بۇعان دەيىن مۇنداي ورتالىق تەك الماتىدا عانا بولاتىن جانە ول ەركىن كۇرەس شەبەرلەرىنە ارنالعان. ال بۇرىمدى سپورتشىلاردىڭ اكادەمياسى العاش رەت قۇرىلىپ وتىر. ياعني ەلوردانىڭ ورتالىعىندا ورنالاسقان سپورتتىق كەشەن ەندى ۇلتتىق قۇراما مۇشەلەرىنە جىل ون ەكى اي قىزمەت كورسەتەدى. وقۋ-جاتتىعۋ جيىندارىنا ىڭعايلى بولۋ ءۇشىن مۇندا جەكە جاتتىعۋ زالى, ءوز قوناقۇيى جانە اسحاناسى بار. ال ۇلكەن زالعا توسەلگەن بوز كىلەمدە نەگىزگى جاتتىعۋ جۇمىستارى جۇرەدى. قازىردىڭ وزىندە ەلىمىزدىڭ تۇكپىر-تۇكپىرىنەن كەلگەن سپورتشىلار ازيا چەمپيوناتى الدىنداعى سوڭعى دايىندىقتارىن پىسىقتاپ جاتىر. قۇرلىقتىق دودا 27 اقپان مەن 4 ناۋرىز ارالىعىندا بىشكەكتە وتەدى.
ايەلدەر كۇرەسىنەن ۇلتتىق قۇرامانىڭ باس باپكەرى قايرات ساعاديەۆ بۇل اكادەميانىڭ ۇلتتىق قۇرامادان تىس قالعان قوسالقى قۇرامنىڭ بالۋاندارى ءۇشىن وتە قولايلى دەيدى. «بۇل اكادەميانىڭ ماقساتى – الدىمىزدا وتەتىن ازيا ويىندارىنا, الەم چەمپيوناتتارى مەن 2020 جىلى توكيودا وتەتىن وليمپيادا ويىندارىنا ۇلتتىق قۇرامادان باسقا قوسالقى كوماندانىڭ شەبەرلىكتەرىن دامىتۋ. جارىستاردان كەلگەننەن كەيىن كوماندامەن تالداۋ جاسايمىز», دەيدى ول.
اكادەميانىڭ اشىلۋ راسىمىنە گرەك-ريم, ەركىن جانە ايەلدەر كۇرەسى فەدەراتسياسىنىڭ ايەلدەر كۇرەسى بويىنشا ۆيتسە-پرەزيدەنتى گۋزەل مانيۋروۆا, قازاقستان قۇراماسىنىڭ باس باپكەرى قايرات ساعاديەۆ, بوكستان لوندون وليمپياداسىنىڭ چەمپيونى سەرىك ساپيەۆ پەن جەڭىل اتلەتيكادان سيدنەي وليمپياداسىنىڭ جەڭىمپازى ولگا شيشيگينا قاتىسىپ, سپورتشىلارعا ساتتىلىك تىلەدى.
ءالي بيتورە,
«ەگەمەن قازاقستان»
