وبلىستا ازيا كەڭىستىگىندە بالاماسى جوق بىرەگەي, ۇزدىك تەحنولوگيالار قاتارى شوعىرلانعان گەماتولوگيالىق ورتالىقتىڭ جوبالاۋ جۇمىسى اياقتالۋ ۇستىندە. ايماق باسشىسى دانيال احمەتوۆتىڭ باستاماسىمەن الداعى تاڭدا سەمەيدە دە العاشقى پوليتراۆما جانە ورتوپەديا ورتالىعى اشىلاتىن بولدى.
– سەمەيدە مەديتسينالىق جەدەل جاردەم اۋرۋحاناسىنىڭ نەگىزىندە اشىلاتىن جاڭا پوليتراۆما جانە ورتوپەديا ورتالىعى رەسپۋبليكالىق تراۆماتولوگيا جانە ورتوپەديا عىلىمي-زەرتتەۋ ورتالىعىنىڭ جەتەكشى ماماندارىمەن بىرگە ىشكى پروتەزدەۋ جانە كۇردەلى جاراقاتتاردى ەمدەۋ ءۇشىن ەڭ وزىق تەحنولوگيالاردى ەنگىزۋگە مۇمكىندىك بەرەدى, – دەدى وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ, – بۇل جەردە سەمەيدەگى جەدەل مەديتسينالىق جاردەم اۋرۋحاناسىنىڭ ءرولى وتە ماڭىزدى, سەبەبى بۇل اۋرۋحانا شىعىس قازاقستان وبلىسىنىڭ 9 اۋدانىنا قىزمەت ەتەدى.
وبلىس اكىمىنىڭ ءباسپاسوز قىزمەتىنەن حابارلاعانداي, مەديتسينالىق جەدەل جاردەم اۋرۋحاناسىندا قازىرگى تاڭدا مۋلتيمەديالىق قۇرالدارمەن جابدىقتالعان وتا جاساۋ ءبولىمى, ينسۋلت ورتالىعى, ناۋقاستاردى ەرتە قالپىنا كەلتىرۋ زالى قىزمەت ەتەدى. بۇدان بولەك فيزيوتەراپيا ءبولىمى, جاڭا قۇرالدارمەن جابدىقتالعان ەكى بىردەي گيمناستيكا بولمەسى دە بار. مۇندا سونداي-اق حالىقارالىق ستاندارتتارعا سايكەس ناۋقاستاردىڭ ءوز سىرقاتتارىن باسقارۋعا ۇيرەتەتىن ءتۇرلى مەكتەپتەر جۇمىس جاسايدى. ال اۋرۋحانا ماماندارى جىل سايىن شەتەلدە بىلىكتىلىكتەرىن كوتەرىپ, ارنايى كۋرستاردان وتەدى. بۇل رەتتە ايماق باسشىسى ارنايى وبلىستىق باعدارلامانىڭ ارقاسىندا ءوڭىردىڭ دەنساۋلىق ساقتاۋ سالاسى تولىق جەتىلدىرىلىپ, جاڭارۋدان وتەتىنىن ايتادى.
– دەنساۋلىق ساقتاۋ سالاسىن دامىتۋدىڭ نەگىزگى ەلەمەنتتەرى مەديتسينا قىزمەتكەرلەرىن ۇنەمى دايىنداۋ, الەمدىك مەديتسينالىق ستاندارتتاردى قاتاڭ ساقتاۋ بولىپ تابىلادى. كەلەسى جىلى وبلىستىڭ بارلىق مەديتسينالىق مەكەمەلەرى ورتا دەڭگەيدەگى الەمدىك جابدىقتارمەن قامتىلاتىن بولادى. وسىلايشا, بەس جىلدىڭ ىشىندە ءوڭىر مەديتسيناسىنىڭ باسەكەگە قابىلەتتىلىگى بىرنەشە ەسە ارتاتىنىنا تولىق سەنىمدىمىن. بۇدان بولەك, «رۋحاني جاڭعىرۋ» باعدارلاماسى اياسىندا ءداستۇرلى قازاق مەديتسيناسى ورتالىعىن اشامىز. مەن حالىق مەديتسيناسى جاقسى دامىعان قىتايدا بولىپ قايتتىم. وتكەندى ۇمىتپاۋىمىز كەرەك. بابالار مۇراسىن, ولاردىڭ تاجىريبەلەرىن كەڭىنەن قولدانساق, ۇتارىمىز كوپ بولماق, – دەدى د.احمەتوۆ.
راۋشان نۇعمانبەك,
جۋرناليست
سەمەي
