فوتو: uniface.kz
«قالادا گۇل باقتارىن, ساياباقتاردى جانە باسقا دا قوعامدىق ورىنداردى اباتتاندىرۋ جۇمىستارى جۇرگىزىلۋدە. استانانىڭ باسقا دا تۇرعىندارى سياقتى مەن دە قالامىزدى گۇلدەنگەن مەگاپوليس رەتىندە كورگىم كەلەدى», دەپ مالىمدەدى ەلوردا اكىمى اسەت يسەكەشەۆ حالىق الدىنداعى ەسەپتىك كەزدەسۋى كەزىندە.
قازىرگى تاڭدا ەلوردادا 10 ساياباق, 4 جەلەكجول مەن 95 گۇل باعى بار. «الماتى» اۋدانىندا اقبۇلاق وزەنىنىڭ جاعاسىنداعى بۇرىنعى جاياۋ جۇرگىنشىلەرگە ارنالعان جولدارى, بالالارعا ارنالعان ويىن الاڭدارى مەن سپورتتىق الاڭدارى بار ءىرى قازانشۇڭقىردىڭ ورنىندا پايدا بولعان گۇل باعىندا جۇرگىزىلگەن جايلاستىرۋ جۇمىستارىن قوسا العاندا 2017 جىلى مۇنداي 6 ورىن اشىلعان بولاتىن.
بۇگىنگى تاڭدا قالادا 714 مىڭ اعاش بار. تاعى دا 2,1 ملن كوشەت قالا اينالاسىنا «ەلوردانىڭ جاسىل بەلدەۋى» اياسىندا وتىرعىزىلدى.
ء«بىز قوعامدىق كەڭىستىككە زور ءمان بەرەمىز. بيىل ءبىز 9 گۇل باعى مەن جەلەكجولداردى جايلاستىراتىن بولامىز. قالالىقتاردىڭ وتىنىشتەرى ەسكەرىلىپ, دەمالىس ورىندارىنىڭ كوبىسى قالانىڭ ەسكى بولىگىندە اپاتتى جانە كونە ۇيلەر سۇرىلگەن جەرلەردە پايدا بولادى. ولاردىڭ بارلىعى سپورتتىق الاڭدارمەن جابدىقتالماق», دەپ اتاپ ءوتتى اكىم.
جازدا ەلوردادا بوتانيكالىق باق اشىلادى. ونىڭ اۋماعى تروپيكالىق بەلدەۋدىڭ كليماتتىق ەرەكشەلىكتەرىمەن تولىقتاي قامتاماسىز ەتىلىپ, مۇندا ءشولدى جەرلەردەگى وسىمدىكتەر وسىرىلمەك.
«ول تانىمدىلىق جاعىنان قىزىقتى, بارلىق سەرۆيستىك ينفراقۇرىلىمى بار كورىكتى ورىنعا اينالاتىن بولادى», دەدى ءا. يسەكەشەۆ.
بۇگىنگى كۇنگە دەيىن 24 مىڭنان استام اعاش پەن 12 مىڭنان استام كوشەت وتىرعىزىلىپ, جاساندى سۋ قويماسى سالىندى. قالادا جالپى اۋدانى 42 مىڭ شارشى مەتردەن اساتىن ۆەلوجولدار, اۋدانى 23 مىڭ شارشى مەتردى قۇرايتىن جۇگىرۋ جولدارى, جالپى اۋدانى 86 مىڭ شارشى مەتردەن اساتىن كەسپە تاستار توسەلگەن جولدار سالىندى.
سونداي-اق, شىلدە ايىندا وزەن جاعاسىنداعى ساياباقتىڭ ءبىرىنشى كەزەگىنىڭ قۇرىلىسى اياقتالدى. قالامىزدا تۇڭعىش رەت شيە, الما, ەمەن جانە شەتەن اللەياسى پايدا بولادى.
