سۋرەتتى تۇسىرگەن ەرلان ومار, «ەگەمەن قازاقستان»
ۇزاق مەرزىمدى جوسپار وقۋ باعدارلاماسىنىڭ قۇرامىنا ەنگىزىلىپ, ءار سىنىپ بويىنشا تاقىرىپتار, وقۋ ماقساتى, ساعات سانىن بولۋدە مۇعالىمنىڭ قالاۋىنشا وزگەرتىلۋى مۇمكىن دەلىنگەن 5, 7-سىنىپتارعا ارنالعان وقۋلىقتاردىڭ كەيبىرى سىنعا ۇشىراپ تا جاتىر. ماسەلەن, ۇشتىلدىلىككە بايلانىستى الا-قۇلالىق جەتەرلىك. ايتالىق, 5-سىنىپتاعى ساناۋلى وقۋلىقتا تاقىرىپتار ءۇش تىلدە جازىلعان. البەتتە, كۇندە 1-2 سوزدەن بولسا دا, وقۋشى ورىسشا, اعىلشىنشا سوزدىك قورىن كوبەيتە بەرەرى ءسوزسىز. ناتيجەسىندە, وقىعان وقۋشى 1 جىلدا جۇزدەگەن ءسوزدى ۇيرەنەر ەدى. ال 7-سىنىپ وقۋلىقتارىندا بۇل ءۇردىس جالعاسىن تاپپاعان. «كەلەشەك» باسپاسىنان شىققان «كوركەم ەڭبەك» وقۋلىعىنىڭ قىز بالالارعا ارنالعان نۇسقاسى عانا ءۇش تىلدە جازىلعان.
كەيبىر وقۋلىقتاردىڭ ەلەكتروندى نۇسقالارى جوق. تاعى ءبىر ماسەلە, جاڭارتىلعان ءبىلىم بەرۋ مازمۇنىنا كوشەتىن, ءۇش ءتىلدى مەڭگەرەتىن سىنىپتاردىڭ مۇعالىمدەرىنىڭ وسى جۇيەگە دايىندىعى تۋرالى. شىنىندا, ينفورماتيكادان, دۇنيە ءجۇزى تاريحىنان, حيميا مەن بيولوگيادان ساباق بەرەتىن مۇعالىمدەردىڭ 3 ايلىق كۋرستان ءوتىپ, ءۇش تىلدە ساباق بەرەمىن دەۋىنە ءالى دە ەرتەرەك. بۇل مۇعالىمدەردىڭ كوبى 40-50 جاس ارالىعىنا كەلگەندەر. جاھاندانۋ داۋىرىندە الىپ ەلدەرمەن تەڭەسەمىز دەپ ماقسات قويعاندىقتان, اۋىلدان شىققان بالالاردىڭ ءوز يدەيالارىن جۇزەگە اسىرۋىنا شەت ءتىلىن ءبىلۋى كەدەرگى بولىپ وتىرعانى جاسىرىن ەمەس. ءتىپتى مۇعالىم رەتىندە دە انا تىلىمىزدەن باسقا ءتىلدى مەڭگەرە الماي جۇرگەنىمىز شىندىق. سوندىقتان مۇعالىمدىك ماماندىقتى قالاعان, اسىرەسە جاراتىلىستانۋ مەن تاريح پاندەرىنىڭ بولاشاق مۇعالىمدەرى ءۇشىن اعىلشىن ءتىلىن ءى كۋرستان باستاپ وقىتىپ, ساعات جۇكتەمەلەرىن دە كوبەيتكەن دۇرىس. تەك قانا ورتا مەكتەپتەردە ەمەس, جوعارى وقۋ ورىندارىندا بولاشاق مامانعا اسا قاجەت ەمەس پاندەر وقىتىلىپ جاتقانى دا بەلگىلى. وسى پاندەر ەسەبىنەن اعىلشىن ءتىلىن تەرەڭ مەڭگەرتۋگە بولار ەدى.
قازاقستاندىقتاردىڭ ءومىر ءسۇرۋ ۇزاقتىعى جىل ساناپ وسكەنىمەن, مەكتەپتەگى مۇعالىمدەر بۋىنىنىڭ قارتايىپ بارا جاتقانىن ەسكەرۋ دە قاجەت سياقتى. ويتكەنى 30-40 جىل مۇعالىمدىكتىڭ بەينەتىن كورگەندەر ەندى زەينەتىن دە كورگىسى كەلەدى. ەكىنشى جاعىنان جاستارعا دا جۇمىس ورنى بوساۋى ءتيىس. قورىتا ايتقاندا, ءبىلىم بەرۋدەگى جاڭالىق جالعاسىن تاۋىپ, وڭ وزگەرىستەرگە قولىمىز جەتەرىنە سەنىمدىمىز.
گۇلجان توقمۇرزينا,
قاراباۋ ورتا مەكتەبىنىڭ تاريح ءپانى مۇعالىمى
اتىراۋ وبلىسى,
قىزىلقوعا اۋدانى
