جىلداعى ادەتتەن جاڭىلماعان جيىندا وبلىستاعى وڭ كورسەتكىشتەر تۋرالى ءسوز باسىمدىق الىپ, سىني سيپاتتاعى ماسەلەلەرگە اسا ماڭىز بەرىلمەگەندەي اسەر قالدىردى. راس, بۇقارا تاراپىنان تۇتقيىلدان سۇراق قويىلعانىمەن, ساۋالدىڭ تولىمدى جاۋابى دا تابان استىندا ايتىلدى. اكىمگە اۋىلداعى اۋىزسۋ ساپاسى مەن جوندەلمەگەن جول, اپاتتى جاعدايداعى مەكتەپ قۇرىلىسى مەن جاڭادان اشىلاتىن نارىنقول اۋدانى جايلى وزەكتى ساۋالدارمەن قاتار, ءۇي سۇراپ, بانك الدىنداعى نەسيەسىن وتەۋگە قولۇشىن سوزۋعا ءوتىنىش بىلدىرگەندەر دە بولدى.
جالپى, جەتىسۋ ءوڭىرى نەگىزىنەن اگرارلى ايماق ساناتىندا. وتكەن جىل ىشىندە وسى سالانىڭ دامۋى بويىنشا ەلىمىزدىڭ باسقا وبلىستارى اراسىندا وق بويى وزىق شىعىپ, جالپى ءونىم كولەمى بويىنشا توپ جارىپ وتىر. وتكەن جىلى بۇل كورسەتكىش 3,3 پايىزعا ءوسىپ, 648 ملرد تەڭگەنى قۇراعان. ال اۋىلشارۋاشىلىق داقىلدارىنىڭ القاپتارى 15,6 مىڭ گەكتارعا ۇلعايىپ, 948 مىڭ گەكتارعا جەتتى. كورسەتكىشتەردىڭ كوڭىلدەگىدەي ناتيجە بەرۋىنە اگروسالاداعى ءتيىمدى تاسىلدەردى قولدانىسقا ەنگىزۋدىڭ ىقپالى بار. ماسەلەن, 161 مىڭ گەكتار القاپتان جوعارى ونىمدىلىككە قول جەتكىزۋ ىلعال ۇنەمدەۋ تەحنولوگيالارى ەنگىزىلگەننەن كەيىن مۇمكىن بولىپ وتىر. ناتيجەسىندە, جەتىسۋلىق ديقان, شارۋا وتكەن جىلدى 1,3 ملن توننا استىق, 293 مىڭ توننا مايلى داقىلدار, 1,8 مىڭ توننا كارتوپ پەن باسقا دا جەمىس, كوكونىس ءوندىرىپ, ايتارلىقتاي قورىتىندىلاعان. وبلىستاعى ماقتانىشپەن ايتىلاتىن ءىستىڭ ءبىرى – وڭىردەگى قانت قىزىلشاسىن ءوسىرۋدىڭ كەڭ ءورىس الۋى. ءتاتتى ءتۇبىر ەگىستىگىنىڭ كولەمى 9,2 مىڭ گەكتاردان اسىپ, 334 مىڭ توننا قىزىلشا جينالىپ, ودان 31 مىڭ توننا تازا قۇمشەكەر وندىرىلگەن ەكەن.
اگرارلىق سالانىڭ ءبىر قاناتى – مال شارۋاشىلىعى. ايماقتا مەملەكەتتىك باعدارلامالار اياسىندا مال باسىن كوبەيتۋگە, تۇقىمىن اسىلداندىرۋعا ماڭىز بەرىلىپ كەلەدى. مىسالعا, 2017 جىلى «سىباعا» باعدارلاماسى 147 پايىزعا, «التىن اسىق» باعدارلاماسى 159 پايىزعا, «قۇلان» باعدارلاماسى 127 پايىزعا ورىندالعان. بۇل مال باسىنىڭ ورتا ەسەپپەن 3,5 پايىزعا ءوسۋىن قامتاماسىز ەتتى. وكىنىشكە قاراي مەملەكەتتىك باعدارلاما بويىنشا مال ساتىپ الۋعا بەرىلگەن نەسيەنى سۋبسيديالاۋ بويىنشا وبلىستاعى كەيبىر شارۋانىڭ جەرگىلىكتى بيلىككە ايتار وكپە-نازى بار ەكەن. وبلىستىڭ اۋىل شارۋاشىلىعىنا جاۋاپتى شەنەۋنىكتەردىڭ ءتۇسىندىرۋ جۇمىستارىن ءوز دەڭگەيىندە جۇرگىزبەۋى مەن سالعىرتتىعىنىڭ كەسىرى جەكە شارۋانىڭ جۇمىسىنا كەدەرگى بولىپ وتىرعانعا ۇقسايدى. ءبىز الداعى كۇندەرى «ەگەمەن قازاقستانعا» ءوتىنىش ارقالاپ كەلگەن شارۋالاردىڭ ۋاجىنە ارنايى توقتالىپ, تاقىرىپتى ىندەتەتىن بولامىز...
