مەزگىل-ۋاقىتتىڭ رۋحاني سۇرانىسىمەن ومىرگە كەلگەن, ەل ىشىندە «قۇرمانعازى وركەسترى» دەگەن اتاۋعا يە بولعان مەملەكەتتىڭ باس مۋزىكالىق ونەر ورداسىنىڭ شيرەك عاسىرداعى جەتىستىگى شامعون اتىمەن تىعىز بايلانىستى. سىرلى دا سىرباز كۇيلەرگە تولى ءتولتۋما مۋزىكالىق ونەرىمىزدى ءبىر وركەستردىڭ بويىنا جيناقتاپ, وعان قۇرمانعازىنىڭ اتىن بەرىپ, «وركەستردىڭ كىندىك اتاسى» اتانعان ۇلى احمەت جۇبانوۆتىڭ ءوز قولىنان ديريجەردىڭ تاياقشاسىن العان شامعون ساعاددين ۇلى قازاق ءان-كۇيىنىڭ دۇنيە جۇزىنە تانىلۋى ءۇشىن ماڭداي تەرىن اياعان جوق. ىقىلاس, قۇرمانعازى, داۋلەتكەرەي, تاتتىمبەت, دينا, قازانعاپتىڭ كۇيلەرىمەن بىرگە, ش.قاجىعاليەۆ م.گلينكا, ل.بەتحوۆەن, ۆ.موتسارت, گ.بەرليوز, ۆ.موتسارت, د.شوستاكوۆيچ, ا.جۇبانوۆ, م.تولەباەۆ, ع.جۇبانوۆا, س.مۇحامەدجانوۆ سىندى كومپوزيتورلاردىڭ دا شىعارمالارىن وركەستر رەپەرتۋارىنا ەنگىزىپ, الەمنىڭ بىرقاتار ەلدەرىنىڭ ساحناسىندا ونەر كورسەتتى.
شامعون قاجىعاليەۆتىڭ مەرەيتويى قۇرمەتىنە وراي مادەنيەت جانە سپورت مينيسترلىگىنىڭ قولداۋىمەن جانە قۇرمانعازى اتىنداعى اكادەميالىق ۇلت-اسپاپتار وركەسترىنىڭ ۇيىمداستىرۋىمەن وتكەن گالا-كونتسەرتتە بىرەگەي مۋزىكا مايتالمانىنىڭ ءبىلىم-بىلىگىمەن تاربيەلەنگەن تالانتتى شاكىرتتەرى مەن سوڭىنان ەرگەن ءىزباسار ارىپتەستەرىنىڭ ۇلكەن شوعىرى ونەر كورسەتتى. بۇل كەش ناعىز ۇلتتىق ونەرىمىزدىڭ تۋىن جەلبىرەتىپ جۇرگەن دارىندى ديريجەرلەردىڭ شەرۋى بولدى. كەش قوناقتارى ءبىر مەزەتتە بىرنەشە ديريجەردىڭ: ارمان جۇدەباي, ايتقالي جايىموۆ, جالعاسبەك بەگەندىكوۆ, جاڭالىق تەمىرعالي, دۇيسەن ۇكىباەۆ, ەربولات احمەدياروۆتىڭ ونەرىنە كۋا بولىپ, ديريجەر كاسىبىنىڭ ەرەكشەلىگىن كورىپ, قىر-سىرىنا قانىققانداي كۇي كەشتى. ديريجەر – وركەستردىڭ قاناتى, كۇرەتامىرى ەكەنىن سەزىندى. بۇگىندە ءارتۇرلى ونەر ۇجىمدارىندا قىزمەت ەتىپ جۇرگەن بىلىكتى ديريجەرلەر ۇستازدارى قولىنا اماناتتاپ كەتكەن ديريجەردىڭ بايراعىن بيىككە كوتەرىپ جۇرگەن كاسىبي مامان ەكەنىن كوپتىڭ الدىندا تاعى ءبىر دالەلدەدى.
حالىق اراسىنان شىققان العاشقى كاسىبي ديريجەرلەردىڭ ءبىرى, دومبىراشى, ۇلاعاتتى ۇستاز ش.قاجىعاليەۆتىڭ الەمدىك وركەنيەت بيىگىنە جەتەلەيتىن, ۇلتتىق مادەنيەت پەن ونەر سالاسىندا جاساعان ۇلان-عايىر ەڭبەگى بۇگىن تاۋەلسىز قازاقستاننىڭ رۋحاني اياسىنىڭ كەڭەيۋىنە قوسقان سۇبەلى ۇلەسى. «قاجىعاليەۆ الەمى» اپتالىعىنىڭ جوعارى دەڭگەيدە وتۋىنە مۇددەلىلىك تانىتىپ, باسى-قاسىندا جۇرگەن قۇرمانعازى وركەسترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى نۇرعيسا داۋەشوۆ سوناۋ 1969 جىلى كۇلاش بايسەيىتوۆا, بيبىگۇل تولەگەنوۆا, ەرمەك سەركەباەۆ, الىبەك دىنىشەۆ سىندى ونەر ساڭلاقتارىمەن بىرگە جۇمىس ىستەگەن ش.قاجىعاليەۆتىڭ ديريجەرلىگىمەن جازىلعان ديسكىنىڭ بۇگىنگى تسيفرلى جۇيەمەن قايتا جاڭارتىلعان نۇسقاسى مەن «الاتاۋ» اتتى پارتيتۋرالار جيناعىن مەرەيتويعا ارنايى تارتۋ ەتىپ وتىرعاندارىن ايتتى. سونداي-اق اتىراۋ وبلىسىنان ءبىر توپ دەلەگاتتى باستاپ كەلگەن اكىمنىڭ ورىنباسارى نۇرساۋلە سايلاۋقىزى ش.قاجىعاليەۆ مەرەيتويىنىڭ بۇل شارامەن عانا شەكتەلمەي, جاقىن ارادا اتىراۋدا دا كەڭ كولەمدە اتالىپ وتەتىنىن جانە رەسپۋبليكانىڭ باسقا ايماقتارىندا دا جالعاساتىنىنان حاباردار ەتتى.
ايگۇل احانبايقىزى,
«ەگەمەن قازاقستان»
الماتى
