اۋدان اكىمى سالتانات ابەۋوۆانىڭ باستاماسىمەن اقتوعاي جۇرتى جەرلەس اقىندارىنىڭ «التىنكۇرەك» اتتى كىتابىن شىعارىپ, اتالمىش كەشتە جاڭا جيناقتىڭ تۇساۋىن كەستى. ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلاتىن ساناداعى رۋحتىڭ تۇلەۋى, جادىداعى جازۋدىڭ جاڭعىرۋى وسىنداي كەشتەردە ويعا ورالادى. اقىننىڭ مەرەيتويىنا الماتى مەن استانادان, قاراعاندىدان اقىن-جازۋشىلار, بەلگىلى ونەر ادامدارى كەلدى. «توقىراۋىن تولقىندارى» ءانسامبلى باستاعان ءبىر توپ انشىلەر دە ولەڭ كەشىنىڭ وزەگىنە اينالدى. ساليقالى ءسوز بەن سالماقتى ساز جاراسىم تاپقان جاقسى جيىندا جىر وقىلىپ, جان جادىرادى. باعدات مۇباراك بۇگىندە قازاق پوەزياسىنىڭ قادامى بولەك قالامگەرى بولىپ قالدى. وعان اقىننىڭ وزىق ولەڭدەرىندەگى وبرازدى ويلاۋ ۇلگىسى مەن مازمۇن تەرەڭدەگى, فورما ەرەندىگى كۋالىك.
كەشتىڭ شىمىلدىعىن اۋدان اكىمى س.ابەۋوۆا مەن اقىن, جازۋشى, رەسپۋبليكالىق «قاسىم» جۋرنالىنىڭ باس رەداكتورى س.ساعىنتاي ءتۇرىپ, كىتاپتىڭ تۇساۋىن كەستى. اۋدان اتىنان اقىنعا ەرەكشە سىي-سىياپات جاسالدى.
اقىندى اقىن ارداقتاسا ول – دەلەبە. ال, اقىندى اكىم ارداقتاسا – ول ونەگە. وسىنداي ونەگەلى ءىستى وبلىس اكىمى ەرلان قوشانوۆ تا كورسەتتى. قاراعاندى وبلىسى اكىمىنىڭ ءباسپاسوز حاتشىسى دۋلات امانجول جەتكىزگەن اق تىلەكتەن ءبىز وسىنى اڭعاردىق.
ەرەكشە ايتاتىن جايت, باعدات اقىننىڭ كەشىنە «توقىراۋىن تولقىندارىن» كۇيمەلى ءان كەرۋەنىنىڭ اقباس بۋراسى امانتاي جۇماشەۆ الىپ شىعۋى عوي. سونداي-اق, كەشتىڭ قادىرلى قوناقتارىنىڭ قاتارىندا تالانتتى اكتەر كەڭەس نۇرلانوۆ, بەلگىلى ءانشى روزا القوجانىڭ دا بولۋى حالىقتىڭ ەرەكشە ىقىلاسىن تۋدىرماي قويماعانى انىق. كەشتىڭ كەلەلى ءسوزىن ايتقان اقىننىڭ اعاسى, ولكەتانۋشى تۇڭعىشباي مۇقان دا قازاق پوەزياسىنا وزىندىك قولتاڭباسىمەن كەلگەن اقىن جىرلارىنىڭ ەرەكشەلىكتەرى مەن وزىندىك وزگەشە ءبىتىم-بولمىسىن اسەرلى باياندادى.
جىر كوشىنىڭ جالاۋىن جەلبىرەتىپ جەتكەن داۋرەن بەرىكقاجى مەن تاناكوز تولقىنقىزى باستاعان اقىندار ونەرلى ولكەدە ولەڭ وقىپ, ەرلان قۇجىمانوۆ, قۇرماش ىبىشەۆ, ەرجان بازاربەكوۆ, داۋرەنبەك اركەنوۆ سىندى انشىلەر ساحنانىڭ ءسانىن كەلتىردى.
اقىننىڭ ولەڭىنە جازىلعان ەسترادالىق اندەردى ە.سەركەباەۆ, ن.كليم ورىندادى.
ر.S. التىنكۇرەك – العاش كوكتەمدە جەلپيتىن جىلى لەپ, مايدا سامال. الايدا ول سونشالىق نازىك بولمىسىمەن-اق قاسارىسىپ جاتقان قاسات قاردىڭ كوبەسىن سوگىپ, كوكتەمنىڭ العاشقى بايشەشەك-تاعدىرىنا جول اشادى. پوەزيا, دەمەك تۋرا وسى التىنكۇرەك. ول دا ادامزات جارالعالى بەرى ونىڭ جۇرەگىندەگى ەندى قايتا جىبىمەستەي بولىپ بەكىگەن شەر-شەمەندى ءبىر نازىك ساۋلە-ءسوز ارقىلى ءجىبىتىپ كەلەدى...
ميراس اسان,
«ەگەمەن قازاقستان»
