اتىراۋ مۇناي جانە گاز ۋنيۆەرسيتەتىنىڭ دوتسەنتى ايگۇل ەرمەكوۆانىڭ باستاماسىن جىلىوي اۋدانىنداعى ارىپتەستەرى دە قولداپ, «الىستا قالعان اۋعانستان» اتتى جاڭا كىتاپتىڭ تۇساۋكەسەر ءراسىمىن وتكىزدى.
15 اقپان – كەڭەس اسكەرلەرىنىڭ اۋعانستاننان شىعارىلعان كۇنى. جىل سايىن وسى مەزگىلدە وبلىستا ءتۇرلى شارالار ۇيىمداستىرىلادى. جىلىوي اۋداندىق مادەنيەت ۇيىندە وتكەن كەشكە ماڭعىستاۋ وبلىسى بەينەۋ اۋدانىنان اۋعان سوعىسى ارداگەرلەرى قوعامىنىڭ توراعاسى ساندىبەك ۇسەنوۆ, ارداگەرلەر بيسەنباي دەمەۋوۆ, نۇربەرگەن جاڭبىرباەۆ, ماقات اۋداندىق اۋعان سوعىسى ارداگەرلەرى قوعامىنىڭ توراعاسى قالىبەك تاجىباەۆ, ارداگەر كەنجەباي تاعابەرگەنوۆ, قىزىلقوعا اۋداندىق ارداگەرلەر قوعامىنىڭ توراعاسى نۇرمان ماجەكوۆتەر ارنايى كەلىپ قاتىستى.
اتىراۋ وبلىسىنان اۋعانستانعا اتتانعان 13 جاۋىنگەر قازا تاپتى, ءبىر جاۋىنگەر جوعالىپ كەتكەندەر تىزىمىندە تۇر. ولاردىڭ تاعدىرلارىن ورنەكتى سوزبەن ءورىپ شىققان كىتاپتىڭ اۆتورى - قر مادەنيەت قايراتكەرى, اقىن, جۋرناليست ساۋلەش شاتەنوۆا. «وسى كىتاپتى جازباعاندا, اۋعان سوعىسى دەگەنگە مۇلدە ءمان بەرمەي جۇرە بەرەر مە ەدىم؟ قاندى شايقاستىڭ بارشا قاسىرەتىن, قيىندىعىن جان جۇرەگىممەن سەزىندىم,-دەيدى ول,- سوعىستا وپات بولعان جىلىويلىق جاۋىنگەرلەر بولات پەن ەربولاتتىڭ تاعدىرى, ولاردىڭ انالارىنىڭ قايعىسى كوزىمە جاس ءۇيىردى.
نەبارى جيىرماعا دا جەتپەي قىرشىن كەتكەن جاستاردىڭ ءجوندى ءومىرباياندارى دا جوق ەدى, سوندىقتان ولار تۋرالى مالىمەتتەر دە از بولدى. اۋعاندىق جاۋىنگەرلەردىڭ ەرلىگىن پاتريوتتىق تاربيەنىڭ نەگىزى ەتىپ, مەكتەپتەردىڭ وقۋ باعدارلامالارىنا ەنگىزۋدى ۇسىنامىن. كىتاپتىڭ جارىق كورۋىنە اۋداندىق اۋعان سوعىسى قوعامىنىڭ توراعاسى دوسان ءادىلوۆ زور ەڭبەك ءسىڭىردى».
باقىتگۇل باباش,
«ەگەمەن قازاقستان».
