پارتيانىڭ وڭىرلىك بولىمدەرى اراسىندا استانا قالالىق فيليالىنىڭ الار ورنى ەرەكشە. ويتكەنى استانا – ەلىمىزدىڭ باس قالاسى عانا ەمەس, حالىقارالىق ماسەلەلەر تالقىلاناتىن الاڭ جانە قازاقستاننىڭ مادەني, عىلىمي, يننوۆاتسيالىق ورتالىعى. ودان بولەك, ەلوردامىز بۇگىندە جەدەل ءارى قارقىندى ءوسىپ كەلە جاتقان ەلىمىزدەگى ءىرى مەگاپوليستەردىڭ ءبىرى.
كەزدەسۋ بارىسىندا ماۋلەن اشىمباەۆ ەلباسى, پارتيا توراعاسى نۇرسۇلتان نازارباەۆتىڭ «نۇر وتاننىڭ» قىزمەتىن جاڭعىرتۋ جونىندەگى تاپسىرمالارى مەن العا قويعان مىندەتتەرىنە ەرەكشە نازار اۋداردى.
پارتيا توراعاسىنىڭ ءبىرىنشى ورىنباسارى ودان ءارى ەلباسى تاپسىرمالارىن ساپالى ءارى ۋاقتىلى ورىنداۋ ءۇشىن نۇروتاندىقتارعا بىلەك سىبانىپ جۇمىس ىستەۋ كەرەكتىگىن ايتتى. ول ءۇشىن ەڭ الدىمەن پارتيا قىزمەتىن بيۋروكراتيالىق جۇيەدەن ارىلتىپ, جاڭا جۇمىس ءتاسىلىن ءتۇزۋ قاجەت. «نۇر وتان» ءوز جۇمىسىن
زاماناۋي, اشىق ءارى كرەاتيۆتى ساياسي بىرلەستىك رەتىندە جۇرگىزۋى ءتيىس. پارتيا ۇيىمداستىرعان بارلىق ءىس-شارا جۇيەلى, ءتيىمدى جانە قوعام ءۇشىن پايدالى بولۋى كەرەك. جاڭا جۇمىس ءتاسىلى مەن ۇلگىسى, تسيفرلى تەحنولوگيانى ەنگىزۋ, جاستارعا, مۇمكىندىگى شەكتەۋلى جاندارعا, ارداگەرلەرگە جانە زەينەتكەرلەرگە قولداۋ كورسەتۋ – پارتيا قىزمەتىنىڭ ءبىر بولىگى عانا. سونىمەن بىرگە پارتيا جۇمىسىنىڭ پايداسىن شاعىن جانە ورتا بيزنەس وكىلدەرى مەن يننوۆاتسيا سالاسىندا ەڭبەك ەتىپ جۇرگەن جاندار دا سەزىنۋى ءتيىس.
– «نۇر وتان» پارتياسىنا ەلىمىزدەگى ساياسي, ەكونوميكالىق جانە رۋحاني جاڭعىرۋ جۇمىستارىنا جۇيەلى تۇردە قاتىساتىن ستراتەگيالىق كۇش بولىپ قالىپتاسۋ مىندەتى جۇكتەلىپ وتىر. بۇل – وتە اۋقىمدى ءارى جاۋاپتى ميسسيا. سوندىقتان پارتيانى ەلباسىنىڭ ۇيىمدىق, ساياسي, يدەولوگيالىق جانە كرەاتيۆتى ورتالىعىنا اينالدىرۋ ماقساتىندا بارشا نۇروتاندىقتار كۇش بىرىكتىرىپ جۇمىس ىستەۋى كەرەك, – دەدى ماۋلەن اشىمباەۆ.
سونىمەن قاتار «نۇر وتان» پارتياسى توراعاسىنىڭ ءبىرىنشى ورىنباسارى استانالىق ارىپتەستەرىنىڭ نازارىن باس قالاداعى قوعامدىق-ساياسي جاعدايدى ۇنەمى باقىلاۋدا ۇستاپ, حالىقتى الاڭداتقان ماسەلەگە قاتىستى جەدەل ارەكەت ەتۋ كەرەكتىگىنە اۋداردى. سونداي-اق سايلاۋالدى باعدارلامانى جۇزەگە اسىرۋ ءاردايىم پارتيا جۇمىسىنىڭ باسىم باعىتى بولىپ قالا بەرەتىنىنە دە توقتالدى.
– ءبىزدىڭ باستى مىندەتىمىز – ەلدىڭ مۇددەسىنە جۇمىس ىستەيتىن ءححى عاسىردىڭ زاماناۋي, ءتيىمدى, يننوۆاتسيالى, جوعارى تەحنولوگيالى پارتياسىن قۇرۋ. سوندىقتان ناقتى جۇمىستارعا باسىمدىق بەرۋىمىز كەرەك, – دەدى م.اشىمباەۆ.
جيىن بارىسىندا قالا باسشىسى, پارتيانىڭ استانا قالالىق فيليالىنىڭ توراعاسى اسەت يسەكەشەۆ پارتيا قىزمەتىن جاڭعىرتۋ باستاماسىنا قولداۋ ءبىلدىردى. سونداي-اق ول قالالىق فيليال جۇمىسىن «قايتا جۇكتەۋ» باعىتىنداعى جوسپارلارىمەن ءبولىستى.
* *
سونداي-اق كەشە ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ شەشىمىمەن تامارا دۇيسەنوۆانىڭ پارتيا حاتشىسى قىزمەتىنە تاعايىندالعانى ءمالىم بولدى.
ورتالىق اپپارات ۇجىمىنا جاڭا حاتشىنى تانىستىرعان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ تامارا دۇيسەنوۆانىڭ مەملەكەتتىك قىزمەتتە جانە باسشىلىق لاۋازىمدا تاجىريبەسى مول ەكەنىن ەرەكشە اتاپ ءوتتى. سونداي-اق ول ەلباسىنىڭ پارتيا قىزمەتىن جاڭعىرتۋ جونىندەگى تاپسىرماسىن جۇزەگە اسىرۋعا جاڭا حاتشىنىڭ ۇلكەن ۇلەس قوساتىنىنا سەنىم ءبىلدىردى.
– ءسىزدىڭ الەۋمەتتىك سالاداعى باي تاجىريبەڭىز پارتيا جۇمىسىنا يگى اسەرىن تيگىزەدى دەپ ەسەپتەيمىن. سەبەبى الەۋمەتتىك ماسەلەلەردى شەشۋ «نۇر وتان» پارتياسىنىڭ باسىم باعىتتارىنىڭ ءبىرى بولىپ سانالادى. ءسىزدىڭ پارتيا قاتارىنا كەلۋىڭىزبەن وسى باعىتتاعى جۇمىسىمىزدى ودان ءارى كۇشەيتەمىز دەپ سەنەمىن, – دەدى ماۋلەن اشىمباەۆ.
جولدىباي بازار,
«ەگەمەن قازاقستان»
