ماڭىزدى جيىنعا «Qazaqstan» تەلەارناسىنىڭ ديرەكتورى ا.تۇرعانبەكوۆ, ل.ن.گۋميلەۆ اتىنداعى ەۇۋ رەكتورى ە.سىدىقوۆ, پارلامەنت ءماجىلىسىنىڭ دەپۋتاتتارى, قحا مۇشەلەرى, عىلىمي جانە شىعارماشىلىق زيالى قاۋىم وكىلدەرى قاتىستى.
ەلباسى نۇرسۇلتان نازارباەۆ «تۋعان جەر» باعدارلاماسى اياسىندا ورىندالۋى ءتيىس بىرنەشە مىندەتتەردى ەرەكشە اتاپ ايتقان بولاتىن. اپتالىق بارىسىندا استانالىق كورەرمەندەردىڭ نازارىنا ۇسىنىلعان «تۋعان جەر» ءفيلمى دە وسى باعىتتاعى بىرقاتار جۇمىستاردىڭ جەمىستى جالعاسى دەۋگە بولادى.
قازاقستان حالقى اسسامبلەياسى مۇرىندىق بولعان كينو اپتالىعى بيىل ەلىمىزدىڭ جەتەكشى وقۋ ورىندارىنىڭ بازاسىندا وتپەك. جوعارى وقۋ ورىندارىنىڭ ستۋدەنتتەرىنەن باستاپ بارلىق قازاقستاندىقتار ءبىر اپتا بويى وتاندىق رەجيسسەرلەردىڭ «امانات», «زامان-اي», «ستالينگە سىيلىق», «جەرۇيىق», «الجير», «ورالمان», «جات» فيلمدەرىن تاماشالايتىن بولادى. بۇگىندە قازاقستان حالقىنىڭ تاريحى مەن مادەنيەتىن ناسيحاتتاۋ, تاريحي جادىنى ساقتاۋ, جاستارعا پاتريوتتىق تاربيە بەرۋ جانە جالپىۇلتتىق بىرلىكتى نىعايتۋ ماقساتىندا ۇيىمداستىرىلعان بۇل اپتالىق كوپشىلىكتىڭ كوڭىلىنەن شىعىپ وتىر.
شارانىڭ اشىلۋ سالتاناتىنا جينالعان كورەرمەندەر اراسىندا حالىق قالاۋلىلارى دا تىڭ كارتينانى تاماشالاپ, تەلەحيكايادان العان اسەرلەرىمەن ءبولىستى. پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ ءوز سوزىندە مەرەكە قارساڭىنداعى بۇل يگىلىكتى شارانىڭ ەلىمىزدەگى تۇراقتىلىق پەن بىرلىكتى ناسيحاتتايتىن ماڭىزىنا توقتالدى. «سوعىس جىلدارىندا سول زۇلمات زاماننىڭ ساياساتىنا بايلانىستى تۇتاس حالىقتاردى ءبىزدىڭ ەلىمىزگە دەپورتاتسيالاپ الىپ كەلدى. سول كەزدە قازاق حالقىنىڭ دارحان جانى, ۇلكەن جۇرەگى وسى كەڭ-بايتاق دالانى بارلىق ۇلتتار مەن ۇلىستاردىڭ ورتاق وتانىنا اينالدىردى. سوندىقتان دا پرەزيدەنت «رۋحاني جاڭعىرۋ» باعدارلاماسى اياسىندا «تۋعان جەر» باعدارلاماسىن جاساۋدى ۇسىنىپ, وسى بويىنشا ۇلكەن جۇمىستار جۇرگىزۋدى تاپسىردى. سونىڭ نەگىزىندە اتقارىلعان ىستەردىڭ بىرەۋى وسى «تۋعان جەر» ءفيلمى بولىپ وتىر. وندا قازاقستانداعى كورەي ەتنوسىنىڭ تاعدىرىن ءبىر وتباسىنىڭ ءومىرى ارقىلى كورسەتەدى. مۇنداي مىسالداردى ءبىز قازاقستانداعى كەز كەلگەن وزگە ۇلت وكىلدەرىنىڭ باسىنان بايقايمىز. ولاردىڭ قازاقتارمەن ارا-قاتىناسىنداعى مەيىرىمدىلىك مىنەزدەرى تۋىندىعا تۇپكى يدەيا بولعان», دەدى س.ابدراحمانوۆ.
تۋرا سول ۋاقىتتا بۇل ءىس-شارا الماتى قالاسىندا ءال-فارابي اتىنداعى قازۇۋ ءو.جولداسبەكوۆ اتىنداعى ستۋدەنتتەر سارايىندا «امانات» كوركەم ءفيلمىنىڭ كورسەتىلىمىمەن باستالدى.
ميراس اسان,
«ەگەمەن قازاقستان»
