شىعىس ءداستۇرى بويىنشا ەكى جاس تويعا دەيىن ءبىر-بىرلەرىن كورمەي, ۇلكەندەردىڭ ايتۋىمەن ۇيلەنەتىن بولعان. باس كەيىپكەر اسكەر قالىپتاسقان داستۇرگە قاراماستان ءوز سۇيگەنىنە قوسىلعىسى كەلەدى. دوسى سۇلەيماننىڭ كەڭەسىمەن ساۋداگەر بولىپ كيىنىپ, ءار ۇيگە باس سۇعىپ, وزىنە قالىڭدىق ىزدەيدى. قالا ارالاپ, ماتا ساتىپ ءجۇرىپ ءوزى ساۋداگەر, ءوزى بەك سۇلتانبەكتىڭ قىزى گۇلچاحراعا جولىعادى, عاشىق بولادى. وسى جولدا ءبىرشاما قيىندىق پەن كەدەرگىلەردى ەڭسەرىپ, سوڭىندا سۇيگەنىنە قوسىلادى. ميۋزيكلدىڭ وقيعا جەلىسى وسىنداي.
ماحاببات تاقىرىبىن وزەك ەتكەن, ءان مەن بيگە قۇرىلعان, ەكى بولىمنەن تۇراتىن قويىلىمدى ساحنالاۋ ءۇشىن گرۋزيادان رەجيسسەر كەلىپتى. «مەنى وسكەمەنگە تەاتردىڭ ادەبيەت ءبولىمىنىڭ مەڭگەرۋشىسى ۇلپان توقاەۆا شاقىردى. قوڭىراۋ شالىپ, «بىرلەسە جۇمىس ىستەسەك قايتەدى؟» دەگەندە, «كوماندا قانداي؟» دەگەن ساۋال قويدىم. ىلعي جاستار ەكەنىن ايتقاندا, قۋانا-قۋانا كەلىستىم. جالپى, ميۋزيكلدى كورىپ قانا قويمايسىڭ, جانىڭ راحاتتانادى, دەمالاسىڭ. «ارشىن مال الان» ءازىربايجان دراماتۋرگىنىڭ دۇنيەسى بولعانىمەن, كوپتەگەن حالىقتارعا ورتاق تۇستارى دا كوپ. ءارى بۇل ميۋزيكل ارقىلى جاس اكتەرلەردىڭ قارىم-قابىلەتى جان-جاقتى اشىلا تۇسەدى. مەنىڭشە, ميۋزيكل كورەرمەندەرگە ۇناعان سەكىلدى. اكتەرلەر ءوز رولدەرىن ساتىمەن الىپ شىقتى», - دەيدى قويىلىم رەجيسسەرى گوچا حۆيچيا.
جاستار تەاترىنىڭ اكتەرلەرى وسكەمەندەگى تەاترلار اراسىندا ميۋزيكل جانرىندا العاش رەت ساحنالانعان قويىلىمعا بار بولعانى ءبىر اي ازىرلەنگەنىن, از ۋاقىت مۇعدارىندا شەت ەلدىك رەجيسسەردەن كوپ نارسەنى ۇيرەنگەندەرىن ايتادى. «ەڭ اۋەلى ەڭبەكقورلىقتى ۇيرەندىك. كۇنىنە 12-13 ساعاتتان تىنباي جۇمىس ىستەدىك», - دەيدى ميۋزيكلدىڭ باس كەيىپكەرى اسكەردىڭ رولىندە ويناعان ايدوس نۇرماعامبەتوۆ. «بۇل – ءبىزدىڭ شەت ەل رەجيسسسەرىمەن العاش رەت قويان-قولتىق جۇمىس ىستەۋىمىز. مۇلدە بولەك رەجيسسۋرا, مۇلدە بولەك تەحنيكا دەۋگە بولادى. گوچا حۆيچيا وزگە دە مەملەكەتتەردە جۇمىس ىستەگەن تاجىريبەلى رەجيسسەر ەكەن. بارلىق بىلگەن, تۇيگەنىن بىزگە ۇيرەتۋگە تىرىستى. ءوزىم جاس بولسام دا باس كەيىپكەر اسكەر عاشىق بولاتىن گۇلچاحرانىڭ اكەسىنىڭ رولىندە وينادىم. كورەرمەن قاۋىم ءوز باعاسىن بەرە جاتار», - دەيدى قىزدىڭ اكەسى سۇلتانبەك ساۋداگەردىڭ ءرولىن سومداعان تەاتر اكتەرى ەدىگە اقىلبەكوۆ. اسكەردىڭ عاشىعى رولىندە ساحناعا شىققان دينارا جۇلدىزقىزى ميۋزيكلدە ويناۋدى بۇرىننان ارمانداپ جۇرگەنىن جەتكىزىپ: «بۇل سپەكتاكلدى ستۋدەنتتىك كەزدەن جاقسى كورەتىنمىن. ارمانىم ورىندالدى» دەپ لەبىزىن ءبىلدىردى.
ازامات قاسىم,
«ەگەمەن قازاقستان»
وسكەمەن
