- سوڭعى كەزدە ءابىر 3-4 كۇن سايىن ويناپ جاتسىزدار. بۇل ءسىزدىڭ كومانداڭىزعا كەرى اسەرىن تيگىزبەي مە؟
- بۇل ەندى قاتتى قينالاتىن جاعداي ەمەس. مەنىڭ كوماندام مۇنداي رەجىمگە ۇيرەنىپ العان. ودان بولەك, وسى جولى 7 ساعات بويى ۇشاقپەن ۇشىپ كەلدىك. جول اۋىر بولدى. دەگەنمەن, ەۋروپا ليگاسى جارىسىنا دا قاتتى ماڭىزبەن قارايمىز. سوندىقتان دا, ءبىز سابىرلى بولۋىمىز كەرەك. ءبىرىنشى رەت سينتەتيكالىق الاڭدا ونەر كورسەتكەلى تۇرمىز. ەرتەڭ بارىنشا كۇش سالىپ ونەر كورسەتەتىن بولامىز.
- ەۋروپا ليگاسىنىڭ فينالىندا ەكى رەت وينادىڭىزدار. ەندىگى ماقساتىڭىز قالاي؟ بيىل دا جەڭىسكە جەتۋ ماقساتىن قويىپ وتىرسىز با؟
- «سپورتينگتىڭ» ماقساتى ءاربىر تۋرنيردە جەڭىسكە جەتۋ. ءبىز ءجاي اشەيىن قاتىسا بەرمەيمىز. ەگەر قاتىسىپ, ماقسات قويىپ ويناساق, سوڭىنا دەيىن ناتيجەنى تالاپ ەتەمىز. سوندىقتان دا, ەۋروپا ليگاسىن بيىل جەڭىپ جاتساق, بۇل وتە جاقسى كورسەتكىش بولار ەدى. كوپتەگەن ەۋروپالىق كلۋبتار سەكىلدى ەۋروپا ليگاسىن مەنسىنبەيتىندەردىڭ قاتارىنان ەمەسپىز.
- رافاەل مەن ماتە جايلى ايتىپ وتسەڭىز. ولاردىڭ ويىنعا دايىندىعى قانشالىقتى.
- ەكەۋى دە تالانتتى فۋتبولشى. ماتەنى ءبىز استاناعا اكەلمەدىك. ونىڭ ازداعان جاراقاتى بار. ونىڭ ۇستىندە مىندا جاساندى الاڭ ەكەن. مۇنداي الاڭدا جاراقاتى اسقىنىپ كەتۋى مۇمكىن. ال جالپى ايتار بولسام, جاساندى الاڭدا فۋتبول ويناعان دۇرىس ەمەس دەر ەدىم. الايدا, قازاقستانداعى اۋا-رايىن كورىپ مەن امالسىز ىشتەي تىنىپ وتىرمىن. سىزدەردىڭ جاعدايلارىڭىزدى ءتۇسىندىم.
- ءسىز ءۇشىن ىشكى چەمپيوناتتى جەڭۋ ماڭىزدى ما, الدە ەۋروپا ليگاسى ما؟ قازىر, بىرىنشىلىكتە «پورتۋدان» ەداۋىر قالىپ كەلە جاتسىزدار عوي. بالكىم ەۋروكۋبوكتان گورى پورتۋگاليا چەمپيوناتىنا دەن قوياتىن شىعارسىز.
- ءيا, راس ايتاسىز. ءبىزدىڭ ماقساتىمىز, ەڭ الدىمەن پورتۋگاليا چەمپيوناتىن جەڭۋ. ال ەۋروپا ليگاسى قوسىمشا بونۋس سەكىلدى عوي. مەنىڭ ويىمشا ەكەۋىن دە قاتار الىپ جۇرۋگە بولاتىن سەكىلدى. ونىڭ ۇستىنە قازىر تەك پلەي-وفف ويىندارى عوي. اسا قاتتى كوپ ويىن وتكىزىپ شارشامايسىڭ دا.
ەرمۇحامەد ماۋلەن
