«مەملەكەتتىك قىزمەتتەر كورسەتۋ ۇدەرىسى مەيلىنشە وڭتايلاندىرىلۋعا ءتيىس. قۇجاتتاردىڭ مەرزىمى مەن تىزبەسىن قىسقارتىپ, قايتالاناتىن راسىمدەردى جويۋ كەرەك. بۇل ورايدا ادامنىڭ ءوزىنىڭ بارۋىن قاجەتسىنبەيتىن تولىق ەلەكتروندىق فورماتقا كوشىرۋ كەرەك», دەدى ماڭعىستاۋ وبلىسى اكىمدىگىندە وتكەن سەمينار-كەڭەستە دەپارتامەنت باسشىسى ن.جاننازاروۆا.
سەمينار-كەڭەسكە اۋدان جانە قالالىق اكىمدىكتەردىڭ اپپارات جەتەكشىلەرى, جەرگىلىكتى اتقارۋ ورگانداردىڭ مەملەكەتتىك قىزمەتتەر كورسەتۋ سالاسى بويىنشا جاۋاپتى ماماندارى قاتىستى. ماڭعىستاۋ وبلىسى اكىمدىگىنىڭ ۇيىمداستىرۋىمەن وتكەن شارادا ءوڭىر باسشىسىنىڭ كەڭەسشىسى ءا.بالمانوۆا, مەملەكەتتىك كورسەتىلەتىن قىزمەتتەردىڭ مونيتورينگى ءبولىمىنىڭ باسشىسى ت.مانكەشوۆا مەن باسقا دا جاۋاپتى تۇلعالار بايانداما جاسادى.
2017 جىلدىڭ قورىتىندىسى بويىنشا ماڭعىستاۋ وبلىسىنىڭ جەرگىلىكتى اتقارۋشى ورگاندارى حالىققا 1 253 841 قىزمەت كورسەتىلگەن.
دەپارتامەنت مەملەكەت تاراپىنان كورسەتىلەتىن قىزمەتتەر ساپاسىن ۇنەمى باقىلاۋدا ۇستايدى. 2017 جىلى 50 تەكسەرىس, قوعامدىق جانە ۇكىمەتتىك ەمەس ۇيىمدارمەن بىرگە «جاسىرىن تۇتىنۋشى» ءادىسىن قولدانۋ ارقىلى 90 استام ءىس-شارا ۇيىمداستىرىلدى. ناتيجەسىندە حالىققا قولايلى جاعداي جاساۋ جونىندە جانە انىقتالعان كەمشىلىكتەردىڭ شىعۋ سەبەپتەرى مەن ولاردى جويۋ بويىنشا 444 ۇسىنىس جولداندى.
سونىمەن قاتار, ن.جاننازاروۆا بارلىق مەملەكەتتىك ورگان وكىلدەرىنە قىزمەت كورسەتۋدى ەلەكتروندى فورماتقا كوشىرۋ بويىنشا بەلسەندى جۇمىستار جۇرگىزۋدى تاپسىردى.