الەۋمەتتىڭ نازارىنداعى ءبىلىم سالاسىنىڭ جايى دا وبلىس اكىمىنىڭ ەسەبىنە ارقاۋ بولدى. قازىر 3 پەن 6 جاس ارالىعىنداعى بالالاردى مەكتەپكە دەيىنگى تاربيەمەن 100 پايىز قامتۋ جونىندەگى ەلباسى تاپسىرماسى تابىستى ورىندالىپ جاتىر. وتكەن جىلى بۇل قامتۋ دەڭگەيى 95 پايىزدان اسسا, بيىل 98 پايىزعا جەتپەكشى. اپاتتى مەكتەپتەر مەن ءۇش اۋىسىمدى وقىتۋ ماسەلەسى وڭ شەشىلۋدە. وتكەن جىلى 47 مەكتەپ سالۋعا جانە جاڭعىرتۋعا 26 ملرد تەڭگە بولىنگەن. وسى سالداعى 24 نىسان كۇردەلى جوندەۋدەن ءوتىپ, وعان 5,2 ملرد تەڭگە جۇمسالعان. ايماق ۇستازدارى ءۇشىن جاعىمدى حابار دا ايتىلدى. «مۇعالىمنىڭ جالاقىسى جاڭارتىلعان مازمۇن بويىنشا 1 قاڭتاردان باستاپ 30 پايىزعا نەمەسە ورتاشا 135 مىڭ تەڭگەگە دەيىن ءوستى», دەدى اماندىق باتالوۆ. بىراق وبلىستاعى ءبىلىم سالاسىنا جاسالىپ وتىرعان ەرەكشە جاعدايعا قاراماستان, ايماقتىڭ ءبىلىم بەرۋ ساپاسى كوڭىل كونشىتپەيدى. بىلتىرعى جىلدىڭ قورىتىندىسى بويىنشا بۇل كورسەتكىش 54,5 پايىزعا زورعا جەتىپ, رەسپۋبليكا بويىنشا تومەنگى ورىنداردان كورىنگەن ەكەن. ۇلتتىق بىرىڭعاي تەستىلەۋ ناتيجەسى بويىنشا دا وبلىس تومەنگى تىزىمدە قالىپ, ون ءۇشىنشى ورىندا تۇر...
ايتپاقشى, الماتى وبلىسىنىڭ اكىمى اماندىق باتالوۆتىڭ وتكەن جىلعى ەسەپ بەرۋ جيىنىندا تۇرعىندار تاراپىنان وزەكتى تاقىرىپقا 11 ساۋال قويىلعان ەكەن. بۇگىنگى كۇنگە دەيىن كوتەرىلگەن ماسەلەلەردىڭ بارلىعى تولىقتاي قاناعاتتاندىرىلعان. مۇنىڭ سىرتىندا اۋدان, قالا جانە اۋىلدىق وكرۋگ اكىمدەرىنىڭ ەسەپتى كەزدەسۋلەرى بويىنشا ازىرلەنگەن ءىس-شارالار, دا ەنگەن 352 ماسەلە دە وڭ شەشىمىن تاپقان. مىسالعا, اقسۋ اۋدانى اششىبۇلاق اۋىلى ورتالىقتاندىرىلعان اۋىز سۋمەن قامتىلىپ, قاراساي اۋدانى بەرەكە اۋىلىنداعى جەكەمەنشىكتەگى مادەنيەت ءۇيى ساتىپ الىندى. جامبىل اۋدانى قاراقاستەك اۋىلىندا دارىگەرلىك امبۋلاتوريا سالىنىپ, ىلە اۋداندىق ورتالىق اۋرۋحاناسى جانىنان 125 توسەكتىك پەرزەنتحانانىڭ قۇرىلىسى باستالعان. پانفيلوۆ اۋدانى بويىنشا, ۇلكەنشىعان اۋىلىنداعى مەكتەپكە جاپسارلاس قۇرىلىس جۇرگىزىلىپ, ۇشتوبە قالاسىنىڭ ىشكى جولدارى كۇردەلى جوندەۋدەن ءوتتى. سول سياقتى ەلدى مەكەندەردىڭ اۋماعىندا ورنالاسقان ءتۇرلى دەڭگەيدەگى 382 شاقىرىم اۆتوكولىك جولىنا جوندەۋ جاسالدى. تالعار اۋدانى نۇرا اۋىلىنداعى «تولە بي» جانە «بايدىبەك» شاعىن اۋداندارى ەلەكتر جۇيەسىمەن قامتىلدى. تالدىقورعان قالاسىنداعى جاڭا شاعىن اۋداندارعا جول توسەلىپ, جەكە تۇرعىن ءۇي سالىناتىن تۇرعىن اۋدانداردا سۋمەن قامتۋ مەن سۋ تارتۋدىڭ بىرىڭعاي سىرتقى جۇيەسىنىڭ, قالاىشىلىك گازبەن قامتۋ جۇيەلەرىنىڭ قۇرىلىسى ءجۇرىپ جاتىر.
دەمەك, اماندىق باتالوۆ ءبىر جىل بۇرىنعى ەسەپتى كەزدەسۋدە ايتىلعان الەۋمەتتىڭ ءوتىنىشىن اياقسىز قالدىرماي, ۋادە ۇدەسىنەن شىعىپ وتىرعانى انىق. ال ايماقتاعى اۋقىمدى ىستەردىڭ بيىلعى ناتيجەسى مەن تۇرعىنداردىڭ تالاپ-تىلەگىنىڭ جۇزەگە اسقانىن كورۋدى ۋاقىت ەنشىسىنە قالدىردىق.
قالماحانبەت مۇقامەتقالي,
«ەگەمەن قازاقستان»
الماتى وبلىسى
