداعالاي المايدى. ال جاڭادان ەنگىزىلەتىن جۇيە تاۋەكەلدەردىڭ جارتىسىنان استامىن قامتيدى», دەدى جيىندا «سامۇرىق-قازىنا كەلىسىمشارت» جشس باس ديرەكتورىنىڭ ورىنباسارى ب.جۇماعاليەۆ.
ءمالىم بولعانداي, ەلەكتروندى ساتىپ الۋلاردى جۇزەگە اسىراتىن جاڭا پورتال بيىلعى جىلدىڭ شىلدە ايىندا ىسكە قوسىلادى. قازاقستاندىق كومپانيا قۇراستىرعان پورتالدا تاۋار, جۇمىس جانە قىزمەت قاجەتتىلىگىن جوسپارلاۋدان باستاپ, ساتىپ الۋدى وتكىزۋ, شارتتاردى بەكىتۋ جانە ىسكە اسىرۋعا دەيىنگى بارلىق كەزەڭ ورىندالادى. ساتىپ الۋ بارىسىنىڭ ءبىر پلاتفورمادا جۇزەگە اسىرىلۋى – قورعا ونلاين تارتىپتە ءتيىستى پروتسەدۋرالارعا ساراپتاما جۇرگىزۋگە, ساپالى جانە ءبىرتۇتاس تالداۋ جاساۋعا, قاتەلىكتەردى انىقتاۋعا, جەتكىزۋشىلەر تارابىنان تۇسكەن شاعىمدارعا جەدەل ارەكەت ەتۋگە مۇمكىندىك بەرەدى.
ەلەكتروندى ساتىپ الۋدىڭ جاڭا الاڭى تاپسىرىس بەرۋشىلەر مەن جەتكىزۋشىلەرگە ەلەكتروندى پلاتفورمانى قولدانۋ كەزىندە قولايلى جاعدايلار جاسايدى. بۇل ءوز كەزەگىندە ەلەكتروندى الاڭدى سۇيەمەلدەۋ شىعىندارىن قىسقارتىپ, ساتىپ الۋدىڭ اشىقتىعىن Blockchain تەحنولوگياسى ارقىلى قامتاماسىز ەتەدى. بۇگىندە ساتىپ الۋ ەرەجەلەرىنىڭ نەگىزگى تالاپتارى جانە نورمالارى بويىنشا 117 «تاۋەكەل بەيىنى» ازىرلەنگەن جانە بەلگىلەنگەن, كريتەريلەرى انىقتالعان جانە تاۋەكەلدەردى باعالاۋ ناقتىلانعان. ىسكە قوسىلاتىن جۇيە 77 تاۋەكەل بەيىنىن قامتۋعا مۇمكىندىك بەرەدى. بۇل جالپى كولەمنىڭ 65 پايىزدان استامىن قۇرايدى. قالعان 34 پايىزدان استامى كامەرالدى باقىلاۋ ارقىلى ساراپتالادى. ماسەلەن, ەگەر تاپسىرىس بەرۋشى ساتىپ الۋ كەزىندە ساتىپ الۋ ەرەجەسىن بۇزسا, وندا جۇيە اۆتوماتتى تۇردە وسى سەكىلدى «تاۋەكەلدەردى» بۇزۋشىلىقتار ءتۇرى بويىنشا ءتيىستى فايلدا ساقتايدى جانە ولاردى قاراستىرۋ ءۇشىن قوردىڭ ساتىپ الۋ ماسەلەلەرى جونىندەگى ۋاكىلەتتى ورگانىنا جىبەرەدى.
دينارا بىتىك,
«ەگەمەن قازاقستان»
