تالاپقا ساي ەمەس ونىمدەردى انىقتاۋ بويىنشا وبلىستا تەكسەرۋ جۇمىستارى تۇراقتى تۇردە جۇرگىزىلىپ كەلەدى. بارلىق ساۋدا ورىندارى قامتىلعان دەسە دە بولادى. جەرگىلىكتى تۇرعىندارعا ساۋدالانىپ كەلە جاتقان ونىمدەردىڭ قاۋىپسىزدىگىنە اي سايىن مونيتورينگ جۇرگىزىلىپ, تاماق ونىمدەرىن شىعاراتىن كاسىپورىندار جوسپارلى تۇردە تەكسەرىلۋدە. 2017 جىلى 3,5 ميلليون تەڭگەنىڭ ءونىمى ساتىپ الىنعان بولاتىن. ساراپتاما قورىتىندىسى انىقتاعانداي, بىلتىر ساتىپ الىنعان ۇلگىنىڭ 17,2 پايىزى قولدانىستاعى زاڭناما تالاپتارىنا سايكەس كەلمەگەن. سونىڭ ىشىندە تاماق ونىمدەرى – 11,8 پايىز بولسا, بالالار ويىنشىعى – 5,2 پايىز, بالالار مەن جاسوسپىرىمدەر زاتتارى (كيىم, اياق كيىم) – 5,8 پايىز جانە دە وپا-دالاپ ونىمدەرى 6 پايىزدى قۇراعان. سونداي-اق زەرتتەۋ ناتيجەلەرى تۇرمىستىق حيميا زاتتارىنىڭ 1 پايىزى, جاعۋ ماتەريالدارى, مايلار جانە ارنايى سۇيىقتىقتاردىڭ 0,7 پايىزى جانە سينتەتيكالىق ماتەريالداردىڭ 0,2 پايىزى تالاپقا ساي ەمەستىگىن انىقتاعان. زاڭ بۇزۋشىلىقتىڭ باسىم بولىگىن, ياعني 91,4 پايىزىن ماركالاۋدىڭ سايكەسپەيتىندىگى قۇراسا, ال 7,7 پايىزىندا ميكروبيولوگيالىق كورسەتكىشتەر قاۋىپسىزدىگى ساقتالمايدى جانە 4,8 پايىزىندا فيزيكالىق-حيميالىق كورسەتكىشتەرىنىڭ تالاپقا جاۋاپ بەرمەيتىندىگى بەلگىلى بولدى. ناتيجەسىندە ساۋدادان 5 توننا ءونىم الىنىپ تاستالدى. سونىڭ ىشىندە 324 كيلو تاماق ءونىمى جانە 3 توننا تارتاتىن حيميا مەن مۇناي-حيميا ءونىمى قۇرايدى. انىقتالعان زاڭ بۇزۋشىلىق فاكتىلەرى بويىنشا 162 كاسىپكەرلىك سۋبەكتىلەرىنە ازاماتتاردىڭ دەنساۋلىعىنا قاتىستى سانيتارلىق-ەپيدەميولوگيالىق سالادا قازاقستان رەسپۋبليكاسى زاڭدارى تالاپتارىن بۇزۋدى توقتاتىپ, زاڭ اياسىندا ارەكەت ەتۋ تۋرالى ەسكەرتپەلەر دە بەرىلدى. جالپى, تەكسەرۋ ناتيجەلەرى بويىنشا 23 ميلليون تەڭگە ايىپپۇل سالىنعاندىعىن دا ايتا كەتكەن ورىندى.
اسقار تۇراپباي ۇلى,
«ەگەمەن قازاقستان»
اقمولا وبلىسى
