شاراعا ينۆەستيتسيالار جانە دامۋ ءبىرىنىشى ۆيتسە-ءمينيسترى رومان سكليار, ينۆەستيتسيالار جانە دامۋ ۆيتسە-ءمينيسترى قايىربەك وسكەنباەۆ جانە ينۆەستيتسيالار جانە دامۋ ۆيتسە-ءمينيسترى ارىستان قابىكەنوۆ قاتىسىپ, مينيسترلىكتىڭ 2017 جىلعا ارنالعان جۇمىسىنىڭ ناتيجەلەرى تۋرالى, مينيسترلىكتىڭ 2018 جىلعا جوسپارلارى تۋرالى باياندادى.
جۋرناليستەردىڭ سۇراعىنا جاۋاپ بەرگەن قايىربەك وسكەنباەۆ بىلتىر «نۇرلى جەر» باعدارلاماسى قوسىلعانىن تىلگە تيەك ەتىپ, ۇكىمەتكە دايىندالىپ جاتقان ۇسىنىسقا دا توقتالىپ ءوتتى.
«بىلتىر «نۇرلى جەر» باعدارلاماسى ىسكە قوسقاندا يپوتەكانىڭ پايىزى 10 پايىزدان اسپاۋ كەرەك دەدىك. ودان اساتىن بولسا, ۇكىمەت ءوز تاراپىنان ونى سۋبسيديالاۋ مەحانيزىمىن ىسكە اسىردى. قازىرگى ۋاقىتتا ول جۇمىس جاقسى ءجۇرىپ كەلە جاتىر. يپوتەكانىڭ سانى كوبەيۋدە. سونى ەكى جولمەن ارزانداتامىز دەپ وتىرمىز. بۇرىن جاي بانكتەر بەرگەن يپوتەكا شامامەن 80 پايىزداي بولسا, 20 پايىزىن تۇرعىن ءۇي قۇرىلىس جيناق بانكى قۇرايتىن. ال بىلتىر تۇرعىن ءۇي قۇرىلىس جيناق بانكىنىڭ يپوتەكاسى 76 پايىزعا دەيىن جەتتى. قالعان بانكتەر 24 پايىزىن قۇراپ وتىر. وسى جولدا ەكى ماقساتتى كوزدەپ وتىرمىز. قالعان بانكتەردىڭ وسى جۇمىسقا اقشالارىن جۇمساۋ قانداي تەتىكتەرى بار ەكەنىن سونى الىپ, يپوتەكانىڭ باعاسىن تۇسىرىلسە دەپ. ونداي ۇسىنىستى ءبىز دايىنداپ وتىرمىز. 10 پايىزدان دا ارزان بولسا ەكەن دەپ. ەگەر ۇكىمەت قولداسا ونى جاقىن ارادا ەستيتىن بولاسىزدار. ەكىنىشدەن, جاڭاعى تۇرعىن ءۇي قۇرىلىس جيناق بانكىنىڭ مەحانيزىمىن دامىتىپ وتىرمىز. ولاردىڭ پايىزى وزدەرىڭىز بىلەسىزدەر 5 پايىزدان باستاپ, 9,5 پايىزعا دەيىن», دەدى ق.وسكەنباەۆ.
سونىمەن قاتار ول يپوتەكالىق ءۇي الۋعا ارنالعان مىندەتتى العاشقى جارنا 30 پايىزدان تومەندەمەيتىنىن جەتكىزدى.
«سەبەبى ونى ازايتاتىن بولساق, ايلىق تولەيتىن تولەم ءوسىپ كەتەدى. مىسالى, 30 پايىزدى الدىن-الا تولەپ قويساڭىز, وندا اي سايىن 50 مىڭنان تولەپ وتىراسىز. ەگەر 15 پايىزعا دەيىن تۇسىرەتىن بولساق, ايلىق تولەيتىنىڭىز 75 مىڭعا ءوسىپ كەتەدى. «نۇرلى جەر» باعدارلاماسىنىڭ جۇزەگە اسۋىمەن وڭىرلەردەگى قۇرىلىستار دا جاقسى ءجۇرىپ جاتىر. تەك قانا ءۇي ەمەس, كىشى اۋدانداردا بوي كوتەرىپ, ءبىر جىلدىڭ ىشىندە 25-30 ۇيدەن تۇرعىزىلۋدا», دەدى ول.
راۋان قايدار,
«ەگەمەن قازاقستان»
