وندا ەسىرتكىنىڭ زاڭسىز اينالىمى مەن ەسىرتكىگە تاۋەلدىلىككە قارسى كۇرەس, ناشاقورلىقتىڭ الدىن الۋعا جانە ازاماتتاردىڭ دەنساۋلىعىن ساقتاۋ قۇقىعىن قامتاماسىز ەتۋ, سالاماتتى ءومىر سالتىن قالىپتاستىرۋ ماسەلەلەرى كەڭىنەن قارالدى. سونداي-اق حالىقتىڭ دەنساۋلىعىن ساقتاۋ جانە ناشاقورلىقتىڭ الدىن الۋ, سالاماتتى ءومىر سالتىن قالىپتاستىرۋمەن قاتار, ەسىرتكى بيزنەسى مەن ناشاقورلىققا قارسى ءىس-قيمىلدىڭ جاي-جاپسارى تالقىلاندى.
وسى وزەكتى ماسەلەلەرگە بايلانىستى ىشكى ىستەر ءمينيسترى قالمۇحانبەت قاسىموۆ پەن دەنساۋلىق ساقتاۋ ۆيتسە-ءمينيسترى لياززات اقتاەۆا بايانداما جاسادى. سوڭعى كەزدەرى ارزان ەسىرتكى تۇرلەرىن ساتۋ امالدارى تىركەلىپ وتىر. ونى دايىنداۋ دا, ساتۋ دا جەڭىل كورىنەدى. بىراق ونى پايدالانعان ادام بىردەن اۋىر پسيحيكالىق دەرتكە ۇشىرايدى ەكەن. ال «ەسىرتكى زاتتارى تۋرالى» زاڭعا بايلانىستى زاڭدا تىركەلگەن ەسىرتكىلەر عانا ەسىرتكى زاتتارى بولىپ تانىلادى. سوندىقتان جوعارىدا ايتىلعان سينتەتيكالىق ەسىرتكىلەر تىزىمدە جوق.
باياندامادا ايتىلعان ماسەلەلەردى تالقىلاۋعا قاتىسقان ساراپشىلار ناشاقورلىقتىڭ الدىن الۋ مەن ەمدەۋ ءىسى ەلدىڭ دەنساۋلىق ساقتاۋ سالاسىن دامىتۋداعى نەگىزگى باسىمدىقتاردىڭ ءبىرى بولىپ قالا بەرۋگە ءتيىس ەكەنىن اتاپ ءوتتى. وسىعان وراي كوميسسيا مۇشەلەرى ناشاقورلىق پەن ەسىرتكى بيزنەسىنىڭ الدىن الۋ مەن وعان قارسى شارالاردى ۇيلەستىرۋ ماسەلەلەرى جونىندەگى كوميسسيانىڭ, وبلىستار, استانا جانە الماتى قالالارى اكىمدىكتەرى جانىنداعى ناشاقورلىقپەن جانە ەسىرتكى بيزنەسىمەن كۇرەس جونىندەگى وڭىرلىك كوميسسيالاردىڭ ناشاقورلىقتىڭ الدىن الۋ, ەسىرتكىگە تاۋەلدى ادامداردى مەديتسينالىق جانە الەۋمەتتىك وڭالتۋ قىزمەتىن جانداندىرۋ قاجەتتىگىن تىلگە تيەك ەتتى.
شىعىپ سويلەۋشىلەر اتالعان ماسەلەلەرگە قاتىستى الدىن الۋ جۇمىسى اياسىندا بارلىق دەڭگەيدەگى اكىمدەردىڭ, ءبىلىم بەرۋ, دەنساۋلىق ساقتاۋ, مادەنيەت جانە سپورت ۇيىمدارىنىڭ نازارىن بالالاردىڭ, جاسوسپىرىمدەر مەن جاستاردىڭ بوس ۋاقىتىن دۇرىس ۇيىمداستىرۋعا ايرىقشا ءبولۋ كەرەكتىگىن ايتتى. سونداي-اق سپورت تۇرلەرىمەن تەگىن شۇعىلدانۋ كلۋبتارى جەلىسىن, تۋريزممەن, دەنە شىنىقتىرۋمەن جانە سپورتپەن اينالىسۋعا ارنالعان سەكتسيالاردى دامىتا بەرۋ قاجەتتىگى ەسكەرىلدى. وعان قوسا ون ەكى جاسقا تولماعان, از قامتىلعان جانە تۇرمىسى ناشار وتباسىلاردان شىققان بالالارعا ارنالعان جازعى دەمالىس لاگەرلەرىن دامىتۋ ۇسىنىلدى.
كوميسسيا وتىرىسىنا زاڭ شىعارۋشى, اتقارۋشى جانە سوت تارماقتارىنىڭ وكىلدەرى, حالىقارالىق جانە ۇكىمەتتىك ەمەس ۇيىمداردىڭ, ەمدەۋ مەكەمەلەردىڭ, ادۆوكاتۋرانىڭ جانە ت.ب. سالالار وكىلدەرى قاتىستى. ولار جوعارىدا ايتىلعان نەگىزگى ەكى ماسەلەمەن قاتار, قازاقستان رەسپۋبليكاسى كونستيتۋتسياسىنىڭ 26-بابىندا كوزدەلگەن مەنشىكتىڭ كونستيتۋتسيالىق كەپىلدىكتەرىن قامتاماسىز ەتۋدىڭ وزەكتى ماسەلەلەرىن دە تالقىعا سالدى. ال كوميسسيانىڭ وتىرىسىندا تۇجىرىمدالعان ۇسىنىمدار مەملەكەت باسشىسىنىڭ, پارلامەنت پەن ۇكىمەتتىڭ نازارىنا جولدانباق.
الەكساندر تاسبولات,
«ەگەمەن قازاقستان»
