«قازاقستان رەسپۋبليكاسى اۋماعىندا GetContact قوسىمشاسىنا شەكتەۋ قويىلدى, سەبەبى جەكە مالىمەتتەرگە قاتىستى زاڭ بۇزۋشىلىق دەرەكتەرى انىقتالدى. مينيسترلىك «بايلانىس تۋرالى» زاڭنىڭ 41-1-بابىنا سايكەس شەكتەۋ قويۋعا بۇيرىق شىعاردى», دەدى مينيسترلىك وكىلدەرى. ولاردىڭ ايتۋىنشا, قوسىمشا دەربەس دەرەكتەر جانە ولاردى قورعاۋ تۋرالى زاڭعا قايشى جۇمىس ىستەيدى.
ءبىر ايتا كەتەرلىگى, قوسىمشا 8 اقپاندا قازاقستاندا كەڭ تارالىپ, اقپارات جانە كوممۋنيكاتسيالار مينيسترلىگى كەلەسى كۇنى زاڭ بۇزۋشىلىق دەرەگىن انىقتاپ, بىردەن تىيىم سالدى. بۇعان دەيىن قوسىمشا ازەربايجاندا, ارمەنيادا بۇعاتتالعان.
ينتەرنەتتەگى مالىمەتتەرگە سەنسەك, قوسىمشانى جاساعان GetContact LLP كومپانياسى ۇلىبريتانيادا 2017 جىلدىڭ قاراشا ايىندا قۇرىلعان. كومپانيا وكىلدەرىنىڭ ايتۋىنشا, كومپانيانىڭ تەحنولوگيالىق ونىمدەرى 148 مەملەكەتتە جۇمىس ىستەيدى. قوسىمشا ارقىلى قولدانۋشىلار تانىستارىنىڭ نومىرلەرىن تەكسەرىپ, ولارعا قاتىستى جەكە مالىمەتتەردى بىلگەن. سونىمەن قاتار GetContact ارقىلى كەز كەلگەن بەيتانىس ءنومىردى تەرىپ, ءنومىر يەسىنىڭ اتى-ءجونىن, جەكە مالىمەتتەرىن, تانىستارىنىڭ تەلەفونىندا ونىڭ قانداي اتپەن ساقتالعانىن انىقتاي العان. ياعني باعدارلاماداعى ىزدەۋ جۇيەسىنە كەز كەلگەن ءنومىردى تەرىپ, ءنومىر يەسىنىڭ اتى-ءجونىن عانا ەمەس, جەكە تۇلعانىڭ مەكەنجايىن, اۆتوكولىگى تۋرالى اقپاراتتى, وتباسى مەن بانك كارتاسى تۋرالى مالىمەتتەردى دە انىقتاۋعا مۇمكىندىك بەرىلگەن. بىراق قوعامداعى كيكىلجىڭدەردەن سوڭ باعدارلاما اۆتورلارى كەيىن بۇل الگوريتمدەردى وزگەرتىپ, قوسىمشانى بەيتانىس نومىرلەر يەسىنىڭ اتى-ءجونىن ءبىلۋ ءۇشىن عانا قۇراستىرعانىن ايتتى.
ء«بىز قوسىمشانىڭ كەيبىر فۋنكتسيالارىن وزگەرتتىك. سونىمەن قاتار كەز كەلگەن ادام باعدارلامادان ءوز مالىمەتتەرىن وشىرە الاتىن قىزمەت قوستىق. سول ارقىلى تۇتىنۋشى ءوز ءنومىرىن بازادان وشىرە الادى», دەيدى باعدارلامانى قۇراستىرۋشىلار. ولار كەز كەلگەن مەملەكەتتىڭ زاڭىنا قۇرمەتپەن قارايتىنىن, بىراق ازەربايجان مەن قازاقستان بيلىگىنەن رەسمي تالاپ الماعانىن ايتىپ, بۇل مەملەكەتتەردىڭ زاڭدارىنا قايشى ارەكەت ەتپەدىك دەپ مالىمدەدى. دەگەنمەن, قوسىمشانىڭ كەمشىلىكتەرى كوپ ەكەنىن ءارى دەربەس مالىمەتتەرگە قاۋىپ توندىرەتىنىن تەك اقپارات جانە كوممۋنيكاتسيالار مينيسترلىگى عانا ەمەس, قازاقستاندىق ساراپشىلار دا ايتتى.
مىسالى, كيبەرشابۋىلداردى زەرتتەۋ مەن ساراپتاما جاساۋ ورتالىعىنىڭ پرەزيدەنتى ولجاس ساتيەۆ بۇگىنگى كۇنگە دەيىن الىنعان مالىمەت قوسىمشا بازاسىندا ساقتالىپ قالاتىنىن ايتتى. «وسى قوسىمشاعا تىركەلگەن كەز كەلگەن ادامنىڭ تەلەفونىنداعى نومىرلەر تۇتىنۋشى ءوز مالىمەتتەرىن قوسىمشادان وشىرگەن جاعدايدىڭ وزىندە GetContact بازاسىندا ساقتالىپ قالادى. بارلىق مالىمەتتەردى جويۋ ءۇشىن تىركەلگەن تانىستارىڭىز دا قوسىمشادان ءوز نومىرلەرىن وشىرگەنى ءجون», دەيدى ولجاس ساتيەۆ. سونىمەن قاتار IT تەحنولوگيالار سالاسىنداعى ساراپشىلاردىڭ ءبىرى الىبەك نارىمباي دا GetContact قوسىمشاسى قازاقستاندا بۇعاتتالعانىنا قاراماستان, وندا ميلليلونداعان ادامنىڭ دەرەكتەرى ساقتالىپ قالعانىن جانە ولاردىڭ ءتۇرلى ماقساتتا قولدانىلۋى مۇمكىن ەكەنىن ايتتى.
ء«ىت ماماندار كومانداسى قوسىمشانىڭ بىرنەشە كەمشىلىگىن انىقتادى. بىرىنشىدەن, تەلەفون ءنومىرى ارقىلى دەربەس اقپارات قولجەتىمدى بولادى. ياعني كەز كەلگەن ادامنىڭ ءنومىرى ارقىلى ول تۋرالى بارلىق مالىمەتكە قول جەتكىزۋگە بولادى. ەكىنشىدەن, قوسىمشا ارقىلى بىرەۋدىڭ ابىرويىنا نۇقسان كەلتىرۋ وڭاي بولادى. ءتىپتى سول ءۇشىن ادام ابىروي-بەدەلىنەن ايىرىلىپ قانا قويماي, جۇبايىمەن ۇرسىسىپ, ءتىپتى اجىراسىپ كەتۋى مۇمكىن. ۇشىنشىدەن, كەيبىر كومپانيالار GetContact ارقىلى كەز كەلگەن نومىرلەر تۋرادى مالىمەت الىپ, كوممەرتسيالىق ماقساتتا قولدانىلۋى مۇمكىن. ال بۇل دەرەكتەر ميلليونداعان اقشا تۇرادى. كەز كەلگەن كومپانيا تەلەفون ءنومىرى ارقىلى قانداي دا ءبىر اقپارات الۋ ءۇشىن مىڭداعان دوللار تولەۋگە دايىن», دەيدى ول.
گۇلنۇر قۋانىشبەكقىزى,
«ەگەمەن قازاقستان»
