جەكە زەينەتاقى شوتىنىڭ (جزش) جاي-كۇيى تۋرالى اقپارات تەگىن بەرىلەدى, ال الۋ ءتاسىلىن سالىمشى (الۋشى) ءوزى تاڭدايدى. جزش-دان ءۇزىندى-كوشىرمەنى مىناداي تاسىلدەرمەن الۋعا بولادى:
- ءداستۇرلى پوشتا بايلانىسى ارقىلى – جىلىنا ءبىر رەت;
- ەلەكتروندىق پوشتا ارقىلى – ءۇزىندى-كوشىرمە تاڭدالعان كەستە بويىنشا (اي سايىن, ءۇش اي سايىن, التى اي سايىن, جىل سايىن) جولدانادى;
- قور كەڭسەسىنە تىكەلەي ءوزى كەلگەندە – شەكتەۋسىز تۇردە;
- ينتەرنەت بايلانىسى ارقىلى (سايت نەمەسە سمارتفوندار مەن پلانشەتتەرگە ارنالعان «ENPF» ۇيالى قوسىمشاسى ارقىلى) – ونلاين تارتىبىندە – شەكتەۋسىز.
- قر ەلەكتروندى ۇكىمەتى (www.egov.kz) سايتىندا ەلەكتروندىق تسيفرلىق قولتاڭبانىڭ (ەتسق) كومەگىمەن «الەۋمەتتىك قامتاماسىز ەتۋ» – «زەينەتاقىمەن قامتاماسىز ەتۋ» – «بىرىڭعاي جيناقتاۋشى زەينەتاقى قورى سالىمشىسىنىڭ (الۋشىسىنىڭ) زەينەتاقى جيناقتارىنىڭ (ينۆەستيتسيالىق كىرىستەرىن ەسكەرە وتىرىپ) جاي-كۇيى تۋرالى اقپارات بەرۋ» ءبولىمى ارقىلى ءۇزىندى-كوشىرمە الۋعا بولادى.
2017 جىلدى قورىتىندىلاي وتىرىپ ايتار بولساق, سالىمشىلار مەن الۋشىلار اراسىندا اقپارات الۋدىڭ ەلەكتروندىق تاسىلدەرى تانىمال بولا تۇسكەن. ال زەينەتاقى جيناقتارىنىڭ جاي-كۇيى تۋرالى اقپاراتتى قور كەڭسەلەرىنە كەلىپ الۋ سانى وتكەن جىلدارمەن سالىستىرعاندا ەلەۋلى تۇردە ازايعان. مىسالى, 2017 جىلدىڭ قورىتىندىسى بويىنشا حابارلاۋ ءتاسىلى رەتىندە «جەكە ءوزى كەلىپ ءوتىنىش جاساۋ» جولىن تاڭداعاندار سانى 2016 جىلمەن سالىستىرعاندا 20 پايىزعا ازايىپ, 2018 جىلدىڭ 1 قاڭتارىنا قاراي 2,2 ملن ادامدى قۇراسا, «پوشتا بايلانىسى» ءتاسىلىن تاڭداعاندار سانى وتكەن جىلى 18 پايىزعا ازايىپ, 2018 جىلدىڭ 1 قاڭتارىنا قاراي 1,8 ملن ادامدى قۇرادى.
سونىمەن قاتار, 2017 جىلى ينتەرنەت بايلانىسى ءتاسىلىن تاڭداعاندار سانى 2016 جىلمەن سالىستىرعاندا 33 پايىزعا ارتىپ, 2018 جىلدىڭ 1 قاڭتارىنا قاراي 3,9 ملن ادامدى قۇرادى. ال ءۇزىندى-كوشىرمەنى ەلەكتروندىق پوشتا ارقىلى الۋدى تاڭداعاندار سانى 2018 جىلدىڭ 1 قاڭتارىنا قاراي 0,8 ملن ادامعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 75 پايىزعا جوعارى. وسىلايشا, اعىمداعى جىلدىڭ باسىنا قاراي ءۇزىندى-كوشىرمەنى ەلەكتروندىق جولمەن الۋ ءتاسىلىن تاڭداعاندار سانى 4,7 ملن ادامنان استى.
ەلەكتروندىق پوشتا ارقىلى حابارلاۋ ءتاسىلى الماتى مەن استانا قالالارىندا تانىمال بولا تۇسكەن. ياعني, بۇل قالالاردا كەپتەلىستە تۇرعىسى كەلمەيتىندەر سانى ءبىر جىل ىشىندە سايكەسىنشە 65 جانە 70 پايىزعا ارتىپ, 2018 جىلدىڭ 1 قاڭتارىنا قاراي شامامەن 195 جانە 174 مىڭ ادامدى قۇراپ وتىر. ال بۇل ەكى قالانىڭ ەكونوميكالىق تۇرعىدان بەلسەندى تۇرعىندارىنىڭ 22 جانە 36 پايىزىن قۇرايدى.
ەل وڭىرلەرىندە ينتەرنەت بايلانىسى بويىنشا جاعداي مىناداي سيپاتقا يە. ءبىرىنشى ورىندا الماتى قالاسى, ەكىنشى ورىندا وڭتۇستىك قازاقستان وبلىسى, ال ءۇشىنشى ورىندا قاراعاندى وبلىسى كەلەدى. بۇل قالالاردا ينتەرنەت بايلانىسىن پايدالانۋشىلار سانى وتكەن جىلدىڭ ىشىندە سايكەسىنشە 30, 35 جانە 33 پايىزعا ءوسىپ, 2018 جىلدىڭ 1 قاڭتارىنا قاراي شامامەن 560 مىڭ, 395 مىڭ جانە 324 مىڭ ادامعا جەتتى. بۇل وسى وبلىستارداعى ەكونوميكالىق تۇرعىدان بەلسەندى تۇرعىنداردىڭ 63, 35 جانە 49 پايىزىن قۇرايدى.
