وسكەمەندەگى جاڭا سوگرا كەنتىندە ورنالاسقان مۇحامەت شاياحمەتوۆ اتىنداعى ەكى تىلدە ءبىلىم بەرەتىن ورتا مەكتەپكە قوسالقى 300 ورىندىق عيماراتتىڭ قۇرىلىسى باستالدى. «قالا جىلدان جىلعا ۇلعايىپ كەلەدى. جاڭا سوگرا كەنتىندەگى حالىق سانى دا كوبەيمەسە كەمىگەن جوق. ونىڭ جارقىن كورىنىسى - بۇگىنگى №23 مەكتەپتىڭ قوسالقى قۇرىلىسى. بىلتىر وسكەمەندە مەملەكەتتىك تىلدە وقىتاتىن مىڭ ورىندىق ەكى مەكتەپتىڭ قۇرىلىسى باستالدى», - دەدى عيماراتتىڭ ىرگەتاسىن قالاۋ جانە كاپسۋلا سالۋ سالتاناتىنا قاتىسقان وسكەمەن قالاسىنىڭ اكىمى قۋات تۇماباەۆ.
جاڭا نىساننىڭ قۇرىلىسىنا قاجەتتى قارجى رەسپۋبليكالىق بيۋدجەتتەن جانە «وسكەمەن تمك» اق تاراپىنان قاراستىرىلىپ وتىر. «جاڭا كورپۋستىڭ سالىنۋىن ۇزاق كۇتتىك. سەبەبى بۇل مەكتەپ ءار كەزدە دە ءبىلىم سالاسىندا جەتىستىكتەرىمەن تانىلىپ كەلەدى. بىلتىر ءبىلىم ۇياسى ۇلى وتان سوعىسىنىڭ ارداگەرى, وسى مەكتەپتىڭ ءبىرىنشى ديرەكتورى مۇحامەت شاياحمەتوۆتىڭ ەسىمىن يەلەندى. مەكتەپ پەن كومبينات اراسىندا ءوزارا بەرىك بايلانىس ورناتىلعان. قۇرىلىستىڭ باستالۋىنا ىقپال جاساعان, ءبىزدىڭ ءوتىنىش-تىلەكتەرىمىزدى ەسكەرگەن وبلىس, قالا باسشىلىعىنا العىس بىلدىرەمىز. كومبينات ءوز تاراپىنان 26 ملن تەڭگەنى قۇرىلىسقا ءبولىپ وتىر», - دەدى «وتمك» اق پرەزيدەنتى اسەم مامىتوۆا.
ازامات قاسىم,
«ەگەمەن قازاقستان»
وسكەمەن
