«سەمەي قالاسىنا قاراستى بۇرىنعى ابىرالى اۋدانى اۋماعىندا 5 اۋىلدىق وكرۋگ (ابىرالى, اينابۇلاق, اقبۇلاق, العاباس, قاراولەڭ) بار. تۇرعىندار سانى – 3726. ماقالادا كورسەتىلگەندەي, ابىرالى وڭىرىندەگى ەڭ ۇلكەن ماسەلە – جولدىڭ ناشارلىعى. دەگەنمەن دە بۇل ماسەلە وبلىس اكىمدىگىنىڭ نازارىندا ەكەندىگىن ايتقىمىز كەلەدى. وتكەن جىلى رەسپۋبليكالىق ماڭىزداعى «سەمەي-قاينار» جولىنىڭ 12 شاقىرىمنان استام جەرىنە 318 ميلليون تەڭگەگە ورتاشا جوندەۋ جۇمىستارى جانە 100 شاقىرىمعا جۋىق اۋماعىنا 254 ميلليون تەڭگەگە اعىمداعى جوندەۋ جۇمىستارى جۇرگىزىلدى. بيىل اتالعان جولدىڭ 38 شاقىرىمىن جوندەۋ ءۇشىن رەسپۋبليكالىق بيۋدجەتتەن 900 ميلليون تەڭگە ءبولۋ جوسپارلانىپ وتىر.
ابىرالى يادرولىق پوليگون زارداپتارىن تارتقان ايماق سانالاتىندىقتان حالىققا ساپالى مەديتسينالىق قىزمەت كورسەتۋدىڭ ماڭىزى زور. قاينار اۋىلىندا ورنالاسقان ابىرالى اۋىلدىق اۋرۋحاناسى بۇگىندە وڭىردەگى 4 مىڭعا جۋىق حالىققا قىزمەت كورسەتىپ وتىر. ايماقتاعى جۇرتشىلىقتىڭ «وسى اۋرۋحانا جابىلىپ قالماي ما؟» دەگەن الاڭداۋشىلىعىنا بايلانىستى ايتارىمىز مىناۋ: اۋرۋحانا جابىلمايدى. 2017 جىلدىڭ جەلتوقسان ايىندا مەديتسينالىق ۇيىمداردى جابدىقتاۋ باعدارلاماسى اياسىندا اتالعان اۋرۋحاناعا قۇنى 47 ميلليون تەڭگەنىڭ رەنتگەن اپپاراتى ورناتىلدى. ءوڭىر حالقىن ساپالى, قولجەتىمدى جانە ۋاقتىلى مەديتسينالىق قىزمەتپەن قامتاماسىز ەتۋ ماقساتىندا وبلىستىق دەنساۋلىق ساقتاۋ باسقارماسى دەنساۋلىق ساقتاۋ مينيسترلىگىنە اتالمىش اۋىلدىق اۋرۋحانانىڭ زاڭدى مارتەبەسىن ساقتاي وتىرىپ دەنساۋلىق ساقتاۋدىڭ بىرىڭعاي اقپاراتتىق جۇيەسىنە ەنگىزۋ تۋرالى ۇسىنىس جاسادى.
بۇگىندە ابىرالى ءوڭىرىنىڭ 5 اۋىلىندا (اقبۇلاق, ساماي, تاڭات, قاينار, قاراولەڭ) اۋىز سۋ ماسەلەسىنىڭ شەشىمىن تاپپاي وتىرعانى بەلگىلى. وسىنى شەشۋ ماقساتىندا «نۇرلى جول» جانە «2020 جىلعا دەيىن وڭىرلەردى دامىتۋ» باعدارلامالارى اياسىندا بىلتىر قاينار اۋىلىنا اۋىز سۋ تارتۋ جۇمىستارى باستالدى. قۇنى 472 ميلليون تەڭگەنى قۇرايتىن, ۇزىندىعى 30 شاقىرىمنان اساتىن سۋ قۇبىرلارى جۇيەسىن قايتا جاڭعىرتۋ جۇمىستارى بيىل اياقتالاتىن بولادى. سونىمەن قاتار قازىرگى ۋاقىتتا ابىرالى اۋىلىنىڭ سۋمەن قامتۋ جۇيەسىن كەڭەيتۋ جانە سۋ توعانى قۇرىلىسىنىڭ جوبالىق-سمەتالىق قۇجاتتارى ازىرلەنۋدە.
بۇگىندە ابىرالى وڭىرىندە جالپى ءبىلىم بەرەتىن بەس مەكتەپ بار, وندا 674 وقۋشى ءبىلىم الۋدا. مەكتەپكە دەيىنگى ءبىلىم مەكەمەلەرىنە كەزەك جوق, سوندىقتان بالاباقشا سالۋدىڭ قاجەتتىلىگى جوق دەپ ەسەپتەيمىز. ورتا مەكتەپتەردە تاريح جانە ورىس ءتىلى مەن ادەبيەتى پاندەرى مۇعالىمدەرىنىڭ (2 مۇعالىم) ورنى بوس تۇر. ءسوز سوڭىندا سەمەي قالالىق ءبىلىم ءبولىمى العاباس اۋىلىنداعى ا.بىحين اتىنداعى جانە قاينار اۋىلىنداعى س.بەگالين اتىنداعى ورتا مەكتەپتەرگە جوندەۋ جۇمىستارىن جۇرگىزۋ ءۇشىن جوبالىق-سمەتالىق قۇجاتتاما جاساۋدىڭ ەسەبىن دايىنداعانىن حابارلاعىمىز كەلەدى».
شىعىس قازاقستان وبلىسى
