الداعى وتەتىن حاكاتون Astana Innovations Challenge 2018 جوباسى الدىن الا جوسپارلانباعان ءىس-شارا بولىپ وتىر. سوندىقتان شارا ۇيىمداستىرۋشىلارى كونكۋرس جەڭىمپازدارىنا بىرقاتار قىزىقتى شەشىمدەر مەن توسىنسىيلار ازىرلەۋدە.
سپيكەرلەردىڭ سوزىنشە بۇل حاكاتوننىڭ ەرەكشەلىگى – مەملەكەتتىك شەنەۋنىكتەر, قوعام قايراتكەرلەرى, جۋرناليستەر, ينۆەستورلار مەن ساراپشىلار «شىنايى ديالوگ جانە تۇيتكىلدەردى جەكەلەي شەشۋگە» قاتىسۋ ماقساتىندا كەزدەسەدى.
«اتاپ ايتقاندا, تالقىلاۋ ازىرلەۋشىلەر ءۇشىن قىزىقتى بولماق, ولار جەتەكشى ساراپشىلار مەن مەملەكەتتىك ورگانداردىڭ ءبىرىنشى باسشىلارىنان بۇگىندە قانداي ازىرلەمەلەر سۇرانىسقا يە ەكەنىن جانە ولاردى ىسكە اسىرۋدا قالاي ينۆەستيتسيا تارتۋ كەرەكتىگىن بىلە الادى. حاكاتوننىڭ قورىتىندىسى بويىنشا 3 ۇزدىك ستارتاپ-جوبا ىرىكتەلىپ, Microsoft Kazakhstan مەن Here Technologies كومپانيالارى ۇسىنعان 1 000 000 تەڭگە مولشەرىندەگى جۇلدە قورىن ءوزارا بولىسەدى», دەدى «استانا Innovations» اق باسقارما توراعاسى ولجاس سارتاەۆ.
راۋان قايدار,
«ەگەمەن قازاقستان»