ءۇزىندى-كوشىرمەلەر سالىمشىلاردىڭ (الۋشىلاردىڭ) جزش اشۋ تۋرالى وتىنىشىندە, زەينەتاقىمەن قامسىزداندىرۋ تۋرالى شارتتا نەمەسە حابارلاۋ ءتاسىلىن وزگەرتۋ/بەلگىلەۋ تۋرالى كەلىسىمدە كورسەتىلگەن مەكەنجايلارعا, ەلەكتروندىق پوشتالارعا جولدانادى. ەگەر سالىمشى (الۋشى) مەكەنجايىن وزگەرتسە جانە بۇل تۋرالى جىل سوڭىنا دەيىن بجزق-عا حابارلاماسا, وندا پوشتا بايلانىسى ارقىلى 2017 جىل بويىنشا جىبەرىلگەن ءۇزىندى-كوشىرمە قورعا قايتىپ ورالادى. بۇل جاعدايدا بجزق قولدانىستاعى زەينەتاقى زاڭناماسىنا سايكەس, كەلەسى جىلى ءۇزىندى-كوشىرمەنى وعان جىبەرمەۋگە قۇقىلى.
ەگەر اعىمداعى جىلدىڭ 1 قاڭتارىنا قاراي سالىمشىنىڭ زەينەتاقى شوتىندا قارجى بولماسا نەمەسە قانداي دا ءبىر حابارلاۋ ءتاسىلى تاڭدالماعان بولسا, بجزق وعان وتكەن جىل بويىنشا زەينەتاقى شوتىنىڭ جاي-كۇيى تۋرالى اقپاراتتى جىبەرمەيدى.
2017 جىلى زەينەتاقى جيناقتارىنىڭ جاي-كۇيى تۋرالى اقپاراتتى الۋ مۇمكىندىكتەرى جايىندا بۇقارالىق اقپارات قۇرالدارىندا كەڭ كولەمدە ءتۇسىندىرۋ ناۋقانى جۇرگىزىلگەن بولاتىن. بىراق, سوعان قاراماستان قازىرگى ۋاقىتتا 1,3 ميلليونعا جۋىق ادام ءۇزىندى-كوشىرمە المايدى. وعان سەبەپ – ولار زەينەتاقى شوتىن اشاردا حابارلاۋ ءتاسىلىن بەلگىلەمەگەن.
قازىرگى ۋاقىتتا بارلىق دەربەس قىزمەت كورسەتۋ ورتالىقتارىندا سالىمشىلاردىڭ بۇل ساناتىمەن جۇمىس جۇرگىزىلىپ جاتىر. قورعا ءوتىنىش جاساپ كەلگەن كەزدە ولارعا زەينەتاقى شوتىنان ءۇزىندى-كوشىرمە الۋ ءتاسىلى رەتىندە ينتەرنەت بايلانىسى ۇسىنىلادى. ودان باسقا, «بجزق» اق سالىمشىلارعا تىكەلەي حابارلاۋ شارالارىن جۇرگىزىپ جاتىر. بۇل رەتتە سالىمشىلار مەن الۋشىلاردىڭ ەلەكتروندىق پوشتاسىنا e-mail-حابارلاندىرۋجانە ۇيالى تەلەفوندارىنا SMS-حابارلاندىرۋلار جىبەرىلۋ ۇستىندە. سونىمەن قاتار, بجزق بۇقارالىق اقپارات قۇرالدارىندا سالىمشالىرعا جەكە دەرەكتەمەلەرىن وزەكتەندىرۋ قاجەتتىگى تۋرالى ماتەريالدار جاريالاي وتىرىپ, اقپاراتتىق-ءتۇسىندىرۋ جۇمىستارىن ودان ءارى جالعاستىرۋدا.
بجزق سالىمشىلارعا (الۋشىلارعا) قور كەڭسەلەرىنە كەلىپ ءوتىنىش جاساۋ نەمەسە وزەكتى ەلەكتروندىق تسيفرلىق قولتاڭبانىڭ (ەتسق) كومەگىمەن ءوزىنىڭ جەكە دەرەكتەمەلەرىن وزەكتەندىرۋگە جانە/نەمەسە ىڭعايلى, زاماناۋي حابارلاۋ ءتاسىلىن تاڭداۋعا كەڭەس بەرەدى. ويتكەنى, ەسكى دەرەكتەمەلەر قوردىڭ ءوز مىندەتتەمەلەرىن ورىنداۋىنا كەرى اسەر ەتەدى.
ەڭ تانىمال جانە زاماناۋي حابارلاۋ ءتاسىلى – ينتەرنەت بايلانىسىن تاڭداعان جاعدايدا جەكە زەينەتاقى شوتىنان ءۇزىندى-كوشىرمەنى ونلاين تارتىبىندە كەز كەلگەن ۋاقىتتا, كەز كەلگەن جەردە enpf.kz سايتى نەمەسە سمارتفوندار مەن پلانشەتتەرگە ارنالعان «ENPF» ۇيالى قوسىمشاسى ارقىلى الۋعا بولادى. بۇل رەتتە سالىمشى ءۇزىندى-كوشىرمە الۋ ءۇشىن كەز كەلگەن كەزەڭدى (بىر كۇننەن باستاپ بىرنەشە جىلعا دەيىنگى ارالىق)تاڭداي الادى.
