قارا كۇزدە جاۋعان مول جاڭبىردان كەيىن, توپىراق قاباتىنداعى توڭنىڭ قالىڭدىعى 20-50 سانتيمەتر تەرەڭدىكتە بولعاندىقتان ەرىگەن قار سۋى سىڭبەي, جىلعا-جىلعانى قۋالاي اعىپ جاتىر. قىزىل سۋدىڭ كەنەتتەن كوتەرىلۋى تاۋ ەتەگىندەگى اۋىلداردى ابىگەرگە سالۋدا. اسىرەسە ويپاڭدا ورنالاسقان اۋداندارداعى جەكەلەگەن ۇيلەردىڭ اۋلاسىن سۋ شايىپ, كوشەلەر تاسقىننىڭ استىندا قالدى. اپتا باسىندا تالدىقورعان قالاسىنداعى «قىزىلتاس» ساياجايىن ەرىگەن سۋ شايىپ كەتىپ, توتەنشە جاعداي تۋىنداسا, ىلە اۋدانىنداعى اششىبۇلاق اۋىلدىق وكرۋگى اۋماعىندا دا بىرنەشە اۋىلعا قىزىل سۋ جايىلىپ, تۇرعىندار جەرگىلىكتى بيلىكتەن كومەك سۇراۋعا ءماجبۇر بولدى.
سوڭعى ەكى كۇن بويىنا الماتى قالاسى ماڭىنداعى ەڭبەكشىقازاق, تالعار, قاراساي, جامبىل اۋداندارىنىڭ بىرنەشە اۋىلىندا سۋدان قۇتقارۋ جۇمىستارى تولاسسىز ءجۇرىپ جاتىر. الماتى وبلىستىق توتەنشە جاعدايلار دەپارتامەنتىنىڭ مالىمەتىنشە, اقپاننىڭ 27-28 كۇندەرى جامبىل اۋدانىنىڭ ۇزىناعاش, قاينازار اۋىلدارىنداعى جاعداي كۇردەلەنىپ, جەرگىلىكتى دەڭگەيدە توتەنشە جاعداي جاريالانعان. قازىر اۋدانداعى سۋدان قۇتقارۋ جۇمىستارىمەن ارنايى شتاب اينالىسىپ جاتىر. ابىرويى بولعاندا ادام شىعىنى جوق. ال اۋلاسىنا سۋ جايىلىپ, ۇيلەرىنە سۋ كىرگەن تۇرعىندارعا كومەك كورسەتىلۋدە. اۋىلدار تاۋ ەتەگىندەگى ورنالاسقاندىقتان سەل ءجۇرۋ قاۋپى ءالى دە جوعارى. اۋماقتاعى وزەندەر مەن دامبالار قاتاڭ باقىلاۋعا الىنعان.
ال ءبىر تاۋلىك ىشىندە تالعار اۋدانىندا 62 ءۇيدىڭ اۋلاسىن سۋ شايىپ, تۇرعىندار ارنايى تەحنيكا مەن مامانداندىرىلعان توپتىڭ قىزمەتىنە جۇگىنگەن. قاراساي اۋدانىندا دا 82 ۇيگە قىزىل سۋ كىرۋ قاۋپى تۋىنداپ, ءتيىستى شارالار جاسالعان. ەڭبەكشىقازاق اۋدانى, بايتەرەك ەلدى مەكەنىندەگى 15 ءۇيدىڭ تۇرعىندارى دا ەرىگەن قار سۋىنىڭ قۇرساۋىندا قالىپ, قۇتقارۋشىلارعا قوڭىراۋ شالعان ەكەن.
– 27 اقپان كۇنى كەشكىسىن تالعار اۋدانىنىڭ تۇزدىباستاۋ اۋىلى ماڭىنداعى ويپاتقا جينالعان قار سۋىنىڭ كولەمى 50 تەكشە مەتر اسىپ كەتىپ, اۋىل تۇرعىندارىنىڭ ومىرىنە قاۋىپ ءتوندىردى. قۇتقارۋ قىزمەتى جەدەل ارەكەت ەتىپ, قاۋىپتى كوشەلەردەن 205 ءۇيدىڭ تۇرعىندارى كوشىرىلدى. مىڭعا جۋىق ادامنىڭ قاۋىپسىزدىگى قامتاماسىز ەتىلدى. سول سياقتى جامبىل اۋدانىنىڭ ۇزىناعاش اۋىلىندا 120 ءۇيدى, قاينازار اۋلىندا 50 ءۇيدى سۋ باسۋ قاۋپىنەن ساقتاندىرىپ, ارنايى ماماندار ءتۇنى بويى كەزەكشىلىك جاسادى, - دەپ حابارلادى بىزگە وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ وكىلى ازامات جۇرتباەۆ.
قازىر وبلىستىڭ بارلىق اۋداندارىندا ارنايى شتابتار قۇرىلىپ, سۋ تاسقىنىنا قارسى شارالار قولعا الىنىپ جاتىر. ال قار كوشكىنى قاۋپى مەن اعىن سۋ قاپتاۋى مۇمكىن اۋماقتاردا وبلىستىق توتەنشە جاعداي دەپارتامەنتىنىڭ قۇتقارۋ وتريادتارى, «قازسەلدەنقورعاۋ» مەكەمەسىنىڭ ماماندارى جانە ىشكى ىستەر ورگاندارى قىزمەتكەرلەرى مەن اسكەريلەردەن قۇرىلعان ارنايى توپ كەزەكشىلىك ەتۋدە.
قالماحانبەت مۇقامەتقالي,
«ەگەمەن قازاقستان»
الماتى وبلىسى.
