ويتكەنى بوياۋدان وي ىزدەيتىن سۋرەتشى ءار شىعارماسىندا كورەرمەنىن پىكىرتالاسقا تارتاتىن سەكىلدى. راسىندا, سولاي. گەورگي ميحايلوۆيچ ءتۇرلى جانردا, ءتۇرلى تەحنيكامەن جۇمىس ىستەيدى. بۇل جولعى كورمەسىن ول « ۇلى ەسىمدەر – 2» دەپ اتاپتى. وعان سۋرەتشى 2009 – 2017 جىلدار ارالىعىندا ارالاس تەحنيكامەن ورىنداعان 34 تۋىندىسىن ۇسىندى. بۇل جولعى ىلىنگەن تۋىندىلار سۋرەتشىنىڭ 2015 جىلى « ۇلى ەسىمدەر» اتتى اتپەن جاساعان كورمەسىنىڭ جالعاسى بولىپ تابىلادى. كوپ وقيتىن, ونەردىڭ ءار سالاسىن جەتىك بىلەتىن جانە اقىندىقتان دا قۇرالاقان ەمەس سۋرەتشى, مۋزىكا جانە ادەبيەتتەگى ۇلى ەسىمدەردىڭ شىعارمالارىنان تۇيگەنىن قىلقالام ارقىلى قاعازعا تۇسىرەدى. سول ارقىلى ونەر مەن ادەبيەت الەمىندەگى ۇلى ەسىمدەرگە تاعزىم ەتەدى. سۋرەتشى وقىعان كىتاپتارى جانە ءومىربايانداردان, سۇيىكتى كارتينالارى مەن مۋزىكالىق شىعارمالاردان العان اسەرىنىڭ نەگىزىندە الەمدىك مادەنيەتتەگى دانىشپان تۇلعالاردى ءوز قيال كورىنىسىندە بەينەلەيدى.
جاڭا گرافيكالىق سەرياسىندا گەورگي ميحايلوۆيچ قازاقتىڭ كەمەڭگەر اقىنى ابايدىڭ, ورىس اقىندارى مارينا تسۆەتاەۆا, اننا احماتوۆا مەن نيكولاي گۋميلەۆ, فرانتسۋز اقىنى شارل بودلەر, ۆەنگەر كومپوزيتورى فەرەنتس ليست, نيدەرلاندىق سۋرەتشى ۆان گوگ, ورىس كومپوزيتورلارى سەرگەي پروكوفەۆ, يگور ستراۆينسكي جانە الەمدىك تانىمال باسقا دا ۇلى تۇلعالاردىڭ شىعارمالارىنان تۇيگەنىن قاعاز بەن بوياۋ ارقىلى كورەرمەنىنە ۇسىنادى.
– مەنىڭ بۇكىل ايتارىم كورمەدە ىلىنگەن شىعارمالارىمدا. ال مەنىڭ ويىم كورەرمەن پىكىرىمەن سايكەس كەلۋى مىندەتتى ەمەس, مەن تەك كورەرمەنىمدى ويعا تارتتىم. مىسالى, ابايدىڭ «قارا سوزدەرىندەگى», الەكساندر كۋپريننىڭ «پاگانينيدىڭ سكريپكاسى» اڭگىمەسىندەگى ايتىلعان ويلاردى, مايا پليسەتسكايانىڭ بيمەن جاساعان كارمەن وبرازىن قالاي ءتۇسىنۋى اركىمنىڭ ءوز ەركىندە. اركىم ولاردان ءوزىنىڭ ىشكى قالاۋىن كورمەك, – دەيدى گەورگي ميحايلوۆيچ.
سۋرەتشىنىڭ پىكىرىنشە, ۇلى ادامدار ماڭگى ءومىر سۇرەدى, ولاردىڭ ويى مەن جاساعان ءىسى كەيىنگىنىڭ رۋحاني ازىعى.
ءنازيرا جارىمبەت,
«ەگەمەن قازاقستان»
قوستاناي
