پاروليمپيادا ويىندارىندا ەلىمىزدىڭ اتىنان التى سپورتشى ونەر كورسەتەدى. ولاردىڭ ساپىندا شاڭعى جارىسى مەن بيوتلون بويىنشا باق سىنايتىن قايرات قاناپين, الەكساندر گەرليتس جانە سەرگەي ۋسسولتسەۆ, سونداي-اق شاڭعىمەن سىرعاناۋشىلار دەنيس پەترەنكو, الەكساندر كوليادين, جاڭىل بالتاباەۆالار بار. تارتىستى دودادا ەل بايراعىن ۇستاۋ قۇرمەتى قايرات قاناپيننىڭ ەنشىسىنە بۇيىرعان. شىعارىپ سالۋ راسىمىندە ءتورت جىل بۇرىن لوندوندا وتكەن جازعى پاروليمپيادا ويىندارىنىڭ جەڭىمپازى زۋلفيا عابيدۋللينا سپورتشىلارعا تابىس تىلەپ, ەل تۋىن قاناپينگە ءوز قولىمەن تاپسىردى.
ەستەرىڭىزدە بولسا سوچيدە وتكەن قىسقى پاروليمپيادا ويىندارىنا بۇل سپورتشىلاردىڭ ۇشەۋى قاتىسقان ەدى. جارىس قورىتىندىسى بويىنشا الەكساندر كوليادين جيىرما شاقىرىمدىق جەكەلەگەن جارىستا 13-ءشى, سپرينت بويىنشا 33-ءشى ورىنعا تۇراقتاعان. ال قايرات قاناپين سپرينتتە 13-ءشى, ون شاقىرىمدىق جەكەلەگەن جارىستا 17-ءشى ورىننان كورىنسە, جاڭىل بالتاباەۆا بەس شاقىرىمدىق جەكەلەگەن جارىس جولىندا 23-ءشى ورىنعا تۇراقتاعان ەدى. ول كەزدە جىبەرگەن ولقىلىقتىڭ ورنىن تولتىرامىز دەگەن پاروليمپياداشىلار, جارىستا ەل نامىسى ءۇشىن بار مۇمكىندىگىن سالاتىنىن ايتتى.
«بىزگە سەنىم ارتىپ وتىرعان وتانداستارىمىزدىڭ, جاتتىقتىرۋشىلارىمىزدىڭ ءۇمىتىن اقتاۋ ءۇشىن ايانبايمىز. جارىسقا تىڭعىلىقتى دايىندالدىق. پاروليمپيادا ويىندارىنىڭ اشىلۋ سالتاناتىندا قازاقستان بايراعىن الىپ شىعاتىنىما قۋانىشتىمىن. بۇل ماعان ارتىلعان ۇلكەن جاۋاپكەرشىلىك. ءبارى جاتتىعۋداعىداي ساتىمەن بولادى دەپ ۇمىتتەنەمىن», دەيدى قايرات قاناپين.
بيىلعى پاروليمپيادا ويىندارىندا بارلىعى 80 مەدال جيىنتىعى ساراپقا سالىنادى. بۇل سوچيدە وتكەن قىسقى وليمپيادامەن سالىستىرعاندا 8 مەدال جيىنتىعىنىڭ ارتقانىن كورسەتەدى. ۇلتتىق شتاتتىق كوماندالار جانە سپورت رەزەرۆى ديرەكتسياسى ديرەكتورىنىڭ ورىنباسارى الەكسەي كريۋكوۆتىڭ سوزىنشە التىن مەدال العان سپورتشىعا 250 مىڭ, كۇمىس جۇلدەگەرگە 150 مىڭ, قولا مەدالعا قول جەتكىزگەندەرگە 75 مىڭ اقش دوللورى كولەمىندە اقشالاي سىياقى بەرىلمەك. وعان قوسا پاروليمپيادا ويىندارىندا 4-ورىن العان سپورتشىعى 30 مىڭ, 5-ورىنعا 10 مىڭ, 6-ورىنعا 5 مىڭ اقش دوللارى كولەمىندە قوماقتى سىياقى تابىستالاتىن بولادى.
– باسقا مەملەكەتتەرمەن سالىستىرساق قازاقستاندا پاروليمپيادا جەڭىمپازدارى مەن جۇلدەگەرلەرىنە بەرىلەتىن سىياقى مولشەرى ەداۋىر كوپ. بۇل قارسىلاستارىن عانا ەمەس, باسىنداعى اۋىر دەرتىن جەڭۋگە تالپىنعان جارىمجان سپورتشىلارعا جاسالعان ۇلكەن قولداۋ دەپ تۇسىنۋگە بولادى. ارتىلعان سەنىم مەن العا قويىلعان ماقسات ورىندالادى دەپ سەنەمىز, – دەيدى الەكسەي كريۋكوۆ.
بىزدە ءوز كەزەگىندە گازەتىمىزدىڭ قالىڭ وقىرماندارىنىڭ اتىنان سپورتشىلارىمىزدىڭ جەڭىسپەن ورالۋىنا تىلەكتەستىك بىلدىرەمىز.
ارمان وكتيابر,
«ەگەمەن قازاقستان»
الماتى
