بۇل جوبا ەلباسى نۇرسۇلتان نازارباەۆتىڭ «رۋحاني جاڭعىرۋ: بولاشاققا باعدار» ماقالاسىندا ايتىلعان «تۋعان جەر» باعدارلاماسى اياسىندا باستالىپ, جەتىسۋ وڭىرىندە دۇنيەگە كەلگەن قالامگەرلەردىڭ ءۇش بۋىن وكىلىنىڭ باسىن قوساتىن تۇراقتى شارا بولماق. ادەبي شارانىڭ العاشقى قوناقتارى بولىپ بۇگىنگى قازاق پروزاسى مەن پوەزياسىن بەدەرلى قولتاڭبالارىمەن بەدەل بيىگىنە كوتەرىپ جۇرگەن اقىن-جازۋشىلار جۇماباي شاشتاي ۇلى, داۋرەن قۋات جانە اينۇر تولەۋ شاقىرىلدى. جەرگىلىكتى زيالى قاۋىم وكىلدەرى مەن ستۋدەنت جاستاردىڭ كوزايىمىنا اينالعان كەزدەسۋدە قوناقتار ادەبيەت تۋرالى تولعامدى ويلارىن ورتاعا سالدى.
ەركىن فورماتتا وتكىزىلگەن ادەبي شارانىڭ العاشقى ساۋالى حالىقارالىق «الاش» ادەبي سىيلىعىنىڭ لاۋرەاتى, جازۋشى, «ەگەمەن قازاقستان» گازەتىنىڭ شولۋشىسى جۇماباي شاشتاي ۇلىنا قويىلدى. جازۋشى, abai.kz اقپاراتتىق پورتالىنىڭ باس رەداكتورى داۋرەن قۋات تا سۇبەلى ويلارىمەن ءبولىسىپ, ءومىر جولىنان سىر شەرتتى. كوپشىلىك تاراپىنان قويىلعان ساۋالعا دا تارتىمدى جاۋاپ قايىردى. مۇنان سوڭ جاستار تاراپىنان قويىلعان ساۋالعا وراي جامبىل اۋداندىق «اتامەكەن» گازەتى باس رەداكتورىنىڭ ورىنباسارى, اقىن اينۇر تولەۋ دە ءوزىنىڭ ورامدى ويلارىن ورتاعا سالدى.
وسىلايشا جازۋشى, جۋرناليست ەسبولات ايدابوسىن جۇرگىزگەن رۋحاني اڭگىمەدە قالامگەرلەر شىعارماشىلىق لابوراتوريا, ادەبيەت پەن يدەولوگيا, رۋحانياتتى بايىتۋداعى ادەبيەتتىڭ ءرولى, ساۋاتتى وقىرمان قالىپتاستىرۋ, ادەبي سىندى دامىتۋ جانە باسقا دا تاقىرىپتاردا كەلەلى اڭگىمەلەر قوزعاپ, ستۋدەنت جاستار مەن ادەبيەت سۇيەر قاۋىمنىڭ ساۋالدارىنا جاۋاپ بەردى. ال ەكى ساعات بويىنا قالامگەرلەر مەن وقىرماندار اراسىندا العاۋسىز سىر بولىسكەن شارانىڭ توقەتەرىندە الماتى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى ايدار باشباەۆ: «ادەبيەت – رۋحانيات دىڭگەگى» جوباسى جىل بويى جالعاسىپ, قازاق ادەبيەتىندە قولتاڭباسى بار اعا بۋىن, ورتا بۋىن جانە جاس تولقىن وكىلدەرىنىڭ باسىن قوسىپ, رۋحانيات جايلى اڭگىمە وربىتەتىن اشىق الاڭعا اينالادى دەپ وتىرمىز. جەتىسۋلىق قالامگەرلەردىڭ ەلدى رۋحاني جاڭعىرتۋعا, تۋعان جەردىڭ تۇلەۋىنە ۇلەس قوسۋىنا بارلىق جاعداي جاسايمىز», دەدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
